قالا ىشىندە جولاۋشىلار تاسىمالدايتىن اۆتوبۋس جۇرگىزۋشىسى باقىتجان قۇراقباەۆتىڭ تاڭ الاگەۋىمنەن باستالاتىن جۇمىسىن قيىنسىنعان كەزى جوق. باستاپقىدا جەكە كومپانيالاردا جۇمىس ىستەدى. كەيىننەن «قىزىلوردا اۆتوبۋس پاركى» جشس جۇرگىزۋشىسى اتاندى. كولىك تىزگىنىنە وتىرعاننان ءبارىن ۇمىتىپ, نازارىن جولعا سالادى. بۇل – كۇنىنە جۇزدەگەن ادام مىنگەن اۆتوبۋس جۇرگىزۋشىسىنىڭ بويىندا باياعىدان قالىپتاسقان ادەت.
سەگىز ءجۇز ادام جۇمىس ىستەيتىن مەكەمەدەگى تىرشىلىك تىم ەرتە باستالادى. جۇرگىزۋشىلەر تاڭ اتپاي اۋەلى مەديتسينالىق بايقاۋدان وتەدى, ارتىنشا بۇلاردىڭ دايىندىعىن مەحانيك باقىلايدى. تاڭعى ساعات التى جارىمدا اۆتوبۋستار ءتۇرلى تاراپقا جولعا شىعادى.
«قالاداعى ءار باعىتتىڭ وزىندىك ەرەكشەلىگى بار. مىسالى, مەن جۇرگىزەتىن №12 اۆتوبۋس جولىندا وقۋ ورىندارى, ساۋدا ۇيلەرى مەن بازارلار ءجيى ورنالاسقان. سوندىقتان دا سالوننىڭ بوس بولاتىن كەزى سيرەك, كەرىسىنشە سىيماي قالاتىندار كوپ. تاڭەرتەڭ جۇمىسقا, كەشكە ۇيگە اسىققانداردىڭ ءبارىن الا كەتۋگە تىرىسامىز. ءبىزدىڭ باعىتتاعى 1 اۆتوبۋس كۇنىنە 360 شاقىرىمنان استام جول ءجۇرىپ, 600–700 جولاۋشى تاسىمالدايدى. قانشا ادام بولسا, سونشا مىنەز بار. سونىڭ بارىنە قالتقىسىز قىزمەت كورسەتۋىمىز كەرەك», دەيدى ول.
وسى سالادا ۇزاق جىل تاجىريبە جيناعان مامان جەرگىلىكتى «بولاشاق» ۋنيۆەرسيتەتى مەن «اقمەشىت» ينستيتۋتىن بىتىرگەن. بىراق ماماندىعىنا سايكەس جۇمىس ىستەۋ بۇيىرماپتى. ءتىپتى ونى ىزدەمەدى دە, ۇيرەنگەن كاسىبىن جالعاستىرا بەردى. ويلاپ وتىرسا, وسى ۋاقىتقا دەيىن جارتى ميلليون شاقىرىمنان استام جول ءجۇرىپ, جۇزدەگەن مىڭ ادامدى تاسىمالداپتى. كوشەسىندە كولىگى قايشىلاسقان قالادا مۇنداي كاسىپپەن اينالىسۋ ايتۋعا عانا وڭاي, ارينە. سوندا دا مەكەمە قاقپاسىنان ەنىپ, ارىپتەستەرىنە جەتكەننەن-اق ءبارىن ۇمىتىپ سالا بەرەدى.
جولاۋشى رەتىندە ءوزىمىز دە قالا ىشىندەگى اۆتوبۋستار جۇمىسى بۇرىنعىمەن سالىستىرعاندا كوپ جاقسارعانىن بايقايمىز. دەگەنمەن سالاعا سىن ايتقىشتار ءالى دە بولسا تابىلادى. بىراق ولار دا جول ءجۇرۋ مادەنيەتىن, جولاۋشى جاۋاپكەرشىلىگىن سەزىنسە دەيسىڭ. كەيدە ايالدامادان مىنگەن كولىگىڭ ءسال ءجۇرىپ, قايتا توقتاپ جاتادى. ەسىگى اشىلعاننان تاعى بىرەۋدىڭ مىنەتىنىن ءبىلىپ, ايالداماعا جەتە الماي, امالى قۇرىعان قارت كىسىنىڭ نەمەسە ءجۇرۋى قيىن ناۋقاس جاننىڭ ەنەتىنىن كۇتىپ تۇرعانىڭدا قول-اياعى بالعاداي جاپ-جاس ءىنى-قارىنداستارىمىزدىڭ كەردەڭدەي باسىپ كىرگەنىن كورىپ, تالاي مارتە باس شايقاعانبىز. قازىر كوپ ادامنىڭ كوڭىلىنە سىيمايتىن وسىنداي كورىنىس ازايىپ كەلەدى.
