رەفەرەندۋم اياقتالعاننان كەيىن جاستار ۇگىت-ناسيحات ماتەريالدارىن جيناۋ اكتسياسىن باستادى. «Amanat» پارتياسىنىڭ جاس بەلسەندىلەرى بۇل قادامدى ساياسي جاۋاپكەرشىلىكتى ارتتىرۋدىڭ, قورشاعان ورتاعا قامقورلىق جاساۋدىڭ ءبىر بولىگى دەيدى.
«جاستار رۋحى» جاستار قاناتى تاڭەرتەڭنەن باستاپ قوناەۆ قالاسىنىڭ ورتالىق كوشەلەرىندەگى ۇگىت-ناسيحات پاراقشالارى مەن جارنامالىق ماتەريالداردى جيناپ شىقتى. وسىلايشا, ايماقتاعى بەلسەندىلەر بىرلەسە قوعامدىق ورىنداردى قالپىنا كەلتىرۋ جۇمىستارىن جۇرگىزدى. ناتيجەسىندە, ناۋقاننىڭ العاشقى كۇنىندە-اق الماتى وبلىسىنىڭ بىرنەشە اۋدانىنداعى كوشەلەر تازالانىپ, ۇگىت-ناسيحات ماتەريالدارى تولىعىمەن الىندى. وڭ باستاما الەۋمەتتىك جەلى قولدانۋشىلارىن دا بەيجاي قالدىرمادى.
– بۇل اكتسيا پارتيانىڭ ناۋقاننان كەيىن دە قوعامعا قىزمەت ەتەتىنىن اڭعارتادى. رەفەرەندۋم سياقتى ۇلكەن ساياسي وقيعادان كەيىن تازالىقتى ساقتاۋ – حالىق الدىنداعى جاۋاپكەرشىلىكتىڭ ءبىر كورىنىسى. ناۋقان كەزىندە كوشەلەر مەن قوعامدىق ورىندارعا ىلىنگەن ۇگىت-ناسيحات ماتەريالدارى حالىققا ماڭىزدى اقپارات جەتكىزدى. بىراق ناۋقان بىتكەن سوڭ ولاردى الىپ تاستاپ, تازالىقتى قامتاماسىز ەتۋ – ءار ازاماتتىڭ مىندەتى. بۇل تەك تازالىق ەمەس, ءبىزدىڭ مادەنيەتىمىزدىڭ دەڭگەيىن كورسەتەدى, – دەدى «Amanat» پارتياسى الماتى وبلىستىق فيليالىنىڭ وكىلى اسەم ەليمانوۆا.
باستىسى, تازالىق اكتسياسى الماتى وبلىسىمەن شەكتەلمەي, ەلىمىزدىڭ باسقا وڭىرلەرىندە دە جالعاسىپ جاتىر.
– ءبىز تەك ۇگىت-ناسيحات كەزەڭىندە عانا بەلسەندى بولعىمىز كەلمەيدى. ناۋقان اياقتالعان سوڭ, ارتىنا قوقىس قالدىرىپ كەتۋ – جات قىلىق. سوندىقتان وسى اكتسيا اياسىندا ەلدىڭ جاۋاپكەرشىلىكتى سەزىنۋىنە ۇلگى بولعىمىز كەلەدى. بۇل – ءبىزدىڭ ەلگە, قوعامعا جانە ءوز تاڭداۋىمىزعا دەگەن قۇرمەتىمىز. قاراپايىم قادام بولسا دا, ونىڭ ماڭىزى زور, – دەدى «جاستار رۋحى» جق-نىڭ بەلسەندىسى مەدەت بەكبەرگەنوۆ.