قازاقستان رەسپۋبليكاسىنىڭ ۇلتتىق پاۆيلونى مادەنيەت جانە اقپارات مينيسترلىگىنىڭ قولداۋىمەن العاش رەت بەدەلدى كورمەدە ۇسىنىلدى, دەپ حابارلايدى Egemen.kz.
60-شى ۆەنەتسيا بيەننالەسىندە «Jerūiyq: كوكجيەكتەن تىس كوزقاراس» قازاقستاندىق پاۆيلونىنا حالىقارالىق سىنشىلار جاعىمدى پىكىر ءبىلدىردى.
Jerūiyq – بۇگىنگە دەيىن اۋىزدان-اۋىزعا تاراپ, ۇرپاقتان-ۇرپاققا جەتكەن قازاق اڭىزى بويىنشا «قۇتتى مەكەندى» ىزدەۋ. ەكسپوزيتسيادا فۋتۋريستىك كوكجيەكتەر مەن قازىرگى پورتالدان بولەك ولشەمگە دەيىنگى قيال الەمى ۇسىنىلعان.
«قازاقستانعا ءوز ونەرىن كورسەتۋ وتە ماڭىزدى. تاريح پەن قازىرگى زاماندى ۇشتاستىرۋ يدەياسى مەن تۇجىرىمداماسى قىزىقتى جانە ماعان ۇنادى», دەدى گەرمانيالىق ارت-سىنشى ءارى سۋرەتشى ۆالەريا ابەنتروت.
قازاقستان پاۆيلونىن كوپشىلىك جىلى قابىلدادى. وعان پاۆيلوننىڭ بىرەگەي تۇجىرىمداماسى مەن قازاقستاندىق سۋرەتشىلەردىڭ ۇرپاقتار ساباقتاستىعى بايقالاتىن ەرەكشە جۇمىستارى سەپ بولدى. مىسالى, وتكەن ونجىلدىقتى بەينەلەيتىن كاميل مۋللاشەۆ پەن ەربولات تولەپبايدىڭ جۇمىستارى, ساكەن نارىنوۆ پەن سەرگەي ماسلوۆتىڭ زاماناۋي ديالوگى قازاقستاندىق ونەردىڭ مودەرنيزمنەن جاڭا مەدياعا دەيىنگى ەۆوليۋتسياسىن كورسەتەدى.
The2vvo سۋرەتشىلەر توبىنىڭ «قاتىسۋ» ساۋند-ينستاللياتسياسى مەن انۆار مۇسىرەپوۆتىڭ «الاستاۋ» بەينە ەسسەسى سياقتى ءداستۇردى جاڭا مەديامەن ۇيلەستىرەتىن جۇمىستار كوپشىلىكتىڭ نازارىن اۋداردى. بۇل بيەننالەنىڭ نەگىزگى تۇجىرىمداماسى كوشى-قون ماسەلەلەرى مەن مادەني پليۋراليزم تاقىرىبىن كورسەتەدى.
«بىرىنشىدەن, ماعان قاتتى اسەر ەتكەن نارسە – سىزدەر اتا-بابانىڭ ءداستۇرىن جالعاستىرىپ, سونىمەن بىرگە ونى قازىرگى زامانمەن ۇشتاستىرا الاتىندارىڭىز. سىزدەر سونىڭ ورتاسىن تابا بىلدىڭىزدەر. وتكەن مەن بولاشاقتى ۇيلەستىرە وتىرىپ, العا ۇمتىلىپ جاتىرسىزدار. مۇنىڭ ناتيجەسى كەرەمەت بولادى. بۇل ۇلكەن جەتىستىك, ويتكەنى باتىسقا جەتپەيتىنى وسى», دەدى ەگيپەت جانە سولتۇستىك افريكاداعى يتاليالىق راديوتەلەۆيزيا بيۋروسىنىڭ جەتەكشىسى مارك يننارو.
ءداستۇرلى قازاق يىرىمدەرى مەن زاماناۋي كوركەمدىك تاجىريبەلەردىڭ ەرەكشە ۇيلەسىمى سىنشىلاردىڭ عانا ەمەس, جالپى جۇرتشىلىقتىڭ قىزىعۋشىلىعىن تۋدىردى. پاۆيلون جۇمىس ىستەگەن كۇندەرى كەلۋشىلەر سانى ارتىپ, جوبانى تالقىلاپ, پىكىر بىلدىرگەندەردىڭ دە قاراسى كوپ بولدى.
ايتا كەتەيىك, قازاقستاندىق سۋرەتشىلەردىڭ ونەر كورمەسىنە قاتىسۋى «ViledFASHION» جشس باس دەمەۋشىسىنىڭ, «Qazaq oil» جشس, «Universal Energy Kazakhstan» جشس قولداۋىمەن ۇيىمداستىرىلدى.
Navale مۇراجايىنىڭ تاريحي عيماراتىندا ءوتىپ جاتقان 60-شى ۆەنەتسيا ونەر بيەننالەسىندە قازاقستاندىق پاۆيلون 24 قاراشاعا دەيىن جۇمىس جاسايدى.