سوڭعى بىرنەشە جىل بەدەرىندە تاراز تورىندە «كۇزگى اۋەن» اتاۋىمەن كلاسسيكالىق اندەر كەشى تۇراقتى تۇردە ۇيىمداستىرىلىپ ءجۇر. سارا كۇزدىڭ ءىڭىرى دە سالقىن كەلەدى. سوعان قاراماستان اشىق اسپان استىندا وتەتىن كەرەمەت كەشتى تارازدىق ونەرسۇيەر قاۋىم اسىعا كۇتەدى. ولار ءۇشىن ساياباقتىڭ سالقىنىن التىن داۋىس يەلەرىنىڭ ونەرى جىلىتىپ جىبەرەتىن سەكىلدى. ايتەۋىر ونەر كەشىن تاماشالاۋشىلاردىڭ سانى ەشقاشان ازايعان ەمەس.
داستۇرگە ساي «كۇزگى اۋەن» كەشى بيىل دا ۇيىمداستىرىلدى. «جەڭىس» ساياباعىنا اعىلعان جۇرت قازاقستاننىڭ ەڭبەك سىڭىرگەن ءارتىسى مايرا مۇحامەدقىزى باستاعان بەكزات ونەر يەلەرىنىڭ داۋسىن ساعىنىپ-اق قالعان سياقتى. كىم ءبىلسىن, سولاي دا شىعار. ايتەۋىر ونەر كەشىن تاماشالاۋعا كەلگەندەردىڭ كوبىسىن جىعا تانىماساق تا, شىرامىتاتىن بولىپپىز. بالكىم ولار ءدال وسى كەشكە جىل سايىن كەلەتىن بولار.
كۇزدىڭ سالقىن سامالى كەكىلىڭدى تارايتىن ىڭىردە باستالعان ونەر كەشىندە مەملەكەتتىك سىيلىقتىڭ لاۋرەاتى مايرا مۇحامەدقىزى حالىق ءانى «بۇلدىرگەن» مەن «گۇلدەرايىم» ءانىن شىرقاپ, جەرگىلىكتى جۇرتشىلىقتىڭ جانىن جىلىتتى. مايرانىڭ مىڭ قۇبىلتا قۇيقىلجىتىپ شىرقاعان التىن داۋسى ساياباققا جينالعان جۇرتشىلىقتى ەلىتىپ جىبەرسە كەرەك, ولاردىڭ قوشەمەتى ۇزاققا سوزىلدى.
بەكزات ونەر سالتانات قۇرعان كەش بارىسىندا سۇندەت بايعوجين ورىنداعان «يرودانىڭ ارياسى», «Kazakh Quartet» ۇجىمى جۇرتتىڭ جۇرەگىنە جەتكىزگەن ۆيۆالدي مەن موتسارتتىڭ ايگىلى تۋىندىلارى دا ونەرسۇيەر قاۋىمدى بەيجاي قالدىرعان جوق. سونداي-اق اۋليەاتالىق الەۋمەت شىڭعىس ايتماتوۆتىڭ ايگىلى ء«جاميلا» شىعارماسىنىڭ جەلىسىمەن جازىلعان يليا جاقانوۆتىڭ «دانياردىڭ ءانى» تۋىندىسىنا دا ايرىقشا قوشەمەت كورسەتتى. جۇمابەك قاڭتارباەۆ ءوز دەڭگەيىندە ورىنداپ شىققانىن ايتا كەتكەن ءجون.
كۇزدىڭ سالقىن سامالىنداي ادام جانىن باۋراعان «كۇزگى اۋەن» كلاسسيكالىق اندەر كەشىن اۋليەاتالىق الەۋمەتپەن بىرگە وبلىس اكىمىنىڭ ورىنباسارى سەرىك سالەموۆ, تاراز قالاسىنىڭ اكىمى باقىتجان ورىنبەكوۆ باستاپ وزگە دە شەنەۋنىكتەر تاماشالادى. ونەر الەمىندە ءوز بيىگىن باعىندىرعان بەلگىلى انشىلەردىڭ شەبەرلىگىنە جەرگىلىكتى جۇرتپەن بىرگە قۇرمەت كورسەتتى.
تاراز