تەاتر – ونەردىڭ بيىك ورداسى. ونىڭ كيەلى ساحناسىندا كوڭىل كۇي, قۋانىش پەن ءسۇيىنىش, اق جەلكەن ارمان, سەزىم, ومىرگە دەگەن كوزقاراس, ىشتەي تولعانىس, دۇنيەتانىم – ءبارى-ءبارى استاسىپ جاتادى. مىنە, استاناعا جولىم ءتۇسىپ, تاعى دا اۋلاسى گۇل جايناعان ونەر ورداسى مۋزىكالىق جاس كورەرمەن تەاترى عيماراتى الدىندا تۇرمىن. بۇل ۇزدىك جاڭا قويىلىمدارىمەن تەاتر سۇيەر كورەرمەنىن ءتانتى ەتەتىن, جان دۇنيەمىزگە رۋحاني بايلىق سىيلايتىن قاسيەتتى مەكەن ەكەنى جۇرتشىلىققا ايان.
مەن مۇندا اباي مەن توعجان, ءشامشى, مۇقاعالي, تاستان مەن سالتانات, قايىركەنمەن قايتا قاۋىشۋعا كەلدىم. قازاقستان قالالارىنا گاسترولدىك ساپارمەن كەلگەندە دە جەرگىلىكتى حالىق مۋزىكالىق جاس كورەرمەن تەاترى سپەكتاكلدەرىن ەرەكشە ىستىق ىقىلاسپەن تاماشالايتىنىن ءجيى ەستىپ ءجۇرمىن. ءباسپاسوز بەتتەرىندە دە از جاريالانىپ جاتقان جوق.
تەاتر. ساحنا شىمىلدىعى... كورەرمەن قوشەمەتىنىڭ بەلگىسى – قول شاپالاقتاۋدان كەيىن سپەكتاكل باستالىسىمەن-اق, جۇرەك تەبىرەنىپ, كوڭىل شىركىننىڭ سەزىمگە تولى پەرنەلەرىن شەرتەرى ءسوزسىز. كەيىپكەرلەرمەن بىرگە ءبىر كەمەدە جۇزگەندەي كۇي كەشەسىڭ.
شىمىلدىق جابىلادى. قويىلىم سوڭىنداعى كورەرمەننىڭ قوشەمەتى اكتەرلەر ونەرى مەن ولاردىڭ ەڭبەگىنە دەگەن جوعارى باعا ەمەس پە؟ باس يۋ مەن قۇرمەت بەلگىسى دەپ بىلەمىن.
ءبىراز ۋاقىتقا دەيىن قويىلىم اسەرىنەن شىعا الماي, سول سەزىم جەتەگىندەگى كورەرمەن قالاعان تەاترىنا قايتا-قايتا بارارى ءسوزسىز...
عازيزا ءالىباي
تۇركىستان وبلىسى,
ورداباسى اۋدانى