قازىرگى قوعامدى ينتەرنەتسىز ەلەستەتۋ استە مۇمكىن ەمەس. ەڭبەكتەگەن بالادان ەڭكەيگەن كەيۋاناعا دەيىن عالامتوردىڭ قىزىعىنا كىرىپ كەتكەنى انىق. الايدا حالىقتىڭ باسىم بولىگى ينتەرنەت يگىلىگىن كورىپ وتىرعانىمەن, شالعايدا ورنالاسقان ءبىراز ەلدى مەكەن تۇرعىندارى ساپالى بايلانىسقا ءزارۋ ەكەنى داۋسىز. ءتىپتى 2G-گە تەلمىرگەن اۋىلدار دا جەتىپ ارتىلادى. سول ساناتقا ەنگەن ەلدى مەكەندەر جامبىل وبلىسىندا دا از ەمەس. ولار جاعداي قاشان رەتتەلەدى دەپ الاڭداپ وتىر.
جىل بۇرىن تسيفرلىق دامۋ, يننوۆاتسيالار جانە اەروعارىش ونەركاسىبى ەكس ءمينيسترى باعدات مۋسين حالىقارالىق زەرتتەۋلەرگە سۇيەنە وتىرىپ, ءبىزدىڭ ەل ينتەرنەت ساپاسى بويىنشا توكيونى باسىپ وزعانىن مالىمدەگەندە, سالا مامانى تۇگىلى, قاراپايىم ادامدار دا كۇدىك كەلتىردى. ويتكەنى جۇمىس ساپارىمەن شالعاي اۋداندارعا بارعاندا تالاي مارتە عالامتورعا قول جەتكىزە الماي قانىمىز قايناعان ەدى. وكىنىشكە قاراي, قاراشا حالىقتىڭ جۇيكەسىنە شي جۇگىرتكەن ماسەلەنى شەشۋ جۇمىستارى باياۋ ىسكە اسىرىلىپ جاتىر.
جارتى جىل بۇرىن وڭىردە 50 ەلدى مەكەن تۇرعىندارى 2G قۋاتىنداعى ينتەرنەتكە تاۋەلدى بولسا, جىل سوڭىندا بۇل كورسەتكىش 4-كە ازايىپتى. وعان دا شۇكىر دەيمىز عوي. الايدا بۇل ماقتانۋعا تۇراتىن كورسەتكىش پە؟ جالپى, 2G قۋاتىنداعى بايلانىستى ينتەرنەت دەپ ايتۋعا بولا ما, بولماي ما؟
ء«وڭىردىڭ 367 ەلدى مەكەنى ينتەرنەتپەن قامتاماسىز ەتىلگەن. 46 اۋىل (12,5 پايىز) 2G قۋاتىنداعى بايلانىسقا قوسىلعان بولسا, 63 ەلدى مەكەن 3G ساناتىنداعى ينتەرنەتتى پايدالانىپ وتىر. ال وبلىس اۋماعىنداعى 258 ەلدى مەكەن جوعارى جىلدامدىقتى 4G ءموبيلدى ينتەرنەت جەلىسىنە قوسىلعان», دەيدى وبلىستىق تسيفرلاندىرۋ جانە ارحيۆتەر باسقارماسىنىڭ باسشىسى رۋسلان نوقرابەكوۆ.
جالپى العاندا تۇتىنۋشى رەتىندە 2G قۋاتىنداعى ينتەرنەت پەن 3G ساناتىنداعى عالامتور اراسىندا اۋىز تولتىرىپ ايتارلىقتاي ايىرماشىلىق بار دەۋگە كەلمەيدى. كەيبىر جەرلەردە 3G-مەن ينتەرنەتكە كىرۋ دە مەحناتقا اينالاتىنى بەلگىلى. قىسقاسى, ەكەۋىن قوسا ەسەپتەگەندەگى كورسەتكىش 29,7 پايىزدى قۇرايدى ەكەن. ال جوعارى جىلدامدىقتى 4G ءموبيلدى بايلانىسى ءوڭىر بويىنشا 70,3 پايىزعا تەڭ.
