مۇسىنشىلىك ونەر قازاق دالاسىندا ەرتە كەزدەن-اق توبە كورسەتىپ, قۇندى ەسكەرتكىشتەر بوي كوتەرگەن. بابالار مۇراسىنىڭ اسىل سىنىعى ۇزىلمەي, تالانتتى شەبەرلەر ەڭبەگىمەن تولىعىپ كەلەدى.
پاۆلوداردا ءمۇسىنشى, حالىقارالىق Turan سىيلىعىنىڭ لاۋرەاتى دانيار سارباسوۆتىڭ جەكە كورمەسى اشىلىپ وتىر. ەكسپوزيتسياعا اۆتوردىڭ سوڭعى ون جىلدا سومداعان وتىزعا تارتا كەستەلى تۋىندىلارى ىرىكتەلىپ قويىلعان. انيماليست-ءمۇسىنشى ەڭبەكتەرىنىڭ باسىم كوپشىلىگى ۇلتىمىزدىڭ ءتول جانۋارى, قاناتتى پىراق جىلقى مالىنا ارنالعان. ءمۇسىنشى تۋىندىلارى سونىمەن قاتار قيال-عاجايىپ ەرتەگىلەر مەن قاداۋ-قاداۋ تاريحي وقيعالارعا نەگىزدەلىپ جاسالعان. ماسەلەن, ءداۋىت پەن جىلاننىڭ بەينەسى سومدالعان ەرەكشە ءمۇسىن قوينىنا كەنەن تاريحي استار جاسىرعان.
– ءداۋىت پەن جىلاننىڭ بەينەسى سومدالعان مۇسىنگە تەرەڭىرەك ۇڭىلسەك, ونداعى جىلاننان قىتايدىڭ يمپەرياسىن, قىتايدىڭ ايداھارىن كورۋگە بولادى. ال ءداۋىتتى عۇننىڭ كەزىندەگى كەنتاۆرلار دەپ قاراستىرساق بولادى. سوندىقتان مۇندا ەجەلگى تاريحتاعى عۇنداردىڭ قىتاي يمپەرياسىن جاۋلاپ العانى ايتىلىپ تۇر. سونىمەن بىرگە «پەگاس» دەگەن جۇمىسىم ارقىلى حالىقارالىق «شابىت» فەستيۆالىنىڭ باس جۇلدەسىن يەلەندىم. وندا ساقتىڭ ورنەكتەرى مەن قازىرگى قازاقى ناقىشتاردى ارالاستىرىپ, ءوز ويىمداعى ستيليستيكانى بەينەلەپ, دۇنيەگە اكەلگەن ەدىم, – دەيدى ءمۇسىنشى دانيار سارباسوۆ.
جوعارىدا ايتقانىمىزداي, كورمەگە قويىلعان ەكسپوزيتسيالاردىڭ باسىم كوپشىلىگى جىلقى تاقىرىبىن قاۋزايدى. مۇندا بايگە اتتارى, جورعا, شۋ اساۋ بەينەسىندەگى جانۋارلار, اقان سەرىنىڭ قۇلاگەرى, ميفتىك بەينەدەگى ءمۇيىزدى تۇلپارلارعا دەيىن اسپەتتەلگەن. سونداي-اق ءمۇسىنشى سكيف-ساق مادەنيەتىن تەرەڭ زەرتتەپ, وسى باعىتتا بىرنەشە تۋىندىنى ومىرگە اكەلگەن. باياناۋىل اۋدانىنىڭ تۋماسى «اتامەكەن» اتتى العاشقى كورمەسىن تۋىپ-وسكەن توپىراعىنداعى جەرلەستەرىنە ارناپ وتىر.