ءماتىنى مەن اۋەنى ۇيلەسىم تاپقان ءاننىڭ جۇرەككە جىلى تيەتىنى بار. كەيدە ءار ادام ءوزىنىڭ بوزبالالىق شاعىن, بالالىق كەزىن اڭسايتىن, ساعىناتىنداي كورىنەدى. كوڭىلدىڭ تۇكپىرىندە قالىپ قويعان ەسكىرمەيتىن شىعارمالار ساعىمعا اينالعان سول ءبىر ءمولدىر جىلداردىڭ ەستەلىگىن ەسىڭە سالاتىن سەكىلدى. ىشكى جان دۇنيەڭدە بەيمالىم ءبىر الاساپىران كۇي ويناپ قويا بەرەدى. جانىڭدى تىنىشتاندىرعىڭ كەلىپ, رەتروعا اينالا باستاعان اندەردى تىڭدايسىڭ...
زىمىرانداي زۋلاعان ۋاقىتتىڭ كوشىن كەرى قايتاراتىن, بالالىق شاققا ساپار شەكتىرەتىن قايرات ەشكىمدە جوق. سىرتى توتىداي تارانىپ تۇرسا دا, ءتۇرلى مۋزىكالىق تاسىلمەن سىرلاپ ارلەسە دە, ماتىنىنەن ءمان كەتكەن اندەر كوڭىلدىڭ قوشىن كەلتىرە المايتىنى انىق. سودان دا بولار, الىستا قالعان ارمان جىلدارعا ساپار شەگىپ, سول كەزدىڭ وشپەس تۋىندىلارىمەن جانىڭدى ەمدەگەندەي كۇي كەشەسىڭ.
ءيا, 2005–2006 جىلدارى قازاق ەستراداسىندا كىشىگىرىم «توڭكەرىس» جاساعان جىگىتتەر از بولعان جوق. «ازيا» سەكىلدى وزگە دە بىرنەشە توپ شىرقاعان اندەر ءالى كۇنگە سانادان دا, جۇرەكتەن دە وشپەگەن سىڭايلى. ويتكەنى ولار قۇدىرەتتى ونەرگە دەگەن ادالدىقتىڭ انتىنان تايعان ەمەس. تەرەڭىنە تارتا تۇسەتىن تاماشا شىعارمالاردى ساعىناتىندار ءالى دە از ەمەس-اۋ. ونى اۆتوكولىك جۇرگىزۋشىلەرىنىڭ تالعامىنان دا بايقاپ ءجۇرمىز. بۇگىن دە تاكسيدە وتىرىپ, ەسكى اندەردىڭ ءبىرىن تىڭداپ, جاۋراعان جانىمىزدى جىلىتقانداي بولدىق.
«وزىڭمەن قالسام كەزىگىپ,
عاجايىپ ءبىر كۇي تۋاتىن.
ەكەۋمىز عانا سەزىنىپ,
ەكەۋمىز عانا ۇعاتىن»,
دەپ باستالاتىن ليريكالىق ءان كوڭىل قاتپارىنداعى بەيمالىم سەزىم الاۋىن تۇتاتىپ جىبەرگەندەي بولدى. ءاننىڭ باستالۋىنان دا, قايىرماسىنان دا رومانتيكالىق سارىن ەسىپ تۇر. بىرەۋگە از, بىرەۋگە كوپ شىعار... ول جاعىن كىم ءبىلسىن؟ 18-20 جىل بۇرىن حيتكە اينالعان شىعارما ءبىزدىڭ زامانداستارعا ءۇشىن ديدارىنا داق تۇسپەيتىن ماحاباتتىڭ گيمنىندەي بولعان ەدى. ءسوزى مەن سازى ۇيلەسىم تاپقان ءان راسىندا دا ويىڭدى ونعا ءبولىپ, كوڭىل تۇكپىرىندەگى قۇپيا ساندىقتىڭ قۇلپىن اشىپ جىبەرەتىندەي قۇدىرەتكە يە مە دەرسىڭ. ادەمى اۋەنگە تارتىمدى ءسوز جازعان اقىننىڭ شەبەرلىگى دە بايقالادى.