ء«وڭىر بويىنشا 199 ەلدى مەكەن تالشىقتى-وپتيكالىق بايلانىس جەلىسىمەن قامتىلعان بولسا, 172 ەلدى مەكەن قامتاماسىز ەتىلمەگەن. «قولجەتىمدى ينتەرنەت» ۇلتتىق جوباسى اياسىندا 2023–2027 جىلدارى ءوڭىر ەلدى مەكەندەرىنىڭ قولجەتىمدى ينتەرنەت جەلىسىنە جانە بايلانىسقا قولجەتىمدىلىگىن قامتاماسىز ەتۋ جونىندەگى جول كارتاسىنا سايكەس 2025–2027 جىلدارى 198 اۋىلداعى ءموبيلدى ينتەرنەت جەلىسىنىڭ ساپاسىن 4G-گە ارتتىرۋ كوزدەلگەن.
سونداي-اق 28 ەلدى مەكەندى جەرگىلىكتى اتقارۋشى ورگان تاراپىنان ەلەكتر جەلىلەرى مەن انتەننا-دىڭگەك قۇرىلىسىمەن قامتاماسىز ەتۋ بويىنشا جۇمىس اتقارىلادى. سونىمەن قاتار 170 ەلدى مەكەندى تالشىقتى-وپتيكالىق بايلانىس جەلىسىمەن جانە رەسپۋبليكالىق, وبلىستىق ماڭىزداعى جولداردى تسيفرلىق ينفراقۇرىلىممەن قامتاماسىز ەتۋ ءۇشىن 2024–2025 جىلدارى 12 انتەننا دىڭگەك ورناتۋ كوزدەلگەن», دەيدى جاۋاپتى باسقارما باسشىسى.
باسقارما باسشىسى كەلتىرگەن دەرەككە جۇگىنسەك, وڭىردەگى ەلدى مەكەندەردى 100 پايىز 4G ساناتىنداعى عالامتورمەن جانە تالشىقتى-وپتيكالىق بايلانىس جەلىسىمەن قامتاماسىز ەتۋ جۇمىستارى 2027 جىلى مارەسىنە جەتەتىن كورىنەدى.
ايشىلىق الىس جەرلەردەن جىلدام حابار العىزاتىن ساپالى ينتەرنەتكە ءزارۋ اۋىلدار ەلىمىز بويىنشا دا از ەمەس. جارتى جىل بۇرىن ۇكىمەت وتىرىسىندا ءسوز العان تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسۇلان ماديەۆ اتقارىلىپ جاتقان جۇمىستار جايىندا ەسەپ بەرگەن كەزدە وزەكتى ماسەلەگە قاتىستى ءوز ويىمەن ءبولىسىپ, جاعدايدى بايانداعانى بار.
مينيستر كەلتىرگەن مالىمەتكە سۇيەنسەك, جارتى جىل بۇرىن ەلىمىز بويىنشا ءموبيلدى ينتەرنەتكە قول جەتكىزە الماي وتىرعان 1 424 اۋىل انىقتالعان. ارينە, ودان بەرى ءبىرشاما ۋاقىت ءوتتى. كورسەتكىش شامالى بولسا دا ازايعان بولار. كىم ءبىلسىن...
«ايتا-ايتا التايدى, جامال اپا قارتايدى» دەمەكشى, ەلدى مەكەندەردى ساپالى ينتەرنەتپەن قامتاماسىز ەتۋ جۇمىستارى جىل سايىن توقتاۋسىز جۇرگىزىلگەنىنە قاراماستان, كورسەتكىش كوڭىل كونشىتەر ەمەس. وڭىردە 2 G قۋاتىنداعى بايلانىسقا تەلمىرگەن 46 اۋىل بار. ال جاۋاپتى باسقارما باسشىسى وبلىس اۋماعىنداعى ەلدى مەكەندەردى 100 پايىز ساپالى عالامتورمەن قامتاسىز ەتۋ تەك 2027 جىلى مۇمكىن بولاتىنىن ايتىپ وتىر. سوعان قاراعاندا قاراشا حالىق تاعى دا ءۇش جىل شىداۋى كەرەك. تەك شىدامنىڭ شەگى ۇزىلمەسە بولعانى...
جامبىل وبلىسى