ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ 90 جىلدىق مەرەيتويىنا وراي جاتاقحانا قۇرىلىسى باستالىپ, بولاشاق ۇرپاققا جولداۋ جازىلعان كاپسۋلا ستۋدەنتتەرگە ارنالعان عيماراتتىڭ ىرگەتاسىنا قالاندى.
جاتاقحانا «قارجى ورتالىعى» اق جانە عىلىم جانە جوعارى ءبىلىم مينيسترلىگىنىڭ قولداۋىمەن جۇزەگە اسىپ جاتقان «بەس الەۋمەتتىك باستاما» مەملەكەتتىك باعدارلاماسى نەگىزىندە قولعا الىنىپ وتىر. جوبانى «Forum Invest» جانە «EPC Stroy Group» قۇرىلىس كومپانياسى قارجىلاندىرادى.
ق.ساتباەۆ ۋنيۆەرسيتەتى قۇرىلىس دەپارتامەنتىنىڭ ديرەكتورى ريشات تىنىبەكوۆتىڭ ايتۋىنشا, 9 قاباتتى جاتاقحانا 955 ورىنعا ارنالعان. زاماناۋي عيماراتتا جاستار ءۇشىن جاعدايدىڭ بارلىعى قاراستىرىلادى.
«EPC Stroy Group» كومپانياسىنىڭ باسشىسى ەرلان قوجىقوۆ كومپانيانىڭ ق.ساتباەۆ ۋنيۆەرسيتەتىمەن ارىپتەستىگىن قۇپتاي وتىرىپ, «ەلىمىزدەگى جاستاردىڭ ساپالى ءبىلىم الۋىنا قولايلى جاعداي جاساۋ ءۇشىن ينۆەستيتسيا سالۋعا دايىنبىز. قۇرىلىس بارىسىندا ەكولوگيالىق تازا جانە ەنەرگيانى ۇنەمدەيتىن ماتەريالدار قولدانىلاتىن بولادى. سەيسميكالىق نورمالاردى ساقتاي وتىرىپ, جاڭا عيماراتتى 2026 جىلدىڭ اقپان ايىندا پايدالانۋعا بەرۋدى جوسپارلاپ وتىرمىز», دەدى ول.
ءىس-شاراعا ۋنيۆەرسيتەت قامقورشىلىق كەڭەسىنىڭ توراعاسى, پروفەسسور ۇلىقپان سىدىقوۆ, وقۋ ورنىنداعى اقساقالدار كەڭەسى مەن رەكتورلار كەڭەسىنەن پروفەسسور ابدىعاپپار ءاشىموۆ, الماتى قالاسى اكىمدىگىنىڭ جاستار ساياساتى ءبولىمىنىڭ مەڭگەرۋشىسى ازيز قاجدەنبەك, «قارجى ورتالىعى» اق الماتى قالاسىنداعى وكىلدىگىنىڭ ديرەكتورى ۇلان وتەباەۆ, «EPC Stroy Group» كومپانياسىنان دينارا بايىمبەتوۆا, وقىتۋشىلار مەن ستۋدەنتتەر قاتىستى.
يننوۆاتسيالىق جانە تەحنيكالىق ءبىلىم بەرۋدەگى جەتەكشى وقۋ ورنى رەتىندە دامىپ كەلە جاتقان ق.ساتباەۆ اتىنداعى قازۇتزۋ ستۋدەنتتەرگە جايلى جاتاقحانامەن قاتار زاماناۋي زەرتحانالاردى جابدىقتاۋ ىسىندە دە ىلكىمدى جوبالاردى جۇزەگە اسىرىپ جاتىر.
الماتى