حالىقارالىق عىلىمي جارىستاردىڭ جەڭىمپازدارىنا قولداۋ كورسەتىلەدى. ەندى ولار ۇلتتىق بىرىڭعاي تەستىلەۋدى تاپسىرماي-اق, ەلىمىزدەگى كەز كەلگەن جوعارى وقۋ ورنىنا گرانت نەگىزىندە قابىلدانادى.
دارىندى بالالاردى قولداۋ ماقساتىنداعى باستامالار 2021 جىلى قولعا الىنعان. ءماجىلىس دەپۋتاتتارىنىڭ ۇسىنىسىمەن مەملەكەت حالىقارالىق وليمپيادا جەڭىمپازدارىن ۋنيۆەرسيتەتتەرگە گرانتپەن قابىلداۋ جانە اقشالاي سىياقى بەرۋ تۋرالى شەشىم قابىلداعان. بۇل شەشىم دارىندى بالالاردىڭ ەڭبەگىن باعالاۋداعى العاشقى قادام بولدى. الايدا حالىقارالىق عىلىمي جارىستاردا جەڭىسكە جەتكەن جەتكىنشەكتەر مۇنداي مۇمكىندىكتەن قالىس قالعان ەدى. دەپۋتات اسحات ايماعامبەتوۆتىڭ ايتۋىنشا, ولاردىڭ دا جەتىستىگى باعالانۋى كەرەك دەگەن باستامانى ۇكىمەت قولداماعان. «سول جىلى حالىقارالىق عىلىمي جارىستاردىڭ جەڭىمپازدارىن قولداۋدى ەنگىزۋ تۋرالى نورمانى كەلىسۋ پروتسەدۋراسىنان وتكىزە المادىق. الەمدىك روبوتتەحنيكا چەمپيوناتتارىندا جانە باسقا دا عىلىمي بايقاۋلاردا جەڭىسكە جەتكەن بالالاردىڭ نەگە وسىنداي قولداۋ المايتىنىن ءتۇسىندىرۋ قانشالىقتى قيىن بولعانى ءالى ەسىمدە», دەپ جازدى ا.ايماعامبەتوۆ الەۋمەتتىك جەلى پاراقشاسىندا.
دەگەنمەن تاباندى جۇمىستىڭ ارقاسىندا ۇسىنىس قابىلداندى. ەندى حالىقارالىق عىلىمي جارىستاردىڭ جەڭىمپازدارى وليمپيادا جەڭىمپازدارىمەن تەڭ دارەجەدە گرانتتارعا يە بولادى. بۇل قادام دارىندى بالالاردىڭ سەنىمىن ارتتىرىپ, ولاردىڭ جەتىستىكتەرىنە لايىقتى باعا بەرۋ ماقساتىندا جاسالىپ وتىر.
«كەلەسى قادام – بالالارعا اقشالاي سىياقىلار بەرۋ نورماسىن ەنگىزۋ. ءبىز وسى ماسەلەنى شەشىپ, 5 ميلليون تەڭگەگە دەيىنگى سىياقىنى ولاردىڭ دا الۋى ءۇشىن جۇمىس ىستەيتىن بولامىز. 2019 جىلدان باستاپ مەملەكەت دارىندى بالالاردى قولداۋ ءۇشىن كوپ نارسە جاسادى. اشىعىن ايتقاندا, بۇل ماسەلەلەر پرەزيدەنت قاسىم-جومارت توقاەۆتىڭ جەكە ۇستانىمى مەن قولداۋىنىڭ ارقاسىندا شەشىلىپ كەلەدى. ەندى مەتسەناتتاردىڭ دا وسى دارىندى بالالارعا نازار اۋدارۋى قاجەت. مەتسەناتتار تەك سپورتشىلاردى عانا ەمەس, سونىمەن قاتار جاس عالىمدار مەن تالانتتاردى قولداسا ەكەن دەيمىن, سەبەبى ءدال وسى بالالار ەلىمىزدىڭ بولاشاعىن قالىپتاستىرادى», دەيدى دەپۋتات.
بۇل باستامالار دارىندى جاستاردىڭ ءبىلىم الۋىنا جول اشىپ قانا قويماي, ولاردىڭ عىلىمي-زەرتتەۋشىلىك جۇمىستارىن ودان ءارى دامىتۋعا مۇمكىندىك بەرەدى. دارىندى بالالاردىڭ جەتىستىگىن باعالاپ, قولداۋ كورسەتۋ – ۇلت بولاشاعىنا سالىنعان ۇتىمدى ينۆەستيتسيا ەكەنى ءسوزسىز.