«كەيدە اۆتوبۋسقا ادەيىلەپ جاناي ءجۇرىپ, ىعىستىرعىسى كەلەتىندەر بولادى. ودان بولەك, جۇزدەگەن ادام تيەگەن كولىك الدىنان اياقاستى اتىپ شىعاتىندار دا از ەمەس. وسىدان دا ەكى كوزىمىز جولدا بولادى. سوندايدا ايالداماسى جوق تۇستان قول كوتەرىپ تۇراتىندار «نەگە جان-جاقتارىڭا قارامايسىڭدار؟» دەپ كەيىپ جاتادى. ءتىپتى ەسىگىڭنىڭ الدىنان ءمىنىپ-تۇسكىسى كەلەتىندەر بار. ۇلكەندەر بولسا تۇسىنەر ەدىك, قارعا ادىم جەر جاياۋ جۇرگىسى كەلمەيتىن جاپ-جاس قىز-جىگىتتەردى بۇگىن تاربيەلەمەسەك, ەرتەڭ بارماق تىستەپ قالامىز. ستۋدەنت كەزىمىزدە تالاي مارتە قۇرىلىس ماتەريالدارىن ءتۇسىرىپ, اقشا تاپتىق. قازىرگىلەر وندايعا جولامايدى. كەيدە اۆتوبۋسقا ءتۇرلى قورعا اقشا جينايتىن جاستار مىنەدى. تەپسە تەمىر ۇزەتىن سولاردىڭ بولىمسىز تىرلىك سوڭىندا جۇرگەنىنە قارنىم اشادى. تالايىنا اقىل ايتىپ جىبەرەسىڭ, بىراق كوپ ۇزاماي قايتا اينالىپ كەلىپ تۇرعانىن كورەسىڭ. ءتۇرلى كاسىپورىن وسى كۇنى كوللەدجدەردە ءبىلىم الىپ جاتقان جاستارىمىزدى ديپلومى قولىنا تيىسىمەن جۇمىسقا الۋعا ءازىر. بىراق كەيىنگى تولقىننىڭ سوعان قۇلقى جوق. مەملەكەت باسشىسى باستاماشى بولعان «جۇمىسشى ماماندىقتار» جىلى وسىنداي ولقىلىقتاردى جويىپ, جۇمىسشى مارتەبەسىن كوتەرەدى دەپ ۇمىتتەنەمىز», دەيدى كەيىپكەرىمىز.
جولى ءتۇسىپ, باسقا وبلىس ورتالىعىنا ساپارلاي قالسا, ەڭ الدىمەن ونداعى جولاۋشىلار تاسىمالىنا نازار اۋداراتىنى بار. الماتى مەن استانادا بۇل جاعى جاقسى جولعا قويىلعان. قاراعاندى, جەزقازعاندا دا جاڭا كولىكتەر جۇيتكىپ ءجۇر. قىزىلورداداعى اۆتوبۋس پاركىنىڭ قازىرگى جاعدايىن بۇرىنعىمەن سالىستىرا المايسىز. تەحنيكا جاڭاردى, جالاقى ءوستى. وسىدان ونشاقتى جىل بۇرىن سىقىرلاعان ەسكى كولىكپەن جۇرەتىن قىزىلوردالىقتار قازىر جازدا سالقىن, قىستا جىلى اۆتوبۋستارمەن قاتىنايدى.
ونى قۇلانيەكتەنىپ اتقان تاڭمەن تالاسىپ, جۇمىسىنا اسىقتىراتىن قۇدىرەت – ەلدىڭ سەنىمى مەن جاۋاپكەرشىلىك. ءار ايالدامادا جولىن توسقان جانداردى دىتتەگەن جەرىنە جەتكىزىپ, جولاۋشىنىڭ اماندىعىنا الاڭدايتىن اۆتوبۋس جۇرگىزۋشىسى ءاردايىم ەل العىسىن تىنىس-تىرلىگىنە ارقاۋ ەتىپ كەلەدى.
قىزىلوردا