بيىل رەسپۋبليكالىق فيزيكا-ماتەماتيكا مەكتەبىنىڭ وقۋشىلارى IMO/IPhO/IIO حالىقارالىق وليمپيادالاردا 1 التىن, 6 كۇمىس جانە 2 قولا مەدال يەلەندى. بۇل – وقۋ ورداسى ءۇشىن ءابسوليۋتتى رەكورد. توپ-7 بەدەلدى وليمپيادالاردا جۇلدەلى ورىن العان 26 وقۋشىنىڭ قاتارىندا رەسپۋبليكالىق فيزيكا-ماتەماتيكا مەكتەبىنىڭ وقۋشىلارى بار. سولاردىڭ ىشىندە ماكسيم تسوي «International Olympiad in Informatics» كۇمىس مەدالىن يەلەنسە, ءامىرلان امانجولوۆ «International Mathematical Olympiad» كۇمىس مەدالىن جەڭىپ الدى. ال مارعۇلان نۇرساعاتوۆ «International Physics Olympiad» كۇمىس مەدالىن قانجىعاسىنا بوكتەرسە, قازىمبەك ءىلياس «IPhO Olympiad» قولا مەدالىنىڭ يەگەرى اتاندى.
رەسپۋبليكالىق فيزيكا-ماتەماتيكا مەكتەبى جارتى عاسىردان استام ۋاقىتتا الەمدىك دەڭگەيدەگى ءبىلىم بەلەسىن باعىندىرىپ, ۇزدىكسىز ىزدەنىس پەن تۇراقتى ءوسۋ جولىندا كەلە جاتىر.
ىرگەلى ءبىلىم ورداسىنىڭ وقۋشىلاردى فيزيكا-ماتەماتيكا, ينفورماتيكا پاندەرى بويىنشا تەرەڭدەتىپ وقىتاتىن استانا, الماتى جانە ورال قالالارىندا فيليالى جۇمىس ىستەيدى. بۇل ءۇش مەكتەپتە 3 مىڭنان استام وقۋشى ءبىلىم الادى. پەداگوگيكالىق قۇرام دا بىلىكتى مامانداردان قۇرالعان. ءبىلىم ورداسىندا 300-دەن اسا پەداگوگ قىزمەت ەتسە, 70-كە جۋىعى پەداگوگ-شەبەر, 80-گە جۋىعى پەداگوگ-زەرتتەۋشى ەڭبەك ەتەدى.
مەكتەپتە وقۋشىلاردىڭ ساپالى ءبىلىم الۋىنا بايلانىستى ماتەريالدىق-تەحنيكالىق بازاسى جاڭارتىلىپ, زاماناۋي مۇمكىندىكتەر قاراستىرىلعان. وسىعان بايلانىستى رەسپۋبليكالىق فيزيكا-ماتەماتيكا مەكتەپتەرىندە 2017 جىلدان باستاپ «ياندەكس ليتسەي» باعدارلامالاۋ كۋرسى جۇمىس ىستەيدى. بۇل جوبا وقۋشىلاردىڭ IT باعىتتى كاسىبي مەڭگەرۋىنە ىقپال ەتەدى. «ياندەكستىڭ» نەگىزىن قالاۋشىلار – اركادي ۆولوج بەن يليا سەگالوۆيچ مەكتەپ تۇلەكتەرى.
قازىرگى تاڭدا مىڭنان استام مەكتەپ تۇلەگى «Cambridge», «Oxford», «Harvard», «Yale», «Stanford», «Columbia», «Boston», «Manchester», «KAIST», «Hong Kong University»-دە ءبىلىم الىپ, «Google», «ياندەكس», «YouTube», «Twitter», «Meta», «Amazon», «Oracle», «Lift», «AirAstana» سىندى الەمدىك ءىرى كومپانيالاردا قىزمەت ەتەدى. تۇلەكتەر باستاماسىمەن فيزيكا-ماتەماتيكانى دامىتۋ ماقساتىندا «Fizmat Endowment Fund»-تىڭ نەگىزى قالاندى. اتالعان قوردىڭ ينۆەستيتسيالىق تابىسى وليمپيادالاردى قولداۋعا, دارىندى وقۋشىلارعا بەرىلەتىن گرانت سانىن كوبەيتۋگە, مەكتەپ ينفراقۇرىلىمىن جاقسارتۋعا, ۇزدىك مۇعالىمدەردى قولداۋعا ارنالعان.
