اۋستريادا وتكەن پارلامەنت سايلاۋىنا العاش رەت ەلىمىزدىڭ وكىلى, ورتالىق سايلاۋ كوميسسياسىنىڭ توراعاسى نۇرلان ءابدىروۆ بايقاۋشى رەتىندە قاتىسىپ, ەۋروپالىق سايلاۋ ۇلگىسىن كورىپ قايتتى.
پارلامەنتىنىڭ تومەنگى پالاتاسىنا 183 دەپۋتاتتى سايلاۋ ءۇشىن ەل اۋماعىندا 10 مىڭعا جۋىق سايلاۋ ۋچاسكەسى ۇيىمداستىرىلىپ, وعان 6,3 ملن تۇرعىن كەلىپ داۋىس بەردى. ەلدىڭ جوعارعى زاڭ شىعارۋشى ورگانىنا كىرۋ ءۇشىن 11 پارتيا كەمىندە 4 پايىز داۋىس جيناۋى كەرەك بولاتىن. الدىن الا ناتيجە بويىنشا 29,1% داۋىس جيناعان اسىرەوڭشىل ەركىندىك پارتياسى العاشقى ورىندا تۇر. ەكىنشى ورىندا – 26,2% جيناعان اۋستريا حالىق پارتياسى. سوتسيال-دەموكراتيالىق پارتيا 20,4% داۋىسپەن ۇزدىك ۇشتىكتى تۇيىندەپ تۇر.
اۋستريالىق تاراپتىڭ شاقىرۋىمەن العاش رەت ءبىزدىڭ ەلدەن بارعان وكىل ن.ءابدىروۆ بۇل ساياسي ناۋقاننان بىرقاتار جاڭاشىلدىقتى بايقاعانىن جەتكىزدى.
«ۆەنا قالاسىندا ءبىرسىپىرا سايلاۋ ۋچاسكەلەرىندە بولدىم. داۋىس بەرۋ ۇدەرىسى جاقسى دەنگەيدە ءوتتى. كەلگەن ادامداردىڭ باسىم كوبى ەگدە جاستاعىلار ەكەنىن بايقادىم. كوميسسيا دا ءوز جۇمىسىن ءتيىستى دەڭگەيدە اتقاردى», دەپ ويىمەن ءبولىستى ول.
ۆەناداعى سايلاۋ ۋچاسكەسىنىڭ توراعاسى مارسەل فۋشيبەگا بيىل العاش رەت قازاقستاننان بايقاۋشىنىڭ كەلۋى ءبىر جاعىنان ءوزىن تاڭعالدىرسا, ەكىنشى جاعىنان جاڭا ەلدەردىڭ بۇل ناۋقانعا قىزىعۋشىلىق تانىتا باستاعانى قۋانتقانىن جەتكىزدى.
«مەن بۇل جەردە 11 جىلدان بەرى جۇمىس ىستەيمىن. بيىل العاش رەت قازاقستاننان بايقاۋشىنىڭ كەلۋى سايلاۋ ۋچاسكەسىنىڭ توراعاسى رەتىندە مەنى قاتتى قۋانتادى», دەدى ول.
اۋسترياداعى سايلاۋ جۇيەسىنىڭ وزىنە ءتان بىرقاتار ەرەكشەلىگى بار. ماسەلەن, كەيىنگى جىلدارى ەنگىزىلگەن وزگەرىستەردىڭ ءبىرى – پوشتا ارقىلى داۋىس بەرۋ, سونداي-اق داۋىس بەرۋشىلەردىڭ جاسىن تومەندەتۋ.
«وتكەن سايلاۋدا 1 ميلليون ادام پوشتامەن داۋىس بەرگەن. ال بيىل 1,5 ميلليون ادام وسى جولمەن داۋىس بەرۋگە جۇگىنىپتى. سونىمەن قاتار داۋىس بەرۋ جاسىن 18-دەن 16 جاسقا دەيىن تومەندەتكەن. بۇل ساياسي ۇدەرىستەرگە جاستاردى كوبىرەك تارتۋ ماقساتىندا جاسالىپ وتىر», دەيدى ورتالىق سايلاۋ كوميسسياسىنىڭ توراعاسى ن.ءابدىروۆ.
ۆەناعا جۇمىس ساپارى اياسىندا ول اۋستريانىڭ فەدەرالدىق سايلاۋ جۇيەسىنىڭ باسشىسى گرەگور ۆەندامەن كەزدەستى.
ء«بىز الداعى ۋاقىتتا وسى مەملەكەتتىڭ سايلاۋ ورگانىمەن ءوزارا قارىم-قاتىناسىمىزدى دامىتۋعا ۋادەلەستىك. گرەگور ۆەندا مىرزامەن كەزدەسۋىمىز ناتيجەلى بولدى», دەدى ن.ءابدىروۆ.
ايتا كەتسەك, اۋسترياداعى سايلاۋ ۋچاسكەلەرى كەشە جەرگىلىكتى ۋاقىت بويىنشا ساعات 17.00-دە جابىلىپ, پارلامەنتتىك سايلاۋدىڭ الدىن الا ناتيجەلەرى جاريالاندى. ال رەسمي ناتيجە 16 قازاندا ءمالىم بولماق.