جامبىل وبلىسىنا جۇمىس ساپارىمەن كەلگەن وقۋ-اعارتۋ ءمينيسترى عاني بەيسەمباەۆ باستاعان توپ اۋەلى «مىڭبۇلاق» شاعىن اۋدانىندا ورنالاسقان ومىرلىك قيىن جاعدايداعى بالالاردى قولداۋ ورتالىعىنا ات باسىن بۇرىپ, مۇندا ءتالىم الىپ جاتقان جاسوسپىرىمدەردىڭ جاي-كۇيىمەن, ورتالىقتىڭ جۇمىسىمەن تانىستى.
دەرەككە جۇگىنسەك, مۇندا 102 بالا تاربيەلەنىپ جاتىر ەكەن. باسقوسۋ بارىسىندا عاني بەكتەن ۇلى بۋىنى بەكىپ, قاناتى قاتايماي جاتىپ تاعدىردىڭ ءتۇرلى سىناعىنا تاپ بولعان جاسوسپىرىمدەرمەن تىلدەسىپ, ولاردىڭ قاجەتتىلىكتەرىنە نازار اۋداردى. مينيستر ءوز سوزىندە ءار بالانىڭ قۇقىعىن قورعاۋدىڭ ماڭىزدىلىعىن اتاپ ءوتىپ, قاۋىپسىز ورتا قالىپتاستىرۋ قاجەتتىگىن تىلگە تيەك ەتتى. سونداي-اق جەرگىلىكتى اتقارۋشى بيلىك وكىلدەرىنە ادىستەمەلىك قىزمەتتەر مەن وڭىرلىك پەداگوگيكالىق قولداۋ ورتالىقتارىنىڭ قىزمەتىن كۇشەيتۋدى تاپسىردى.
«بالالاردىڭ قاۋىپسىزدىگىن قامتاماسىز ەتۋ جانە ولاردىڭ قۇقىعىن قورعاۋ – مەملەكەت ساياساتىنىڭ باستى باعىتى. ەلىمىزدەگى ءاربىر بالا ءوزىن ەرەسەك ادامداردىڭ قامقورلىعىندا ەكەنىن سەزىنۋى كەرەك. ول ءۇشىن بارلىق ۋاكىلەتتى ورگاندار ءوز مىندەتىن ءمىنسىز اتقارىپ, جەرگىلىكتى جەردە جۇمىستى دۇرىس ۇيلەستىرگەنى ءلازىم.
پرەزيدەنت تاپسىرماسى بويىنشا وسى جىلدان باستاپ, بارلىق وڭىردە پسيحولوگيالىق قولداۋ ورتالىعى اشىلدى. پسيحولوگ مامانداردىڭ جۇمىسىن كۇشەيتە وتىرىپ, بالالار قۇقىعىنىڭ بۇزىلۋىنا قاتىستى جايتتاردىڭ الدىن العان ءجون دەپ بىلەمىن. وسى تۇستا بالالاردى جالپىۇلتتىق قۇندىلىق رۋحىندا تاربيەلەۋگە باعىتتالعان ء«بىرتۇتاس تاربيە» باعدارلاماسى نەگىزگى ءرول اتقاراتىنىن ۇمىتپاعان ابزال», دەدى مينيستر ءوز ويىن ورتاعا سالىپ.
كەيىننەن «باقىتتى بولاشاق» وقۋشىلار سارايىندا وتكەن كەزدەسۋدە مينيستر ءبىلىم الۋشىلارمەن ەركىن فورماتتا اڭگىمە-دۇكەن قۇردى. ءبىلىم سالاسىندا قولعا الىنعان جاڭاشىل باستامالار مەن وقۋشىلاردى قولداۋ باعىتىندا قولعا الىنعان جۇمىستار تۋرالى اڭگىمەلەدى. ع.بەيسەمباەۆتىڭ ايتۋىنشا, بولاشاقتا ءبىلىم باسەكەلەرىندە توپ جارعان وقۋشىلارعا قۇرمەت كورسەتىلىپ, قارجىلاي سىياقى تاعايىندالادى.
