بىرەر جىل بۇرىن وڭىردە اپاتتى جاعدايداعى جانە ءۇش اۋىسىمدا وقيتىن بىرنەشە ءبىلىم وشاعى بار بولاتىن. مەملەكەت باسشىسىنىڭ تاپسىرماسىنا سايكەس ەكى جىل بۇرىن قولعا الىنعان «جايلى مەكتەپ» ۇلتتىق جوباسى اياسىندا سوڭعى ۋاقىتتا وڭىردە بىرنەشە ءبىلىم ۇياسى بوي كوتەردى. ناتيجەسىندە, ماسەلەسى ۋشىققان ءبىلىم وردالارىنىڭ سانى ايتارلىقتاي ازايدى.
«جايلى مەكتەپ» ۇلتتىق جوباسى اياسىندا ەكى جىل ىشىندە وڭىردە بىرنەشە جاڭا مەكتەپ بوي كوتەرۋگە ءتيىس بولسا, ونىڭ ۇشەۋى بۇگىنگى كۇنگە دەيىن پايدالانۋعا بەرىلگەنىن ايتپاي كەتۋگە بولماس. جاڭا وقۋ جىلى باستالعان كەزدە بايزاق اۋدانىنىڭ ورتالىعى سارىكەمەر اۋلىندا 600 وقۋشىعا ارنالعان سۋ جاڭا ءبىلىم ورداسى ءبىلىم الۋشىلارعا ەسىگىن ايقارا اشسا, ءبىر اي بۇرىن وبلىس ورتالىعى تاراز قالاسىندا 1200 بالاعا شاقتالعان №66 مەكتەپ وقۋشىلاردى قابىلدادى.
كۇنى كەشە ەلىمىزدەگى ەڭ ءىرى شاعىن اۋدان سانالاتىن « ۇلى دالا» شاعىن اۋدانىنداعى №67 مەكتەپ بالالار يگىلىگى ءۇشىن پايدالانۋعا بەرىلدى. جەرگىلىكتى اتقارۋشى بيلىك وكىلدەرى كەلتىرگەن دەرەككە سەنسەك, ءبىلىم وشاعى 1200 وقۋشىعا ارنالعان ەكەن.
«عىلىم مەن ءىلىمنىڭ قاينار بۇلاعى مەكتەپتە العان بىلىمنەن باستاۋ السا كەرەك. سول ءۇشىن دە مەملەكەت ءبىلىم سالاسىنا ايرىقشا نازار اۋدارىپ, قامقورلىق كورسەتىپ وتىر. كەلەشەگىن ويلاعان كەز كەلگەن مەملەكەت ينۆەستيتسيانى ءبىرىنشى كەزەكتە ءبىلىم سالاسىنا سالاتىنى بەلگىلى. بولاشاق ۇرپاقتىڭ سانالى, ءبىلىمدى بولىپ ءوسۋى ءۇشىن ءبارىمىز جاۋاپتىمىز.
مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «جايلى مەكتەپ» ۇلتتىق جوباسى اياسىندا وڭىرىمىزدە بىرنەشە ءبىلىم وشاعى بوي كوتەرگەنىن اتاپ وتكەن ءجون. بۇگىن مىنە, زاماناۋي ۇلگىدە جابدىقتالعان تاعى ءبىر ءبىلىم وشاعى وقۋشىلارعا ەسىگىن ايقارا اشتى. بۇعان دەيىن ىرگەدەگى بايزاق اۋدانىنا قاراستى سارىكەمەر اۋلىندا, تاراز قالاسىنداعى «بايتەرەك» شاعىن اۋدانىندا ءدال وسىنداي ءبىلىم بەرۋ نىساندارى بوي كوتەرگەن بولاتىن. بۇل جۇمىستىڭ ءبارى مەملەكەت باسشىسىنىڭ قولداۋىنىڭ ارقاسىندا ىسكە اسىپ جاتقانىن ايتا كەتكەن ءلازىم. جالپى العاندا, وڭىردە ءبىلىم سالاسىنا قولدان كەلگەنشە قولداۋ كورسەتىلە بەرمەك», دەدى ءوڭىر باسشىسى ەربول قاراشوكەەۆ جاڭا مەكتەپتىڭ اشىلۋ سالتاناتىندا سويلەگەن سوزىندە.
