ەلىمىز بويىنشا ناتري ءتسيانيدىن وندىرەتىن العاشقى زاۋىت تالاس اۋدانىنىڭ اۋماعىنا سالىنعان ەدى. وتكەن جىلى «Talas Investment» جشس شەت مەملەكەتتەردەن تاسىمالداناتىن شيكىزاتقا دەگەن تاۋەلدىلىكتى تۇبىرىمەن جويدى. التىن وندىرىسىنە ايرىقشا قاجەتتى باعالى مەتالدى باسقا قوسپالاردان اجىراتۋ ءۇشىن قولدانىلاتىن رەاگەنت جامبىل وبلىسىندا ءوندىرىلىپ جاتقانىنا دا ون جىلدان استى.
2014 جىلى ىسكە قوسىلعان زاۋىت جىل وتكەن سايىن ءوندىرىس كولەمىن ارتتىرىپ, قۇلاشىن كەڭگە سەرمەدى. كاسىپورىن قازىر ءوڭىر ەكونوميكاسىنا ايتارلىقتاي تابىس ءتۇسىرىپ وتىر. مۇندا وندىرىلەتىن ناتري ءتسيانيدى مەن امموني سۋلفاتى وتاندىق نارىقتى قامتىپ قويماي, بىرنەشە شەت مەملەكەتكە ساتىلادى. زاۋىت باسشىلارى كەلتىرگەن دەرەككە جۇگىنسەك, كاسىپورىننىڭ جىلدىق قۋاتى 15 مىڭ توننا ناتري ءتسيانيدىن وندىرۋگە قاۋقارلى. سۇرانىس بولسا, بۇل مەجەنى باعىندىرۋ قيىن ەمەس. جۇزدەگەن ازاماتتى تۇراقتى جۇمىسپەن قامتىپ وتىرعان زاۋىت جۇمىسىن ىلگەرىلەتۋ باعىتىندا دا اۋىز تولتىرىپ ايتارلىقتاي جۇمىس اتقارىلىپ جاتىر.
ءبىرشاما ۋاقىت بۇرىن سەرىكتەستىككە قاراستى ناتري ءتسيانيدى زاۋىتىنىڭ ەكىنشى كەزەڭىنىڭ قۇرىلىسى باستالدى. قۇرىلىس جۇمىسى جوعارى قارقىنمەن جۇرگىزىلىپ جاتىر. دەرەككە جۇگىنسەك, جۇمىس الداعى جىلى تولىققاندى اياقتالۋعا ءتيىس. ناتيجەسىندە, كاسىپورىننىڭ وندىرىستىك قۋاتى ەكى ەسە ارتادى.
«سەرىكتەستىككە قاراستى ناتري ءتسيانيدى زاۋىتى ەكىنشى كەزەڭىنىڭ جۇمىسى بەلسەندى ءجۇرىپ جاتىر. قۇرىلىس جۇمىستارى تولىق بىتكەننەن كەيىن زاۋىتتىڭ وندىرىستىك قۋاتى 30 مىڭ تونناعا جەتەدى», دەيدى سەرىكتەستىك باسشىسىنىڭ ورىنباسارى ابدىعالي ءجۇنىسوۆ.
وسىدان سوڭ كومپانيانىڭ قارجىلىق احۋالىنا توقتالعان ورىنباسار: جوبا ىسكە قوسىلعاننان كەيىن 300 جاڭا جۇمىس ورنى اشىلادى. قۇرىلىس جۇمىسىن جۇرگىزۋ ءۇشىن جەكە قارجىدان بولەك, «قازاقستان دامۋ بانكى» مەن «بايتەرەك» حولدينگىنەن ينۆەستيتسيا تارتىلدى. قىسقاسى, ەكىنشى كەزەڭ جۇمىسى اياقتالعاننان كەيىن جىلدىق ءونىم كولەمى ايتارلىقتاي ارتادى», دەپ ءوز ءسوزىن تۇيىندەدى.
«Talas Investment Company» جشس ديرەكتورىنىڭ ورىنباسارى كەلتىرگەن دەرەك بويىنشا, زاۋىت وتكەن جىلى 13 800 توننا ناتري ءتسيانيدىن, 4 666,500 توننا امموني سۋلفاتىن ءوندىرىپ, وتاندىق نارىققا جانە ەكسپورتقا جونەلتىپتى. وسى جىلدىڭ تامىز ايىنا دەيىن 79 89,36 توننا ناتري ءتسيانديدى, 2 754,400 توننا امموني سۋلفاتى وندىرىلگەن.
«تاۋارعا نەگىزىنەن موڭعوليا, قىرعىز رەسپۋبليكاسى, تاجىكستان مەملەكەتتەرىنەن سۇرانىس ارتىپ وتىر. قازىر كاسىپورىندا 624 ازامات جۇمىسپەن قامتىلعان. ولاردىڭ ورتاشا جالاقىسى 292 362 تەڭگەنى قۇرايدى», دەيدى ابدىعالي ءجۇنىسوۆ.
ءوندىرىس وشاعى قالدىقسىز تەحنولوگياعا نەگىزدەلگەن. كاسىپورىنعا قاجەتتى شيكىزات رەتىندە گاز بەن كەن قوسپالارى پايدالانىلادى. زاۋىتتىڭ ءوڭىر ەكولوگياسىنا ەشقانداي زيانى جوق. ال جوعارى تەمپەراتۋرادا اجىراتىلعان امموني سۋلفاتىن تىڭايتقىش رەتىندە پايدانۋعا بولادى.
جامبىل وبلىسى,
تالاس اۋدانى