رەفەرەندۋم وتكىزۋ جونىندەگى ورتالىق كوميسسيا اۋقىمدى جۇمىس اتقاردى. رەفەرەندۋم جاريالانعان كۇننەن باستاپ ءبىر اي ىشىندە ۋچاسكەلىك كوميسسيالاردىڭ قىزمەتكەرلەرىن وقىتۋ, ترەنينگ, سەمينار وتكىزۋ, تەحنيكالىق جاراقتاندىرۋ, رەفەرەندۋمدا داۋىس بەرۋشىلەردىڭ ءتىزىمىن جاساۋ بويىنشا وراسان زور ۇيىمداستىرۋشىلىق-تەحنيكالىق جۇمىس جۇرگىزىلدى.
حالىقارالىق ميسسيالاردىڭ قىزمەتكەرلەرى رەفەرەندۋم وتكىزۋ جونىندەگى ورتالىق كوميسسيانىڭ قىزمەتكەرلەرىمەن بىرنەشە رەت كەزدەسىپ, رەفەرەندۋم وتكىزۋ جونىندەگى ۋچاسكەلىك جانە وكرۋگتىك كوميسسيالارعا باردى. اسىرەسە تابيعي اپاتتان زارداپ شەككەن وڭىرلەر باستى نازاردا بولدى. ونداعى حالىقتىڭ ناۋقانعا اتسالىسۋى, ۋچاسكەلەردىڭ دايىندىعى مەن حالىقارالىق ستاندارتقا ساي ءوتۋى قاداعالاندى.
تمد بايقاۋشىلارى شانحاي ىنتىماقتاستىق ۇيىمى, تۇركى مەملەكەتتەرى ۇيىمى جانە اوسشك وكىلدەرىمەن تىعىز بايلانىستا جۇمىس ىستەدى. ازەربايجان, بەلارۋس, قىرعىزستان, تاجىكستان, وزبەكستان, رەسەي ەلدەرىنەن 74 ادام اككرەديتتەلدى. بۇعان قوسا ميسسيانىڭ قۇرامىنا تمد اتقارۋ كوميتەتىنىڭ قىزمەتكەرلەرى كىرەدى.
تمد ەلدەرىنەن كەلگەن 74 بايقاۋشى ەلدىڭ 9 وڭىرىندەگى داۋىس بەرۋ ۋچاسكەلەرىنە باردى. بۇل – اقمولا, شىعىس قازاقستان, باتىس قازاقستان, ماڭعىستاۋ, تۇركىستان وبلىستارى مەن استانا, الماتى, شىمكەنت قالالارى.
اتوم ەلەكتر ستانساسىن سالۋ ماسەلەسى بويىنشا جالپىۇلتتىق رەفەرەندۋمدا داۋىس بەرۋ رەفەرەندۋمدار مەن سايلاۋ ناۋقاندارىن وتكىزۋدى رەگلامەنتتەيتىن ەلدىڭ ىشكى زاڭناماسىنا سايكەس ءوتتى. قازاقستاندا بۇعان دەيىن وتكەن سايلاۋ ناۋقاندارىنا باقىلاۋ جۇرگىزۋ تاجىريبەمىزگە سۇيەنە, زاڭ بۇزۋشىلىق بولمايدى دەپ بولجادىق. رەفەرەندۋمعا قاتىسقان ازاماتتاردىڭ بەلسەندىلىگى مەن مادەنيەتى جوعارى دەڭگەيدە ەكەنىن بايقادىق.
لەونيد انفيموۆ,
تمد بايقاۋشىلار ميسسياسىنىڭ باسشىسى