وبلىس اكىمدىگىنىڭ ءباسپاسوز قىزمەتى كەلتىرگەن دەرەككە سۇيەنسەك, ءبىلىم بەرۋ نىسانىنىڭ سالىنۋىنا, قۇرىلىس جۇمىسىنىڭ تالاپقا ساي ساپالى جۇرگىزىلۋىنە «سامۇرىق-قازىنا» اكتسيونەرلىك قوعامى مەن «Integra Construction kz» جشس مۇرىندىق بولىپتى.
«بۇگىن « ۇلى دالا» شاعىن اۋدانىندا مەرەيلى كۇن دەسەك تە بولادى. تۇرعىنداردىڭ قۋانىشىندا شەك جوق. ءدال وسى «جايلى مەكتەپتى» العاشقى ىرگەتاسى قالانعان كۇننەن باستاپ باقىلاپ وتىردىق. جاۋاپتى ازاماتتاردىڭ قۇرىلىس ساپاسىنا ايرىقشا نازار اۋدارعانى كوڭىل قۋانتادى. ءتورت نەمەرەم سۋ جاڭا ءبىلىم ورداسىنىڭ تابالدىرىعىن اتتاپ وتىر. وقۋشىلارعا بارلىق جاعداي قاراستىرىلعانىن ايتپاسقا بولماس. جەرگىلىكتى تۇرعىنداردىڭ وتىنىشىنە قۇلاق اسقان بيلىك باسىنداعى ازاماتتارعا ايتار العىسىمىز شەكسىز. جاڭا مەكتەپتە ءبىلىم العان بالالار ۇلكەن ازامات بولىپ ءوسىپ شىقسىن», دەيدى « ۇلى دالا» شاعىن اۋدانىنىڭ تۇرعىنى, زەينەتكەر الماش اۋعانباەۆا.
جاۋاپتى مامانداردىڭ ايتۋىنشا, جاڭا ءبىلىم ورداسى شەتەلدىك وزىق تەحنولوگيامەن جابدىقتالعان. مۇندا وقۋشىلاردىڭ قاۋىپسىز ورتادا ءبىلىم الۋىنا بارلىق مۇمكىندىك قاراستىرىلعان. مەكتەپتە بىلىكتى پەداگوگ ماماندار ساباق بەرەدى.
دەرەككە سەنسەك, جاڭا عيماراتتا ينتەراكتيۆتى تاقتاسى بار 59 وقۋ كابينەتى, 3 اسحانا, 2 سپورت زال, ءماجىلىس زالى, كىتاپحانا, 2 لينگافون, 2 كومپيۋتەر كابينەتى بار. سونىمەن قاتار 3 شەبەرحانا, 3 زەرتحانا, 10 كوۆوركينگ-ورتالىق قاراستىرىلىپتى.
جالپى العاندا, جامبىل وبلىسىندا «جايلى مەكتەپ» ۇلتتىق جوباسى اياسىندا 12 مەكتەپ سالۋ جوسپارلانعان. جاڭا ءبىلىم وشاقتارىن سالۋ ارقىلى الداعى جىلدارى ءۇش اۋىسىمدى وقىتۋدى, وقۋشى ورنىنىڭ تاپشىلىعىن جانە اپاتتى مەكتەپتەردى جويۋ كوزدەلىپ وتىر. وسى جىلى ءوڭىر بويىنشا قۇرىلىسى باستالعان 36 ءبىلىم بەرۋ نىسانىنىڭ 10-ى پايدالانۋعا بەرىلگەن. جىل اياعىنا دەيىن تاعى 5 مەكتەپتىڭ قۇرىلىس جۇمىسى اياقتالادى. ال الداعى جىلى 26 ءبىلىم وشاعىنىڭ قۇرىلىس جۇمىسى باستالادى.
جامبىل وبلىسى