بيىل – ءان ونەرىندە وشپەس ءىز قالدىرعان ەرەك ونەرپاز, قازاقستاننىڭ ەڭبەك سىڭىرگەن ءارتىسى ءمادينا ەراليەۆانىڭ تۋعانىنا 70 جىل. وسىعان وراي ا.توقماعامبەتوۆ اتىنداعى قالالىق مادەنيەت ۇيىندە «قازاقتىڭ اقبايانى» اتتى وبلىستىق انشىلەر بايقاۋى ۇيىمداستىرىلدى. بۇلاق سىڭعىرىنداي اسەم ۇنىمەن تىڭداۋشىسىن باۋراعان ءانشى رۋحىنا ارنالعان مادەني كەشتى قاراوزەك اۋىلدىق كلۋبى مەن قىزىلجارما اۋىلدىق مادەنيەت ءۇيى بىرلەسە ۇيىمداستىرىپتى.
قىزىلورداداعى م.مامەتوۆا اتىنداعى پەداگوگيكالىق ۋچيليششەنىڭ ستۋدەنتى كەزىنەن ونەرىمەن تانىلعان تالاپتى جاستىڭ باعىن اشقان تۋىندى – كومپوزيتور بەكسۇلتان بايكەنجەەۆتىڭ ايگىلى «اقبايان» ءانى بولدى. العاشقى قاتىسقان بايقاۋى – الماتىدا وتكەن كوركەمونەرپازدار ونەر بايگەسىندە وسى انمەن جۇلدەلى ورىنعا يە بولعان ءانشىنى كۇللى جۇرت ء«ان الەمىنىڭ اقبايانى» دەپ الاقانىندا ايالادى.
پەدۋچيليششەدەن كەيىن قازاقتىڭ قىزدار پەداگوگيكالىق ينستيتۋتىنىڭ مۋزىكا فاكۋلتەتىن بىتىرسە دە ونەر جولىنا بىردەن تۇسە قويماعان كەزىندە قازاقتىڭ قابىرعالى قايراتكەرى وزبەكالى جانىبەكوۆ قامقورلىق تانىتىپ, وبلىستىق فيلارمونياعا قابىلداپ, دارىندى جاسقا جول اشتى. جاس ءانشىنىڭ رەپەرتۋارىن دا اركەز قاداعالاپ, باعىت-باعدار بەرىپ وتىرعان ۇلت مادەنيەتىن ۇلىقتاعان قايراتكەردىڭ ارقاسىندا ءمادينا ەسىمى ءان كوگىندە ەركىن قالىقتادى.
ءومىرىنىڭ سوڭعى جىلدارىندا تاعدىر تىلسىمىن بولجاعانداي «ەسىڭە مەنى العايسىڭ», «كۇرەڭ كۇز» اندەرىن ءجيى ورىنداعان ءانشى وسىدان 24 جىل بۇرىن قاراشانىڭ سۋىق كەشىندە كۇرە جولدىڭ بويىندا كولىك اپاتىنان قاپىدا كوز جۇمدى. سول ءسات كۇللى جۇرت ءان اسپانىنداعى سىڭعىر ءۇن كەنەتتەن ءۇزىلىپ تۇسكەندەي كۇي كەشكەنى راس.
ۇلكەن ەكراننان بەرىلگەن ءمادينا اندەرىنەن باستالعان بايقاۋدا قالا اكىمىنىڭ ورىنباسارى دارحان تۇرسىنباەۆ ارتىندا وشپەس ءىز قالدىرعان ءانشىنىڭ ۇلت ونەرىندەگى ورنىنا توقتالىپ, بايقاۋ قاتىسۋشىلارىنا ساتتىلىك تىلەدى.
كومپوزيتور, قازاقستاننىڭ ەڭبەك سىڭىرگەن قايراتكەرى رامازان تايمانوۆ, كومپوزيتور, مادەنيەت سالاسىنىڭ ۇزدىگى ءسابيت ۇلىقپان ۇلى, وبلىستىق حالىق شىعارماشىلىعىن دامىتۋ جانە مادەني-پروديۋسەرلىك ورتالىعىنىڭ كوركەمدىك جەتەكشىسى رۋسلان بۋراباي قازىلىق ەتكەن بايقاۋدا 20-35 جاس ارالىعىنداعى 8 ونەرپاز باق سىنادى.
قاتىسۋشىلار ەكى كەزەڭنەن تۇراتىن بايقاۋدىڭ العاشقى ساتىسىندا ءمادينا ەراليەۆا رەپەرتۋارىنان ءبىر ءان, ەكىنشى كەزەڭدە ءوز مۇمكىندىگىن كورسەتەتىن تاعى ءبىر تۋىندى ورىندادى. سىر ساندۋعاشىنىڭ ونەرىن ناسيحاتتاپ, جاستار تالابىن قولداۋعا ارنالعان كونكۋرس قورىتىندىسى بويىنشا جۇلدەلى III ورىندى جالاعاش اۋدانىنان ورنىقحان پازىل, II ورىندى جاڭاقورعاندىق يسلامحان ناعىزحان, ءبىرىنشى ورىندى قىزىلوردالىق ايگەرىم شۇكىرباەۆا يەلەندى.
بايقاۋدىڭ باس جۇلدەسىن سىرداريا اۋدانىنان كەلگەن اياۋلىم بەكبولاتوۆا جەڭىپ الدى.
قىزىلوردا