بيىل كورنەكتى اقىن, ساتيرا ساردارى شونا سماحان ۇلىنىڭ تۋعانىنا 100 جىل تولدى. سوعان وراي اشىلۋىنا وسىدان 40 جىل بۇرىن قالامگەردىڭ ءوزى ۇيتقى بولعان الماتى قالاسىنداعى №62 گيمنازيادا شونا سماحان ۇلى اتىنداعى مۇراجاي اشىلدى.
مەكتەپ ۇجىمى مازمۇندى ءىس-شاراعا تياناقتى دايىندالعان. وقۋشىلار قالامگەر شىعارمالارىنان كورىنىس قويىپ, ساتيرالىق تۋىندىلارىن جاتقا وقىدى.
شونا سماحان ۇلى – ارتىنا مول ادەبي مۇرا قالدىرعان سۋرەتكەر. مەكتەپ مۇراجايىنا ساتيريكتىڭ قولجازبالارى, جازۋ ماشىڭكەسى مەن ءوزى تۇتىنعان جەكە زاتتارى قويىلعان.
ساتيرا ساڭلاعىنىڭ ەسىمى قايراتكەرلىگىمەن بەلگىلى. قالامگەر ۇلتتىق مۇددەنى بارىنەن جوعارى قويىپ, الماتىدا قازاق مەكتەپتەرى مەن بالاباقشالارىن اشۋعا بىلەك سىبانىپ كىرىستى. جازۋشىلار وداعى جانىنان قازاق مەكتەپتەرىن اشۋمەن اينالىساتىن مەكتەپ كەڭەسىن اشىپ, ۇيىمنىڭ توراعاسى رەتىندە وقۋ-اعارتۋ ءىسىنىڭ وزەكتى ماسەلەلەرىن رەسپۋبليكا باسشىلىعىنا جەتكىزدى. زيالى قاۋىمدى ءۇن قوسۋعا شاقىردى. وسى زيالى توپ وكىلدەرى قالا ارالاپ, اتا-انالارمەن جيىن وتكىزىپ, قازاق تىلىندەگى ءبىلىم وشاقتارىنىڭ قاتارىن كوبەيتۋگە كۇش سالدى. ماسەلەن, 80-جىلدارى الماتىدا ءبىر عانا قازاق مەكتەبى بولعان. ءسويتىپ, انا تىلىمىزدە ءبىلىم بەرەتىن مەكتەپتەردىڭ سانى بىرتە-بىرتە كوبەيىپ, 20-دان استى.
– ءبىز وقۋشىلارعا تۋعان حالقىنىڭ كەلەشەگىنە الاڭداعان كۇرەسكەر تۇلعانىڭ ادەبي مۇراسىمەن بىرگە, قايراتكەرلىگىن ۇنەمى ۇلگى ەتەمىز. مۇراجايعا قويىلعان بۇيىمدار قالامگەردىڭ جەكە ءومىرى مەن شىعارماشىلىعىنان ايشىقتى كورىنىس بەرەدى.. 1983–1984 وقۋ جىلىندا العاشقى قازاق مەكتەپتەرىنىڭ ءبىرى بولىپ اشىلعان №62 گيمنازيادان قانشاما تۇلەك قاناتتاندى. ال ش.سماحان ۇلىنىڭ ەسىمى مەكتەبىمىزگە 1991 جىلى بەرىلدى. ەلگە, تىلگە جاناشىر زيالى قاۋىمنىڭ ارقاسىندا الماتىدا №12, №86 قازاق مەكتەبىنەن كەيىن اشىلعان №62 قازاق ورتا مەكتەبىنە بۇگىندە گيمنازيا مارتەبەسى بەرىلگەن. ءبىزدىڭ ءبىلىم وشاعىمىزدىڭ تاريحى شەجىرەگە تولى. مۇندا ەلىمىزگە تانىمال كوپتەگەن قايراتكەر وقىعان. مەكتەپ العاش اشىلعاندا 18 مۇعالىم بولىپ قىزمەت ىستەگەن. اسىرەسە ءبىرىنشى ديرەكتورى, ءبىلىم بەرۋ ءىسىنىڭ ۇزدىگى باقتىعالي وسەرباەۆتىڭ ەڭبەگى ەرەكشە. ونىڭ ءبىلىم بەرۋدەگى مول تاجىريبەسى مەكتەپتەگى ءبىلىم ساپاسىنا ايتارلىقتاي سەپتىگىن تيگىزدى. سونداي-اق وسى جىلدار ارالىعىندا ۋ.بايساقالوۆا, ۆ.نۇرماعانبەتوۆا, م.تولەنديەۆ, ءا.ءالجاپپاروۆ ق.نازاربەتوۆ, ا.بيجانوۆ سىندى ازاماتتار باسشىلىق ەتىپ, ءبىلىم ۇياسىنىڭ دامۋىنا زور ۇلەس قوستى. 1999 جىلى مەكتەپكە اراب, اعىلشىن, فرانتسۋز تىلدەرىن تەرەڭدەتىپ وقىتاتىن ارنايى مارتەبە بەرىلدى. ال 2001 جىلى لينگۆيستيكالىق گيمنازيا, 2008 جىلدان گيمنازيا مارتەبەسىندە ساپالى ءبىلىم بەرۋدىڭ ورتالىعىنا اينالىپ وتىر», دەدى مەكتەپ ديرەكتورى ميرامگۇل نابيدوللاەۆا.
ساپالى ءبىلىم مەن ونەگەلى تاربيە بەرۋدە بىلىكتى ۇستازداردىڭ ورنى ايرىقشا. وسى ورايدا الماتى قالاسى ءبىلىم باسقارماسىنىڭ ۇيىمداستىرۋىمەن وتكىزىلگەن «پەداگوگتەر» بايقاۋى مەن كونكۋرستارىندا مەكتەپتىڭ 20-دان استام مۇعالىمى جەڭىمپاز اتانىپ, رەسپۋبليكالىق تەلەساباقتار مەن بەينەساباقتاردا كوش باستاپ كەلەدى. ال تۇلەكتەردىڭ 80 پايىزعا جۋىعى كەيىنگى ون جىلدا مەملەكەتتىك گرانت يەسى اتانعان. وسى جىلداردا 45-كە جۋىق وقۋشى «التىن بەلگى» يەگەرى بولسا, حالىقارالىق, رەسپۋبليكالىق, قالالىق عىلىمي جوبالار, زياتكەرلىك, سونداي-اق ماحامبەت, اباي, ماعجان, مۇقاعالي, قادىر وقۋلارىنىڭ جەڭىمپازدارى, جالپى ءبىلىم بەرەتىن پاندەر بويىنشا وليمپيادالاردىڭ جۇلدەگەرلەرى گيمنازيا ماقتانىشى بولىپ ءجۇر. كەيىنگى 5 جىلدا گيمنازيانىڭ «نارگيز» بي ءانسامبلى «اق شاعالا» جانە «بوزتورعاي» فەستيۆالىنە قاتىسىپ, جۇلدەلى ورىندى ەنشىلەگەن.
الماتى