ءتور قالانى دۋمانعا بولەگەن «تەاتر اll» III حالىقارالىق تەاتر فەستيۆالى ءوز مارەسىنە جەتتى. استانا قالاسى اكىمدىگى جانە مادەنيەت باسقارماسىنىڭ قولداۋىمەن بيىل ءۇشىنشى مارتە ۇيىمداستىرىلىپ جاتقان ءداستۇرلى ونەر مەرەكەسى اباي اتىنداعى مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, جازۋشى-دراماتۋرگ روزا مۇقانوۆانىڭ دراماتۋرگياسىنا ارنالدى.
ەلىمىزدىڭ تۇكپىر-تۇكپىرىنەن جينالعان بەلدى ۇجىمدار مەن قىرعىزستان, ازەربايجاننان كەلگەن ارتىستەر جەتى كۇن قاتارىنان جانىن سالا ونەر كورسەتتى. ال ولاردىڭ قارىم-قابىلەتىن كوزىقاراقتى كورەرمەنمەن بىرگە ءاليا بوپەجانوۆا, جانىش قۇلمامبەتوۆ (قىرعىز رەسپۋبليكاسى), امانگەلدى مۇقان, انار ەركەباي سىندى بەلگىلى تەاتر ماماندارى باعالادى.
«تۇركى دۇنيەسى مەن مادەني كەڭىستىگىندە دە روزا مۇقانوۆا تۋىندىلارىنىڭ شوقتىعى بيىك. «ماڭگىلىك بالا بەينە», «ساررا», «بوپاي حانىم» دەپ جالعاسىپ كەتە بەرەتىن كوركەمدىك دەڭگەيى جوعارى قويىلىمداردىڭ بارلىعى دا بۇگىندە رۋحاني قۇندىلىعىمىزدى دارىپتەيتىن ومىرشەڭ تۋىندىلارعا اينالدى. وسى جولى جاڭا ەسىمدەردى اشقىمىز كەلدى, اسىرەسە رەجيسسۋرانىڭ اياق الىسىنا باعا بەرۋدى مۇرات تۇتتىق. كورەرمەنگە شىنايى تەاتر اتموسفەراسىن سىيلاعان فەستيۆالدىڭ جەمىستى دە تابىستى ءبىر اپتاسى ەلىمىزدىڭ مادەني كەڭىستىگىندە ەرەكشە وقيعاعا اينالدى دەپ ويلايمىن», دەدى جوبا ۇيىمداستىرۋشىسى, مۋزىكالىق جاس كورەرمەن تەاترىنىڭ ديرەكتورى اسحات ماەميروۆ.
فەستيۆالدىڭ اشىلۋ سالتاناتى الدىندا ارتىستەر مەن قاتىسۋشىلار قىزىل كىلەممەن ءجۇرىپ ءوتتى. ال مۇحتار اۋەزوۆ اتىنداعى قازاق ۇلتتىق دراما تەاترى اكەلگەن رەجيسسەر بولات اتاباەۆتىڭ جيىرما جىلدان بەرى ساحنادان تۇسپەي كەلە جاتقان «ماڭگىلىك بالا بەينە» سپەكتاكلى كوپشىلىكتىڭ قوشەمەتىنە بولەندى. جالپى, اۆتوردىڭ دا دراماتۋرگياعا سارا جولى اتالعان قارا شاڭىراقتا تەاتر كەمەڭگەرى مارقۇم بولات اتاباەۆتىڭ اق باتاسىمەن باستالعان بولاتىن.
«مەن ءۇشىن جازۋ – ءمىناجات. جازۋ ويدى بۇزبايدى, جاندى كىرلەتپەيدى. جازۋ جالعان سويلەتپەيدى. وسىنداي قاسيەت بار قالامدا. وتىزعا دا تولماعان شاعىمدا «ماڭگىلىك بالا بەينە» دەگەن پەسامدى قارا شاڭىراق مۇحتار اۋەزوۆ اتىنداعى قازاق دراما تەاترىنىڭ رەفورماتور رەجيسسەرى مارقۇم بولات اتاباەۆ ساحناعا شىعاردى. ال ول ۋاقىتتا م.اۋەزوۆ تەاترىندا تەك قانا كلاسسيكتەر قويىلاتىن. ۇلىلاردىڭ ۇلاعاتى ءارى جاۋاپكەرشىلىك بولار, سول ساتتەن باستاپ ءومىر بويى جازۋعا ادال بولۋعا ۇمتىلدىم. سونىڭ ناتيجەسىندە ەلىمىزدىڭ رەجيسسەرلەرى عانا ەمەس, باۋىرلاس قىرعىز ەلى مەن ازەربايجاندىق سۋرەتكەرلەر دە شىعارماشىلىعىما قىزىعۋشىلىق تانىتىپ, مەرەيتويىما تاماشا قويىلىمدارىن الىپ كەلىپ قۋانتتى», دەدى روزا مۇقانوۆا.
