سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ فرانتسيانىڭ قازاقستانداعى توتەنشە جانە وكىلەتتى ەلشىسى سيلۆان گيوگەمەن كەزدەسىپ, ەكىجاقتى ىنتىماقتاستىق باعىتتارىن تالقىلادى, دەپ حابارلايدى Egemen.kz سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتىنە سىلتەمە جاساپ.
اتاپ ايتقاندا, مينيسترلىك فرانتسيانىڭ دامۋ اگەنتتىگىمەن (AFD) جانە فرانتسيانىڭ گەولوگيالىق جانە تاۋ-كەن زەرتتەۋلەر بيۋروسىمەن (BRGM) ىنتىماقتاستىق تۋرالى مەموراندۋمعا جانە ۇشجاقتى كەلىسىمگە قول قويۋعا دايىندالىپ جاتىر. ۆەدومستۆو اتالعان ۇيىمدارمەن بىرلەسىپ ىلە-بالقاش باسسەينىنە كەشەندى زەرتتەۋ جۇرگىزەدى. سونداي-اق جەراستى سۋلارىن زەرتتەۋ, مونيتورينگى, بارلاۋ جانە يگەرۋ باعىتىندا دا ىنتىماقتاستىق جولعا قويىلادى.
بۇدان بولەك, سۋ رەسۋرستارى جانە يرريگاتسيا مينيسترلىگى حالىقارالىق سۋ بيۋروسىمەن (OiEau) ىنتىماقتاستىق مۇمكىندىكتەرىن قاراستىرۋدا.
سيلۆان گيوگە ءوز كەزەگىندە فرانتسۋز كومپانيالارى قازاقستاندا سۋ شارۋاشىلىعى قۇرىلىستارىن سالۋ جانە رەكونسترۋكتسيالاۋ بويىنشا جوبالارعا قاتىسۋعا نيەتتى ەكەندەرىن ايتتى. سونداي-اق, سۋ شىعىنىن انىقتايتىن جانە سۋدى باسقارۋدى وڭتايلاندىراتىن كومپانيالار دا سەرىكتەستىك ورناتۋعا قىزىعۋشىلىق تانىتىپ وتىر.
«مەموراندۋم مەن كەلىسىمگە قول قويۋ ءبىزدىڭ ىنتىماقتاستىعىمىز ءۇشىن ماڭىزدى قادام بولماق. ءبىز فرانتسۋز ارىپتەستەرىمىزبەن ۇزاق مەرزىمدى جانە ناتيجەلى جۇمىس ىستەۋگە نيەتتىمىز»,دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.