قازاق-بريتان تەحنيكالىق ۋنيۆەرسيتەتىندە پرەزيدەنت جانىنداعى ۇلتتىق عىلىم اكادەمياسىنىڭ ۇيىتقى بولۋىمەن مەملەكەت باسشىسى جولداۋىن ىسكە اسىرۋ اياسىندا «قازاقستان عىلىمىنىڭ قازىرگى جاعدايى مەن دامۋ كەلەشەگى» اتتى عىلىمي-پراكتيكالىق كونفەرەنتسيا ءوتتى. وعان عىلىم جانە جوعارى ءبىلىم مينيسترلىگىنىڭ وكىلدەرى, ۇعا اكادەميكتەرى, جوعارى وقۋ ورىندارى مەن عىلىمي زەرتتەۋ ينستيتۋتتارىنىڭ باسشىلارى, ەلىمىزدىڭ جانە شەتەلدىڭ جەتەكشى عالىمدارى, تاۋەلسىز ساراپشىلار, سونداي-اق وتاندىق عىلىمدى دامىتۋعا بەلسەنە اتسالىساتىن جاس عالىمدار قاتىسىپ, عىلىمدى دامىتۋ مەن جاس ماماندار الەۋەتىن ارتتىرۋعا قاتىستى وي-پىكىرلەرىمەن ءبولىستى.
جيىندا پرەزيدەنت جانىنداعى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ مەملەكەت باسشىسىنىڭ جولداۋىندا ەلىمىزدىڭ الەۋمەتتىك دامۋى مەن ەكونوميكانىڭ يننوۆاتسيالىق الەۋەتىن كۇشەيتۋگە بايلانىستى اسا ماڭىزدى مىندەتتەر قويىپ وتىرعانىن اتاپ ءوتتى.
«بۇل تاپسىرمانى جۇزەگە اسىرۋدا عالىمدارعا ەرەكشە جاۋاپكەرشىلىك جۇكتەلەدى. سوندىقتان عىلىمنىڭ كۇش-قۋاتى عىلىمي زەرتتەۋلەردىڭ تيىمدىلىگىن ارتتىرۋعا, زەرتتەۋ قىزمەتىنە بولىنگەن قاراجاتتى دۇرىس پايدالانۋعا, ونىڭ ناتيجەسىن وندىرىسكە ەنگىزۋگە باعىتتالۋعا ءتيىس. بۇل رەتتە قايتا قۇرىلعان پرەزيدەنت جانىنداعى ۇلتتىق عىلىم اكادەمياسى جەتەكشى ءرول اتقارادى. ماسەلەن, عىلىمي زەرتتەۋلەر دەڭگەيىن ارتتىرۋ, عىلىمدى باسقارۋ مودەلىن جەتىلدىرۋ, ەكونوميكانى ءارتاراپتاندىرۋ مەن قوعامدى دامىتۋعا عىلىمنىڭ باسىم باعىتتارىن انىقتاۋ قاجەت. وكىنىشكە قاراي, عىلىمدى قارجىلاندىرۋ كولەمى ۇلعايعانىمەن, زەرتتەۋ باعىتتارى كەنجەلەپ قالدى. وسى ورايدا ۇعا ەكونوميكانىڭ ناقتى سەكتورىن دامىتۋدا باسىم باعىتتاعى زەرتتەۋلەردى قارجىلاندىرۋعا كوڭىل ءبولىپ, ونىڭ تيىمدىلىگىن ارتتىرۋدى ىسكە اسىرادى», دەدى ول.
سونداي-اق كونفەرەنتسيا بارىسىندا ساراپشىلار عىلىمدى تسيفرلاندىرۋ, جاساندى ينتەللەكتىنى دامىتۋ, دەنساۋلىق ساقتاۋ جۇيەسىن رەفورمالاۋ, اۋىل شارۋاشىلىعىن دامىتۋعا باعىتتالعان مەملەكەتتىك قولداۋ شارالارىن جەتىلدىرۋ جانە جولداۋدا كورسەتىلگەن باسقا دا ماڭىزدى ماسەلەلەردى ىسكە اسىرۋعا بايلانىستى ۇسىنىستارىن ورتاعا سالدى.
الماتى