شالقىعان كوڭىلمەن عالامتوردى اشتىق, پەرنەتاقتانى باستىق. ەستى ءاننىڭ ءسوزى كوكەيىمىزدە سايراپ تۇرسا دا, ءماتىن اۆتورى كىم ەكەنىنە وسى كۇنگە دەيىن نازار اۋدارماپپىز. ەندى بىلدىك. تاماشا تۋىندىنىڭ ءسوزىن بەلگىلى اقىن بايانعالي ءالىمجان جازعان ەكەن. قىسقاسى, تۇسىنگەندەي بولدىق. سۇيەگىنە ءسوز قونعان ادام جازعان سوڭ شىعار, «عاجايىپ كۇي» ءانى ءالى كۇنگە دەيىن جانىمىزعا عاجايىپ جىلۋ سىيلاپ تۇرعانى.
اۋەندى جازعان ايتۋلى اقىن بايانعالي ءالىمجانوۆتىڭ ۇلى –نۇرلان ءالىمجانوۆ. اكتەرلىگى مەن انشىلىگىنەن كومپوزيتورلىعى دا كەم تۇسپەيتىنىن بايقادىق. وسىلايشا, كەزدەيسوق ىزدەنىس ارقىلى عالامات ءاننىڭ اكە مەن ۇل اراسىنداعى شىعارماشىلىق تاندەم ناتيجەسى ەكەنىن بىلدىك. سودان دا بولار, بۇل شىعارما ناعىز رەتروعا اينالىپ كەتتى.
«ايتۋىم كەرەك بولسا دا,
ءسوز تابۋ قيىن مۇندايدا.
ايىم-اۋ مەنى قيناماي,
ايتقىزباي بىلسەڭ بولماي ما؟
الاۋلاپ نۇرىڭ جۇزىڭنەن,
بوتاداي كوزىڭ مولدىرەپ.
جارق ەتە قالعان كەزىڭدە,
كەتەدى جانىم ەلجىرەپ»,
دەپ كەلەتىن ءاننىڭ قايىرماسىنداعى تارماقتار دا جادىمىزدا جاتتالىپ قالعان. ءدال وسى شۋماقتاردى «ازيا» توبىنىڭ ورىنداۋىندا تىڭداعان كەزدە, ءوزىڭنىڭ دە جانىڭ مەن جۇرەگىڭ ەلجىرەپ كەتەتىنى داۋسىز. ءبىر سوزبەن ايتقاندا, ءان, ءانشى, اقىن ۇشتىگى ءبىر-ءبىرىن اينا-قاتەسىز تاپقانىنا ەشقانداي كۇمان كەلتىرە المايسىڭ.
ءبىزدىڭ بۋىننىڭ ەسىنەن كەتپەيتىن «عاجايىپ كۇي» ءانىن ورىنداعان انشىلەر از ەمەس ەكەن. مۇنى دا سول ينتەرنەتتەن كورىپ, كوڭىل تولقىدى. ايتكەنمەن, ءبىز ءۇشىن «ازيا» توبىنىڭ ورىنداۋى بولەكتەۋ كورىنەتىن سەكىلدى. قۇلاعىمىزعا سولاردىڭ ءۇنى ءسىڭىپ قالدى ما, كىم ءبىلسىن...
عاجاپ شىعارمانىڭ قايىرماسىندا جازىلعانداي, ء«سوز تابۋ» قيىنعا اينالسا دا, جان دۇنيەمىزدىڭ تۇكپىرىنەن شىققان ءسوزدى ايتىپ وتىرمىز. ارينە, ءار ادامنىڭ ءوز تالعامى بار. قالاي دەسەك تە, ەستى تىڭدارمان باردا, ەسكى ءاننىڭ تابيعاتىنداعى اۋەن ەشقاشان وشپەيتىن سەكىلدى. ويتكەنى بىزدىڭشە «عاجايىپ كۇي» – شوقتىعى بيىك تۋىندى.