اباي اتىنداعى قازاق ۇلتتىق پەداگوگيكالىق ۋنيۆەرسيتەتى حالىقارالىق ىنتىماقتاستىقتى كەڭەيتۋ, پەداگوگيكالىق تاجىريبە الماسۋ ماقساتىندا جەتەكشى شەتەلدىك عالىمداردى شاقىرعان بولاتىن. عىلىم جانە جوعارى ءبىلىم مينيسترلىگىنىڭ قولداۋىمەن ىسكە اسقان ءىس-شارا بارىسىندا شەتەلدىك عالىمدار مەن وقىتۋشىلار ءوز تاجىريبەسىمەن ءبولىستى.
بۋرسا ۋلۋداگ ۋنيۆەرسيتەتىنىڭ پروفەسسورى ساليح چەپني, ترابزون ۋنيۆەرسيتەتىنىڭ پروفەسسورى مۋاممەر چاليح (تۇركيا) جانە وكاياما ۋنيۆەرسيتەتىنىڭ پروفەسسورى حيروكي فۋدجي (جاپونيا) ۋنيۆەرسيتەتتىڭ جاراتىلىستانۋ جانە گەوگرافيا فاكۋلتەتىنىڭ ءبىلىم الۋشىلارىنا ءدارىس پەن سەمينار وتكىزىپ, وقىتۋشىلارمەن, جاس عالىمدارمەن تاجىريبە الماستى.
پەداگوگيكالىق تاجىريبە مەن وزىق يننوۆاتسيالارمەن الماسۋ الاڭىن قالىپتاستىرۋدا شەتەلدىك عالىمدارمەن ءوزارا بايلانىس ورناتۋ زاماناۋي ءبىلىم تەحنولوگيالارىن ەنگىزۋگە, جاڭا فورماتسياداعى باسەكەگە قابىلەتتى مامانداردى دايارلاۋعا ىقپال ەتەدى. ۋنيۆەرسيتەتتىڭ باستاماسىمەن عالىمدار وراز جاندوسوۆ اتىنداعى №105 گيمنازيادا بولىپ, ۋنيۆەرسيتەت پەن مەكتەپ اراسىنداعى بايلانىستى نىعايتا ءتۇستى.
ساپار بارىسىندا شەتەلدىك پروفەسسورلار ەلىمىزدەگى مەكتەپتەردىڭ كۇندەلىكتى قىزمەتىمەن تانىسىپ, وقۋشىلارمەن جانە ۇستازدارمەن ءبىلىم جۇيەسىنىڭ ەرەكشەلىكتەرىن تالقىلاپ, وقۋ ۇردىسىندە قولدانىلاتىن يننوۆاتسيالىق تاسىلدەردى زەردەلەدى.
اباي ۋنيۆەرسيتەتىنىڭ باستاماسى وتاندىق مەكتەپ وقۋشىلارى مەن مۇعالىمدەرىنە حالىقارالىق ساراپشىلارمەن ءبىلىم جانە تاجىريبە الماسۋعا بىرەگەي مۇمكىندىك بەردى. شەتەل پروفەسسورلارىنىڭ پىكىرىنشە, تاجىريبە الماسۋ كاسىبي دامۋعا ىقپال ەتىپ, قاتىسۋشىلاردىڭ كوكجيەگىن كەڭەيتىپ, زاماناۋي ءبىلىم بەرۋ وزىق ءادىس-تاسىلدەرىن تەرەڭىرەك تۇسىنۋگە جاعداي جاسايدى.
ۋنيۆەرسيتەت باسشىلىعى مۇنداي ءىس-شارالار ءارتۇرلى دامىعان ەلدىڭ ءبىلىم مەكەمەلەرى اراسىنداعى ىنتىماقتاستىقتى نىعايتۋعا ىقپال ەتە وتىرىپ, بىرلەسكەن عىلىمي جانە ءبىلىم جوبالارى ءۇشىن جاڭا باعىتتارعا جول اشادى دەگەن سەنىمدە. بۇل باستامالار حالىقارالىق بايلانىستاردى نىعايتىپ قانا قويماي, جوعارى وقۋ ورىندارى مەن مەكتەپتەردەگى ءبىلىم ساپاسىنا وڭ اسەر ەتەتىن يننوۆاتسيالىق ءبىلىم تەحنولوگيالارىن ەنگىزۋدە دە تيىمدىلىگىن كورسەتپەك.
الماتى