شىن تۇلعا – قوعام تاربيەشىسى, ەل تۇتقاسى. ادامشىلىق پارىزى ءۇشىن قىزمەت قىلعان مۇنداي ۇلت پەرزەنتتەرى قاشاندا ەل جادىندا. سولاردىڭ ءبىرى – ابايتانۋشى عالىم, فيلولوگيا عىلىمدارىنىڭ كانديداتى, دوتسەنت, ۇزاق جىلدار استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى بولىپ ەڭبەك ەتكەن قىدىربەك قورعانبەك ۇلى.
ءازىربايجان مامبەتوۆ اتىنداعى مەملەكەتتىك دراما جانە كومەديا تەاترىندا ابايتانۋشى عالىم, فيلولوگيا عىلىمدارىنىڭ كانديداتى, دوتسەنت قىدىربەك قورعانبەك ۇلىنا ارنالعان «قالدىرعانىم» اتتى ەسكە الۋ كەشى ءوتتى. تاربيە تۇنىعىنا سۋارىلعان كەشتە رۋحانيات حاقىنداعى وي-تولعامدار, قوعامداعى اكەنىڭ ورنى مەن وتباسى ءرولى, بەلگىلى عالىم تۋرالى پىكىرلەر ايتىلدى. جيىندا كورنەكتى اقىن, دراماتۋرگ, قوعام قايراتكەرى نۇرلان ورازالين كەلگەن جۇرتقا العىس ايتىپ, جىلى لەبىزىن ءبىلدىردى.
– قىدىربەك قورعانبەك ۇلى اۋەلى ادەبيەتتى تاڭدادى, اقىندىقتى يگەردى, ايتىسقا ءتۇسىپ, مەكتەپ جاسىنان تىلگە, ادەبيەتكە سەرگەك قارايتىن نامىسشىل وقۋشىلاردىڭ ءبىرى بولدى. وسە كەلە, «اللانىڭ ءوزى دە راس, ءسوزى دە راس» دەگەن ابايدىڭ ادامتانۋ, ءدىنتانۋ كەڭىستىگىنە بويلاپ, يسلامنىڭ قۇدىرەتىن, ادامزات تاريحىنداعى ورنى جونىندەگى دايەكتى پىكىرلەرىن جازىپ ءجۇرىپ, ونى عىلىمي تاقىرىپقا اينالدىرىپ, ديسسەرتاتسيا قورعاپ شىقتى. ابايدىڭ, ادامزاتتىڭ جان دۇنيەسىن عالامدىق جاراتىلىستاعى تۇعىرىن اشۋدا ابايدىڭ قاراسوزدەرى مەن قۇراندى, حاكىم پوەزياسى مەن پايعامبارىمىزدىڭ حاديستەرىن شەندەستىرە وتىرىپ زەرتتەپ ءوزىنىڭ ابايتانۋ الەمىن جاسادى,– دەدى نۇرلان مىرقاسىم ۇلى.
سونىمەن قاتار اقىن, «تۇركىستان» گازەتىنىڭ باس رەداكتورى باۋىرجان باباجان ۇلى ستۋدەنتتىك شاقتان تانىعان قالامگەر تۋرالى ويىمەن ءبولىستى.
– قىدىربەكپەن قازمۋ-دىڭ فيلولوگيا فاكۋلتەتىندە ءبىر توپتا وقىدىق. توپتىڭ ستاروستاسى ەدى. ۇنەمى جىميىپ جۇرەتىن ۇزىن بويلى, كوركەم مىنەزدى سارى جىگىت كەز كەلگەن اداممەن تەز ءتىل تابىساتىن. جيىن-تويلاردا ۇكىلى ىبىرايدىڭ «قالدىرعانىن» ناقىشىنا كەلتىرىپ ورىنداۋشى ەدى. ماعان ءالى كۇنگە دەيىن «قالدىرعاندى» ءدال ول سەكىلدى ەشكىم ايتا المايتىن سەكىلدى كورىنەدى, – دەدى اقىن.
كەشتە قىدىربەك قورعانبەك ۇلىنىڭ ءومىر جولى تۋرالى دەرەكتى فيلم كورسەتىلىپ, كەلگەن كوپشىلىك قاۋىم ونەگەلى عۇمىر يەسىن تەرەڭىرەك تاني ءتۇستى.