پالاتا سپيكەرى ەرلان قوشانوۆتىڭ توراعالىعىمەن بيۋرو ءوتىپ, وندا الداعى جالپى وتىرىستىڭ كۇن ءتارتىبى ناقتىلاندى.
دەپۋتاتتار ءبىرىنشى وقىلىمدا قارجى نارىعىن دامىتۋ جانە قارجىلىق كورسەتىلەتىن قىزمەتتەردى تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلايدى.
ۇكىمەت زاڭ جوباسىن پرەزيدەنتتىڭ بانك سەكتورىنداعى رۇقسات بەرۋ تالاپتارىن وڭتايلاندىرۋ جونىندەگى تاپسىرماسىن ىسكە اسىرۋ ءۇشىن ازىرلەدى. سونداي-اق 2023 جىلعى پرەزيدەنت جولداۋىن ىسكە اسىرۋ اياسىندا شەتەلدىك ەنشىلەس بانكتەر مەن ولاردىڭ فيليالدارىن اشۋ تالاپتارىن جەڭىلدەتۋگە قاتىستى قوسىمشا وزگەرىستەر ەنگىزىلدى. ۇسىنىلىپ وتىرعان تۇزەتۋلەر قارجى سەكتورىنا كاسىبي كادرلاردى تارتۋ جانە بانك سەكتورىنىڭ ينۆەستيتسيالارىنا اكىمشىلىك كەدەرگىلەردى ازايتۋ ءۇشىن جاعداي جاساۋعا ءتيىس.
ەكىنشى وقىلىمدا دەپۋتاتتارعا اقپاراتقا قول جەتكىزۋ جانە قوعامدىق قاتىسۋ ماسەلەلەرىنە قاتىستى تۇزەتۋلەردى قاراۋ ۇسىنىلادى. زاڭ جوباسى مۇگەدەكتىگى بار ادامداردىڭ اقپاراتقا قول جەتكىزۋىن قامتاماسىز ەتۋدىڭ مەحانيزمدەرى مەن قۇرالدارىن بەكىتەدى, سونداي-اق اقپاراتقا قول جەتكىزۋدى قامتاماسىز ەتۋ سالاسىنداعى مەملەكەتتىك باقىلاۋدى كۇشەيتەدى.
كۇن تارتىبىنە ماجىلىسكە كەلىپ تۇسكەن جاڭا زاڭ جوبالارى دا ەنگىزىلدى. ولاردىڭ قاتارىندا «مادەنيەت تۋرالى» زاڭعا وزگەرىستەر, قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا تۇزەتۋلەر, يننوۆاتسيالىق قىزمەت سالاسىن مەملەكەتتىك قولداۋ جۇيەسىن جەتىلدىرۋگە قاتىستى زاڭنامالىق وزگەرىستەر جانە باسقا دا بىرقاتار جوبا بار. ءماجىلىس بۇل زاڭ جوبالارى بويىنشا بەيىندى كوميتەتتەرگە قورىتىندى ازىرلەۋ مەرزىمدەرىن بەلگىلەۋى قاجەت.