ءوڭىردىڭ قاي قيىرىندا بولسىن, تاريحى تەرەڭنەن تامىر تارتاتىن جادىگەرلەر از ەمەس. جۇرت تۇركىستانداعى تايقازاندى مىڭجىلدىقتاردىڭ مۇراسى رەتىندە باعالاسا, تۇرار رىسقۇلوۆ اۋدانىنىڭ ورتالىعى قۇلان اۋىلىنىڭ تۇرعىندارى اۋداندىق تاريحي-ولكەتانۋ مۋزەيىندە ساقتالعان قولا قازاندى ماقتان تۇتادى.
«مۋزەيىمىزدە تۇرعان قولا قازاننىڭ بيىكتىگى 58 سانتيمەتر بولسا, ديامەترى 60 سانتيمەتردى قۇرايدى. قازاننىڭ ءتورت تۇتقاسى بار. ەكى تۇتقا جادىگەردى كوتەرىپ قويۋعا ارنالعان بولسا, قالعان ەكەۋى قازاندى اسپالى شىنجىر ارقىلى جوعارى كوتەرىپ, استىنا وت جاعۋ ءۇشىن پايدالانىلادى. دەرەككە جۇگىنسەك, ىقىلىم زاماننان جەتكەن جادىگەر قولادان جاسالعان ەكەن», دەيدى اۋداندىق مۋزەيدىڭ باسشىسى ەلدار وتەمباەۆ.
مۋزەي ديرەكتورى كەلتىرگەن دەرەككە جۇگىنسەك, ءپىشىنى جارتى شارعا ۇقسايتىن جادىگەردىڭ كولەمى شامامەن 60 ليتر سۋعا شاقتالعان. قالىڭدىعى 0,8 سانتيمەتردى قۇرايدى. ال ءتورت دوعالى تۇتقاسى قازاندى ۇستاۋعا ىڭعايلاستىرىلىپ جاسالعان.
«قازاننىڭ استىڭعى جاعىندا بىرىككەن تۇعىرى بار. كۇلگىن ءتۇستى جادىگەردىڭ جوعارى جاعىنداعى ەرنەۋىنىڭ ازداعان بولىگى سىنعان. ىقىلىم زاماندا عۇمىر كەشكەن ادامداردىڭ تەمىردى قاي دەڭگەيدە, قانداي ماقساتتا پايدالانعانىن وسى قازانعا قاراپ-اق اڭعارۋعا بولادى. جالپى العاندا قولا قازان قۇندى ارحەولوگيالىق ارتەفاكتىلەر ساناتىنا جاتادى. ءبىز ءۇشىن سونىسىمەن دە قۇندى», دەيدى مۋزەي ديرەكتورى.
جالپى, اۋدان ورتالىعىنداعى مۋزەيدە ءوڭىردىڭ تاريحىنان سىر شەرتەتىن كونە جادىگەرلەر از ەمەس. ايتسە دە مۋزەي قىزمەتكەرلەرىنىڭ ايتۋىنشا, عيماراتقا باس سۇققان جەرگىلىكتى تۇرعىندار كوبىنەسە قولا قازاننىڭ تاريحىن سۇرايدى ەكەن.
جامبىل وبلىسى,
تۇرار رىسقۇلوۆ اۋدانى,
قۇلان اۋىلى