مەملەكەت باسشىسى ءبىرشاما ۋاقىت بۇرىن ەلىمىزدە شەتەلدىك بەدەلدى وقۋ ورىندارىنىڭ وكىلدىگىن اشۋ تۋرالى تاپسىرما بەرگەنى بارشاعا بەلگىلى. پرەزيدەنت باستاماسىن ىسكە اسىرۋ ماقساتىندا م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ باسشىلىعى ءبىر جىلدان استام ۋاقىت بۇرىن د.مەندەلەەۆ اتىنداعى رەسەي حيميا-تەحنولوگيا ۋنيۆەرسيتەتىنىڭ ماماندارىمەن ارىپتەستىكتىڭ نەگىزىن قالادى.
تارازدا د.مەندەلەەۆ اتىنداعى رەسەي حيميا-تەحنولوگيا ۋنيۆەرسيتەتىنىڭ فيليالىن اشۋدىڭ ماڭىزى زور. ويتكەنى وڭىردەگى ەڭ ءىرى ءوندىرىس وشاعى سانالاتىن «قازفوسفات» جشس-دا 8 مىڭعا جۋىق مامان ەڭبەك ەتەدى. حيميا ونەركاسىبىنىڭ لوكوموتيۆىنە اينالعان سەرىكتەستىك جىل سايىن جاڭا ماماندارمەن تولىعىپ وتىرادى. بۇل ءوز كەزەگىندە سالادا جاڭا بۋىننىڭ قالىپتاسۋىنا سەپتىگىن تيگىزەدى.
ءبىر جىلدان استام ۋاقىت بۇرىن باستالعان باياندى باستاما مارەسىنە جەتكەن سەكىلدى. م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ بازاسىندا د.مەندەلەەۆ اتىنداعى رەسەي حيميا-تەحنولوگيا ۋنيۆەرسيتەتى فيليالىنىڭ سالتاناتتى اشىلۋ ءراسىمى ۇيىمداستىرىلدى.
ءىس-شاراعا ءوڭىر باسشىسى ەربول قاراشوكەەۆ, عىلىم جانە جوعارى ءبىلىم ۆيتسە-ءمينيستى تالعات ەشەنقۇلوۆ, «قازفوسفات» جشس باس ديرەكتورى ەۆگەني پاك, د.مەندەلەەۆ اتىنداعى رحتۋ رەكتورىنىڭ مىندەتىن اتقارۋشى ەۆگەني رۋميانتسەۆ ارنايى قاتىستى.
«مەملەكەت باسشىسى ءبىلىم سالاسىنا قاراستى كوزقاراستى وزگەرتۋ قاجەت ەكەنىن, اسىرەسە تەحنيكالىق ماماندىقتارعا باسىمدىق بەرۋ كەرەكتىگىن شەگەلەپ تاپسىرعانى بارشامىزعا ءمالىم. سول ءۇشىن دە وڭىردە وسىنداي يگى باستاما قولعا الىنىپ جاتىر. بىزگە ينجەنەر مەن ونەركاسىپ سالاسى ماماندارىنىڭ جاڭا بۋىنىن قالىپتاستىرۋ كەرەك. بۇل راسىندا دا كەزەك كۇتتىرمەيتىن جۇمىس.
جامبىل ءوڭىرى – حيميا ونەركاسىبىنىڭ وتانى. ءوندىرىسى وركەندەگەن وڭىردەگى ءىرى زاۋىتتار سالانىڭ ايناسىنا اينالعانى انىق. وبلىس ورتالىعى تاراز قالاسىندا ىرگەلى جوعارى وقۋ ورنى فيليالىنىڭ اشىلۋى – حيميا يندۋسترياسىن ودان ءارى دامىتۋداعى ماڭىزدى قادامنىڭ ءبىرى. سوندىقتان دا باستاما باياندى بولسىن دەيمىن. بۇل جەردەن مىقتى ماماندار شىعادى دەگەن سەنىم زور», دەدى ءوڭىر باسشىسى ەربول قاراشوكەەۆ.