بيىلعى فەستيۆالعا قوناق رەتىندە قاتىسقان اكەمتەاتر ۇجىمىنان باسقا, استانا تورىندە الىس-جاقىننان كەلگەن ا.توقپانوۆ اتىنداعى جامبىل وبلىستىق قازاق دراما تەاترى «ماڭگىلىك بالا بەينە», ق.قۋانىشباەۆ اتىنداعى قازاق ۇلتتىق مۋزىكالىق دراما تەاترى «بوپاي حانىم», استانا قالاسى اكىمدىگىنىڭ قۋىرشاق تەاترى «ماڭگىلىك بالا بەينە», س.سەيفۋللين اتىنداعى قاراعاندى وبلىستىق دراما تەاترى «ەشكىم دە كىنالى ەمەس», تۇركىستان مۋزىكالىق دراما تەاترى «فاريزا», قىرعىز رەسپۋبليكاسى بىشكەك قالاسىنان كەلگەن جامال سەيداكماتوۆا اتىنداعى «تۋنگۋچ» جاستار تەاترى «جەسىر» جانە ازەربايجاندىق تەاتر ۇجىمى «شاتىر استىنداعى مەن» قويىلىمدارىن تەاتر سىنشىلارى مەن كورەرمەن سارابىنا ۇسىندى. ناتيجەسىندە, تۇركىستان مۋزىكالىق دراما تەاترىنىڭ رەجيسسەرى فارحاد مولداعالي قويعان «فاريزا» دراماسى «ۇزدىك قويىلىم» دەپ تانىلدى. «ۇزدىك رەجيسسۋرا» اتالىمىنداعى جۇلدەنى «جەسىر» قويىلىمى ءۇشىن جامال سەيداكماتوۆا اتىنداعى «تۋنگۋچ» جاستار تەاترىنىڭ رەجيسسەرى ارنيس كىدىرمىشەۆ ەنشىلەسە, «ۇزدىك اكتەرلىك انسامبل» اتالىمىنداعى ماراپاتتى استانا قالاسى اكىمدىگىنىڭ مۋزىكالىق جاس كورەرمەن تەاترى ابزالبەك ماكسيم رەجيسسۋراسىندا ۇسىنىلعان «قىز جىلاعان» دراماسى ءۇشىن الدى. «ۇزدىك ەر ادام بەينەسى» جۇلدەسى – «شاتىر استىنداعى مەن» سپەكتاكلىندەگى انتي شرەك ءرولى ءۇشىن ازەربايجان رەسپۋبليكاسى گازاح مەملەكەتتىك دراما تەاترىنىڭ اكتەرى حازار گياندجاليعا, «ۇزدىك ايەل بەينەسى» اتالىمىنداعى سىيلىق – «بوپاي حانىم» تاريحي دراماسىنداعى بوپاي ءرولى ءۇشىن ق.قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ اكتريساسى لەيلو بەكنازار مەن C.سەيفۋللين اتىنداعى قاراعاندى وبلىستىق قازاق دراما تەاترىنىڭ «ەشكىم دە كىنالى ەمەس» سپەكتاكلىندەگى اسىل ءرولى ءۇشىن دينا زايتوۆاعا تابىس ەتىلدى. سونىمەن قاتار «ساحنالىق جاڭا فورما تابۋداعى ىزدەنىستەرى ءۇشىن» «ماڭگىلىك بالا بەينە» سپەكتاكلىمەن (رەجيسسەرى – ءا.وسپانباەۆا) ا.توقپانوۆ اتىنداعى جامبىل وبلىستىق قازاق دراما تەاترى ماراپاتتالدى. ال «ەكىنشى پلانداعى ۇزدىك ەر ادام بەينەسى» جۇلدەسىن استانا قالاسى اكىمدىگىنىڭ قۋىرشاق تەاترى ۇسىنعان «ماڭگىلىك بالا بەينە» سپەكتاكلىندەگى دەپۋتات ءرولى ءۇشىن دارحان ءمۇسليموۆ, «ەكىنشى پلانداعى ۇزدىك ايەل بەينەسى» اتالىمىن ح.بوكەەۆا اتىنداعى باتىس قازاقستان وبلىستىق قازاق دراما تەاترىنىڭ «قارالى سۇلۋ» سپەكتاكلىندەگى قىزمەتشى كەمپىر ءرولى ءۇشىن گۇلجيان شىنتەمىر جانە استانا قالاسى اكىمدىگى قۋىرشاق تەاترىنىڭ ءارتىسى ايجان سادىقوۆا «ماڭگىلىك بالا بەينە» سپەكتاكلىندەگى قاتيرا ءرولى ءۇشىن تەڭدەي ءبولىستى.
«فەستيۆالدىق قوزعالىستار جالپى ونەردىڭ دامۋىنا, باسەكەلەستىك پەن جاڭا ىزدەنىستەردىڭ دامۋىنا وتە قاتتى اسەر ەتەدى. وسىلايشا, تالاي تەاتر ارتىستەرى تانىلىپ, ۇلكەن شىعارمالار دۇنيەگە كەلەدى», دەدى ءاليا بوپەجانوۆا.
جەتى كۇن بويى كورەرمەنىن جارقىن اسەرگە بولەگەن ونەر دۋمانى وسىلايشا ءوز مارەسىنە جەتتى. ەلىمىزدىڭ تۇكپىر-تۇكپىرىندەگى ونەر ۇجىمدارى مەن باۋىرلاس ەلدەر تەاترلارىنىڭ باسىن باس قالا تورىندە قوسقان تاماشا تەاتر دۋمانىنىڭ اسەرى ۇزاق ۋاقىت بويى كورەرمەن جادىندا جاتتالارى ءسوزسىز.