ق.ساتباەۆ ۋنيۆەرسيتەتى, «جاسىل ەكونوميكا جانە G-Global-دى دامىتۋ كواليتسياسى», «Coca-Cola İçecek Kazakhstan» كومپانياسى ءوزارا ىنتىماقتاستىق تۋرالى مەموراندۋمعا قول قويدى. مەموراندۋم پلاستيكالىق قالدىقتاردى جيناۋ مەن قايتا وڭدەۋ جوبالارى ارقىلى ونىڭ تيىمدىلىگىن ارتتىرۋدى كوزدەيدى.
ءىس-شاراعا ۋنيۆەرسيتەتتىڭ عىلىم جانە كورپوراتيۆتىك دامۋ جونىندەگى پرورەكتورى ەرجان كولدەەۆ, «Coca-Cola İçecek Kazakhstan» كومپانياسىنىڭ كوممۋنيكاتسيالار جانە تۇراقتى دامۋ جونىندەگى باسشىسى الينا ابيلەۆا, سونداي-اق «جاسىل ەكونوميكا جانە G-Global-دى دامىتۋ كواليتسياسىنىڭ» باس مەنەدجەرى اسىل وقاپوۆا قاتىسىپ, قورشاعان ورتانى قالدىقتاردان تازارتۋ, پلاستيك بۇيىمداردى قايتا وڭدەۋ ارقىلى ەكولوگيانى قورعاۋ شارالارىنا قاتىستى ماسەلەلەردى قوزعادى.
«ۋنيۆەرسيتەتتىڭ 90 جىلدىعى مەن قانىش ساتباەۆتىڭ تۋعانىنا 125 جىل تولۋىنا وراي ۋنيۆەرسيتەت ستۋدەنتتەرى قوعامعا ماڭىزدى ءىس-شارالارعا قاتىسىپ, قورشاعان ورتانى قورعاۋ مەن «جاسىل» ەكونوميكانى دامىتۋعا ۇلەس قوسىپ جاتقانىن اتاپ وتكىمىز كەلەدى. ال پلاستيك قالدىقتاردى قايتا وڭدەۋ باستاماسىن ۋنيۆەرسيتەت ستۋدەنتتەرى ءبىرىنشى بولىپ قولعا الىپ وتىر», دەدى ەرجان كولدەەۆ.
باستاما اياسىندا پلاستيكتى قايتا وڭدەۋ جانە ودان جاڭا ءونىم جاساۋ جونىنەن شەبەرلىك ساعاتى ءوتتى. «3.2.1.ستارت!» جەڭىمپازى جانە پلاستيكتى قايتا وڭدەيتىن «Rocket Plastic» جوباسىنىڭ جەتەكشىسى دانيار باكيموۆ ۋنيۆەرسيتەت ستۋدەنتتەرىمەن بىرلەسە وتىرىپ, قالدىقتاردان جاڭا ءونىم جاساۋ ادىستەرىن كورسەتتى. وسى جىلى «Rocket Plastic» جوباسى اياسىندا 20 توننادان استام پلاستيك قايتا وڭدەلگەن.
بيىل «3.2.1.ستارت!» جوباسىنىڭ 8-ماۋسىمى بارىسىندا وتكەن «پلاستيكتى جيناۋ جانە قايتا وڭدەۋ جونىندەگى ۇزدىك مودەل» رەسپۋبليكالىق بايقاۋىندا ق.ساتباەۆ ۋنيۆەرسيتەتى 1-ورىندى يەلەنگەن بولاتىن. بىلتىر بۇل جوباعا 10-نان اسا جوعارى وقۋ ورنىنىڭ ستۋدەنتتەرى قاتىسىپ, 17 توننادان استام پلاستيك قالدىقتاردى جينادى. ق.ساتباەۆ ۋنيۆەرسيتەتىنىڭ كومانداسى 7,7 توننا قالدىق جيناپ, پلاستيكتى قايتا وڭدەۋدىڭ ەڭ ۇزدىك مودەلىنە قول جەتكىزگەن-ءدى.
مەموراندۋمعا قول قويۋ ناتيجەسىندە ىنتىماقتاستىقتى ودان ءارى كەڭەيتۋ, وقىتۋ سەمينارلارىن, فورۋمدار, ءباسپاسوز كونفەرەنتسيالارىن وتكىزۋ جوسپارلانىپ, جاستاردىڭ «3.2.1 ستارت!» باستامالارىن قولداۋعا بايلانىستى تىڭ يدەيالاردى بىرلەسىپ جۇزەگە اسىرۋدىڭ ماڭىزى تۋرالى ايتىلدى. بۇل كەلىسىم ۋنيۆەرسيتەت ستۋدەنتتەرى ىسكە اسىرىپ وتىرعان قالدىقتاردى قايتا وڭدەۋ باستامالارىن ءارى قاراي جالعاستىرۋ مەن تيىمدىلىگىن ارتتىرۋعا ىقپال ەتەتىن بولادى.
الماتى