وقۋ-اعارتۋ مينيسترلىگى قولداۋىنىڭ ارقاسىندا مەكتەپ وقۋشىلارى ءتۇرلى حالىقارالىق وليمپيادالارعا قاتىسۋعا مۇمكىندىك الدى. سونىمەن بىرگە اتالعان مەكتەپتەر اياسىندا بىرنەشە حالىقارالىق وليمپيادا وتەدى. ماسەلەن, 2000 جىلدان بەرى ءوتىپ كەلە جاتقان حالىقارالىق و.جاۋتىكوۆ وليمپياداسىنا جىل سايىن الەمنىڭ 20-دان اسا ەلىنەن وقۋشىلار قاتىسادى. بۇل وليمپيادا ورتا جانە جوعارى سىنىپ وقۋشىلارى اراسىندا ۇيىمداستىرىلسا, 2016 جىلدان باستاپ وتەتىن «FEMO» وليمپياداسى 1-5-سىنىپ وقۋشىلارىنا ارنالعان. بۇل ءبىلىم باسەكەسى 2018 جىلى حالىقارالىق مارتەبەگە يە بولدى.
جاساندى ينتەللەكت نەگىزىندە ستارتاپ-جوبا ازىرلەگەن استاناداعى رفمم وقۋشىلارى ارسەن قىلىشبەك پەن ۆلاديمير بورزەنكوۆ «Microsoft» كومپانياسىنىڭ اتىنان 500 مىڭ دوللار جەڭىپ الدى. مۇندا وقۋشىلاردىڭ جان-جاقتى دامىعان تۇلعا بولىپ قالىپتاسۋىنا تەرەڭ ءمان بەرىلەدى.
«رفمم» باسقارما توراعاسى رۋسلان قاليەۆ فيزيكا-ماتەماتيكا مەكتەبىنىڭ پەداگوگيكالىق ۇجىمى وتاندىق ءبىلىم بەرۋ سالاسىنان بولەك, الەمدىك دەڭگەيدەگى وقىتۋدىڭ ۇتىمدى تۇستارىن دا يگەرەتىنىن ايتادى.
«ساپالى ءبىلىم بەرۋدەگى جاڭاشىل وزگەرىستەردى ۇنەمى نازاردا ۇستايمىز. بۇگىنگى تاڭدا مەكتەپ باعدارلاماسىندا ءبىلىم بەرۋ ءۇردىسىن جەتىلدىرۋگە باعىتتالعان جاساندى ينتەللەكت تەحنولوگياسى قولدانىلادى. سونىمەن بىرگە وقۋشىلاردىڭ ءارتۇرلى پاندەر بويىنشا ءبىلىمىن تەرەڭدەتۋگە, جوعارى وقۋ ورنىنا تۇسۋگە كومەكتەسەتىن «Advanced Placement» (AP) ءبىلىم جوباسى جۇمىس ىستەيدى. سينگاپۋر ادىسىندەگى ماتەماتيكا نەگىزىن باستاۋىشتان باستاپ ۇيرەتۋ قولدانىسقا ەنگىزىلگەن», دەدى ول.
استاناداعى رەسپۋبليكالىق فيزيكا-ماتەماتيكا مەكتەبىندە «iOS», «macOS» «watchOS» جانە «tvOS» ءۇشىن قولدانبالار جاساۋعا مۇمكىندىك بەرەتىن «Apple» كومپانياسىنىڭ زاماناۋي باعدارلامالاۋ ءتىلىن ۇيرەنۋگە ارنالعان «Swift تىلىندە باعدارلامالاۋ نەگىزدەرى» كۋرسى اشىلعان. سونداي-اق روبوتتەحنيكا باعىتىن مەڭگەرۋدە وقۋشىلار ۇزدىك ناتيجەگە يە بولىپ وتىر. ماسەلەن, سوڭعى ەكى جىل قاتارىنان رەسپۋبليكالىق فيزيكا-ماتەماتيكا مەكتەبىنىڭ قۇرامالارى ورتالىق ازيا چەمپيوناتىندا باس جۇلدەنى جەڭىپ الىپ, ەل نامىسىن حيۋستوندا وتكەن حالىقارالىق دارەجەدەگى دودادا قورعادى.
سونىمەن قاتار فيزيكا-ماتەماتيكا مەكتەبى ءبىلىم سالاسىنداعى ءوز تاجىريبەسىن باسقا ارىپتەستەرىمەن ۇنەمى ءبولىسىپ وتىرادى. ويتكەنى مەكتەپ وقۋشىلارىنىڭ حالىقارالىق كاسىبي وليمپيادالارداعى جەتىستىكتەرى كوپشىلىكتى قاتتى قىزىقتىرادى. بۇگىنگە دەيىن رەسپۋبليكالىق فيزيكا-ماتەماتيكا مەكتەبى «ورلەۋ» بىلىكتىلىكتى ارتتىرۋ ۇلتتىق ورتالىعىمەن بىرلەسىپ, الماتى, جەتىسۋ, ۇلىتاۋ وبلىستارىنىڭ مۇعالىمدەرىنە ارنايى شەبەرلىك-ساعاتىن وتكىزدى. بۇل ءىس-شارا ءالى جالعاسىپ جاتىر.
الماتى