سەنات دەپۋتاتتارى ناۋرىزباي بايقاداموۆ پەن رۋسلان رۇستەموۆ الماتى قالاسىنا بارىپ, يادرولىق فيزيكا ينستيتۋتىنىڭ جۇمىسىمەن تانىستى, سونداي-اق قازاقستان-بريتان تەحنيكالىق ۋنيۆەرسيتەتىنىڭ ۇجىمىمەن كەزدەستى.
ۋنيۆەرسيتەت وقىتۋشىلارى مەن ستۋدەنتتەرىمەن كەزدەسۋدە اتوم ەنەرگەتيكاسىندا كوپ جىلدىق تاجىريبەسى بار حالىقارالىق كومپانيالاردىڭ اەس قۇرىلىسىنا قاتىسۋ ماسەلەسى تالقىلاندى. جوبانىڭ قاۋىپسىزدىگىن اتوم ەنەرگياسى جونىندەگى حالىقارالىق اگەنتتىك باقىلايدى, ال شىعىندار دۇنيەجۇزىلىك بانكتىڭ قاداعالاۋىمەن قوسا ءۇش دەڭگەيلى اۋديتتەن وتەدى.
سەناتور رۋسلان رۇستەموۆتىڭ ايتۋىنشا, اتوم ونەركاسىبىندەگى وتاندىق كاسىپورىنداردىڭ رولىنە ەرەكشە نازار اۋدارىلدى. «قازاتومونەركاسىپ» كومپانياسىندا ۋران وڭدەلەدى ءارى يادرولىق وتىن قالدىعى جيناقتالىپ كومىلەدى. ەلىمىزدە يادرولىق رەاكتورلار جارتى عاسىردان اسا ۋاقىت جۇمىس ىستەپ كەلەدى. شيكىزاتتىق ەمەس الەۋەتتى دامىتۋ ءۇشىن اتوم ەنەرگياسىن ءتيىمدى پايدالانۋعا باعىتتالعان عىلىمي جوبالاردى جۇزەگە اسىرۋ قاجەت.
«ەلىمىزدىڭ شيكىزاتتىق ەمەس الەۋەتىن دامىتۋدا يادرولىق فيزيكا ينستيتۋتى عالىمدارىنىڭ زياندى ورگانيكالىق زاتتاردىڭ, زياندى ميكروورگانيزمدەردىڭ, سۋدان رادياتسيالىق وڭدەۋ ارقىلى تارالاتىن اۋرۋلاردىڭ, حيميالىق رەاكتسيالاردىڭ اسەرى تۋرالى جوبالارىن جۇزەگە اسىرۋعا ۋاقىت قالعان جوق. ينستيتۋت عالىمدارى وزونداۋعا قاراعاندا, رادياتسيالىق وڭدەۋدىڭ ۇنەمدى ەكەنىن جانە حلورلاۋدان الدەقايدا ءتيىمدى بولاتىنىن, سونىمەن قاتار الەمدەگى ازىق-ت ۇلىك تاپشىلىعىن وتەيتىنىن ەرتەدە دالەلدەگەن ەدى. بەيبىت اتومنىڭ ەل ەكونوميكاسىنداعى الەۋەتىن ارتتىرۋ مەن ونىڭ ونەركاسىپتەگى جەتىستىكتەرىن ءتيىمدى پايدالانۋعا باعىتتالعان جوبالارعا جول اشۋ كەرەك», دەدى ر.رۇستەموۆ.
سونىمەن قاتار دەپۋتاتتار الداعى رەفەرەندۋمنىڭ ماڭىزىنا توقتالىپ, ونى ازاماتتار مەن مەملەكەت اراسىنداعى ساياسي مادەنيەت پەن سەنىمدى نىعايتۋدىڭ ماڭىزدى قۇرالى دەپ اتادى. ولار وتانداستارىمىزدى داۋىس بەرۋگە بەلسەندى قاتىسۋعا شاقىردى.