ء«بىلىمدى ۇرپاق – ەل ەرتەڭىنىڭ كەپىلى. بيلىك ءبىلىمدى وقۋشىلاردى ارقاشان قولداۋعا دايىن. ەندى حالىقارالىق وليمپيادادا توپ جارعان جەڭىمپازدار مەن جۇلدەگەرلەر قوماقتى قارجىلاي سىياقى الادى. بۇل – ءبىلىم جارىستارىنا قىزىعۋشىلىقتى ارتتىرىپ, ۇزدىكتەردى ىنتالاندىرۋ ماقساتىندا قولعا الىنعان جۇمىس. ماسەلەن, حالىقارالىق وليمپيادالاردا جەڭىسكە جەتكەن وقۋشىلارعا بىرجولعى سىياقى رەتىندە 5,5 ميلليون تەڭگەگە دەيىن قاراستىرىلعان. سونىمەن قاتار جەڭىمپازدارعا وتاندىق جوعارى وقۋ ورىندارىنىڭ گرانتتارى تابىستالادى. وسىلايشا, دارىندى جاستارعا ۇلكەن قولداۋ كورسەتىلىپ, ولاردىڭ ءبىلىمى مەن جەتىستىكتەرى لايىقتى دەڭگەيدە باعالانادى. جەڭىمپازداردى دايىنداعان پەداگوگتەردىڭ دە ەڭبەگى ەلەۋسىز قالمايدى», دەدى مينيستر.
مەملەكەت باسشىسى قاسىم-جومارت توقاەۆتىڭ تىكەلەي تاپسىرماسىنا سايكەس, ءبىلىمدى ءارى باسەكەگە قابىلەتتى جاستاردىڭ قاتارىن ارتتىرۋ ماقساتىندا رەسپۋبليكا بويىنشا ىلكىمدى ىستەر قولعا الىنعان. ايتالىق, سوڭعى 5 جىلدىڭ ىشىندە ەلىمىزدە 1 ميلليون وقۋشىعا ارنالعان ءبىر مىڭنان اسا مەكتەپتىڭ قۇرىلىسى قارقىن الدى. بۇدان بولەك, بارلىق ءبىلىم وشاعىن «جايلى مەكتەپ» دەڭگەيىنە جەتكىزۋ بويىنشا جۇيەلى جۇمىستار اتقارىلىپ جاتىر. ناتيجەسىندە, 2027-2028 جىلعا دەيىن ەلىمىزدەگى بارلىق مەكتەپتىڭ ينفراقۇرىلىمى جاقسارىپ, وقۋشىلار جوعارى جىلدامدىقتى ينتەرنەت پەن زاماناۋي ۇلگىدە پاندىك كابينەتتەرگە قول جەتكىزبەك. وسىنداي مالىمەتتەرمەن بولىسكەن عاني بەيسەمباەۆ ءاربىر پەداگوگ ءوز ماماندىعىنا ادالدىق تانىتىپ, ۇرپاق تاربيەلەۋ ىسىنە ۇلەستەرىن قوسۋى قاجەتتىگىن جەتكىزدى.
وقۋ-اعارتۋ ءمينيسترى عاني بەيسەمباەۆ, وبلىس اكىمىنىڭ ورىنباسارى سەرىك سالەموۆ, وبلىستىق ءبىلىم باسقارماسىنىڭ باسشىسى راۋان سادىرقۇلوۆتىڭ قاتىسۋىمەن وتكەن كەزدەسۋگە قاتىسۋشىلار سپيكەرلەرگە كوكەيدە جۇرگەن ساۋالدارىن قويىپ, ۇتىمدى جاۋاپتار الدى.
جامبىل وبلىسى