قازاق ۇلتتىق قىزدار پەداگوگيكالىق ۋنيۆەرسيتەتىنە مەملەكەت تاراپىنان جاڭا عيمارات پايدالانۋعا بەرىلدى. باق وكىلدەرىنە ارنالعان ءباسپاسوز تۋرىندا ۋنيۆەرسيتەت رەكتورىنىڭ مىندەتىن اتقارۋشى ەركىن ءدۇسىپوۆ جاڭا عيماراتتا ورنالاسقان زەرتحانالار, مۇراجاي, ستۋدەنتتەرگە ارنالعان زاماناۋي جاعدايمەن تانىستىردى, دەپ حابارلايدى Egemen.kz.
80 جىلدىق تاريحى بار قازاق ۇلتتىق قىزدار پەداگوگيكالىق ۋنيۆەرسيتەتى ستۋدەنتتەرى 1986 جىلدان بەرى العاش رەت جاڭا عيماراتقا قول جەتكىزىپ وتىر. جاڭا عيماراتتىڭ جالپى اۋدانى 12 000 شارشى مەتردەن اسادى.
ەركىن ءدۇسىپوۆ وقۋ ورنىنىڭ جەتىستىكتەرى مەن دامۋ بارىسى تۋرالى اقپارات بەرىپ, ءبىلىم بەرۋ ۇردىسىندەگى وزىق ادىستەر, جاڭا تەحنولوگيالارمەن تانىستىردى.
«80 جىلدىق مەرەيتوي قارساڭىندا قازاق ۇلتتىق قىزدار پەداگوگيكالىق ۋنيۆەرسيتەتىنە جاڭا وقۋ كورپۋسىنىڭ بەرىلۋى QyzPU ۇجىمى ءۇشىن تاريحي وقيعا بولدى. قازىرگى تاڭدا مۇندا حورەوگرافيا, پەداگوگيكا, پسيحولوگيا, تاريح, قازاق ءتىلى مەن ادەبيەتى ماماندىقتارى بويىنشا ساباقتار ءوتىپجاتىر. بولاشاقتا ماگيسترانتتار مەن دوكتورناتتاردى دا وسى عيماراتتا وقىتۋدى جوسپارلاپ وتىرمىز. ءبىلىم ورداسىندا جالپى سانى 12 مىڭنان استام ستۋدەنت بار. بيىل 1 كۋرسقا 5000-عا جۋىق ستۋدەنت قابىلداندى», دەپ اتاپ ءوتتى ە.ءدۇسىپوۆ.
الماتى