پرەزيدەنت تاپسىرماسىن جۇزەگە اسىرۋ ماقساتىندا ىلگەرىدە م.ح.دۋلاتي اتىنداعى تاراز وڭىرلىك ۋنيۆەرسيتەتى, «قازفوسفات» جشس جانە د.مەندەلەەۆ اتىنداعى رەسەي حيميا تەحنولوگيا ۋنيۆەرسيتەتىنىڭ ۇجىمى ۇشجاقتى كەلىسىمگە قول قويىپ, تمد ەلدەرى اراسىندا العاش رەت حيميا ونەركاسىبى سالاسىنداعى جەلىلىك كامپۋستىڭ تۇساۋكەسەرىن ۇيىمداستىردى. كەيىننەن «مەندەلەەۆ سىنىبى» جوباسىن ىسكە اسىردى. ءبىر سوزبەن ايتقاندا, فيليالدىڭ اشىلۋىنا دەيىن م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ باسشىلارى از جۇمىس اتقارعان جوق.
ءىس-شارا بارىسىندا ءسوز العان ۆيتسە-مينيستر تالعات ەشەنقۇلوۆ عىلىم جانە جوعارى ءبىلىم ءمينيسترى ساياسات نۇربەكتىڭ قۇتتىقتاۋىن جەتكىزدى. ال «قازفوسفات» جشس باس ديرەكتورى ەۆگەني پاك بۇل جوبانىڭ ىرگەلى كاسىپورىن ءۇشىن دە ماڭىزى زور ەكەنىن اتاپ ءوتتى.
دەرەككە سەنسەك, جاڭا وقۋ جىلىنان باستاپ رەسمي تۇردە ىسكە كىرىسكەن رحتۋ فيليالىندا العاشقى توپ قۇرىلعان. بۇل توپتا ءوڭىردىڭ 30 ستۋدەنتى «بەيورگانيكالىق زاتتاردىڭ حيميالىق تەحنولوگياسى» ماماندىعى بويىنشا بىلىكتى مامانداردان ءدارىس الىپ ءجۇر.
فيليال عيماراتىندا 4 زەرتحانا, 2 كومپيۋتەرلىك سىنىپ, ءماجىلىس زالى جانە ارنايى اۋديتوريا بار. ءبىلىم بەرۋ نىسانىنىڭ كۇردەلى جوندەۋ جۇمىستارىنا جانە ارنايى جابدىقتاردى جەتكىزۋگە «قازفوسفات» جشس قاراجات قاراستىرعان.
جوعارىدا ايتقانىمىزداي, وتكەن جىلدىڭ مامىر ايىندا جۇزەگە اسىرىلعان جەلىلىك كامپۋس جوباسىنىڭ نەگىزىندە «2+1+1» ءبىلىم بەرۋ باعدارلاماسى ىسكە قوسىلعان بولاتىن. ناتيجەسىندە, بولاشاق حيميك-تەحنولوگتەر العاشقى ەكى كۋرستى م.ح.دۋلاتي اتىنداعى تاراز وڭىرلىك ۋنيۆەرسيتەتىندە وقىسا, ءۇشىنشى كۋرستان باستاپ رحتۋ-دە ءبىلىم الادى. ال ءتورتىنشى كۋرستى تارازدا جالعاستىرىپ, «قازفوسفات» جشس-دا تاجىريبەسىن تولىستىرادى. سونداي-اق وڭىردەگى مەكتەپتەردە جاراتىلىستانۋ عىلىمي تسيكل پاندەرىن تەرەڭدەتىپ وقىتۋ جۇيەسىن قالىپتاستىرۋ ءۇشىن «مەندەلەەۆ سىنىبى» جوباسى جالعاسادى.
جامبىل وبلىسى