مەملەكەت باسشىسى قاسىم-جومارت توقاەۆتىڭ حالىققا جولداۋىندا زاڭ مەن ءتارتىپ, ەكونوميكالىق ءوسىم, قوعامدىق وپتيميزم ماسەلەلەرى ايقىندالىپ, ستراتەگيالىق باعدار مەن الداعى ناقتى مىندەتتەر بەلگىلەندى.
پرەزيدەنت مەملەكەتتىڭ ورنىقتى دامۋى ءۇشىن ماڭىزى زور ەكونوميكالىق ماسەلەلەرگە باسا نازار اۋداردى. شاعىن جانە ورتا بيزنەستى قارجىلاندىرۋدى كۇشەيتۋدى تاپسىردى. ەكونوميكالىق بەلسەندىلىكتى ارتتىرۋ ماقساتىندا ارنايى «بانكتەر تۋرالى» زاڭ قابىلداۋ قاجەتتىگىن ايتتى. سول سەكىلدى ينۆەستيتسيالىق احۋالدى جاقسارتىپ, بيزنەس جۇرگىزۋگە قولايلى جاعداي جاساۋ جايى دا قوزعالدى.
سونىمەن قاتار «Amanat» پارتياسىنىڭ برەندىنە اينالعان «اۋىل اماناتى» جوباسىن وڭ باعالاپ, ونى كەڭەيتە ءتۇسۋدى تاپسىردى. ەلىمىزدىڭ ونەركاسىپ الەۋەتىن تولىق پايدالانۋ, ينفراقۇرىلىمعا قاتىستى وزەكتى ماسەلەلەردى شەشۋ, كادرلىق الەۋەتتى ارتتىرۋ ماسەلەسى دە نازاردان تىس قالمادى. مۇنىڭ بارلىعى پرەزيدەنت ايتقان ورتا تاپتى قالىپتاستىرۋدىڭ نەگىزىن قالاماق.
ينفوگرافيكانى جاساعان – زاۋرەش سماعۇل ,«EQ»
جولداۋدا قوعامنىڭ قىزۋ تالقىسىنا اينالعان اەس سالۋ ماسەلەسى قوزعالدى. مەملەكەت باسشىسى اتوم ەلەكتر ستانساسىن سالۋ ماسەلەسىنە قاتىستى جالپىۇلتتىق رەفەرەندۋم بيىلعى 6 قازاندا وتەتىنىن ايتتى. ياعني وسى اسا وزەكتى باستاما بويىنشا شەشىمدى تىكەلەي حالىق قابىلدايدى.
پرەزيدەنت ايتقانداي, «نەگىزگى ماقسات – ادىلەتتى قوعام قۇرۋ جانە سول ارقىلى دامۋدىڭ سارا جولىنا تۇسكەن وزىق ەل بولۋ». وسىعان جول اشاتىن جولداۋدا كوزدەلگەن باستامالار مەن تاپسىرمالاردىڭ جۇزەگە اسىرىلۋىن زاڭنامالىق تۇرعىدان قامتاماسىز ەتۋگە ماجىلىستەگى «Amanat» پارتياسى فراكتسياسىنىڭ دەپۋتاتتارى بارىنشا اتسالىسادى.
بۇگىندە كوپتەگەن ەل تابيعي, ەكولوگيالىق تازا ازىق-ت ۇلىك ونىمدەرىنە ءزارۋ. رەسەيدە دە تابيعي ونىمدەرگە دەگەن سۇرانىس ارتىپ تۇر. سولتۇستىكتەگى كورشىمىزدى اۋىل شارۋاشىلىعى تاۋارلارىمەن, اسىرەسە, باۋ-باقشا ونىمدەرىمەن بارىنشا قامتاماسىز ەتىپ وتىرعان ەلدەردىڭ ءبىرى – وزبەكستان. الداعى ۋاقىتتا ءبىز وسىنداي ەلدەرمەن تىكەلەي باسەكەلەسە الاتىن جاعدايعا جەتۋىمىز كەرەك.
مەملەكەت بيىل ەگىن ناۋقانىنا ەكى ەسە كوپ قاراجات ءبولدى. بىراق وسى اگروونەركاسىپكە بولىنەتىن بۇكىل اقشانىڭ 70 پايىزى – مەملەكەت قارجىسى. پرەزيدەنت وسى جەردە ورىندى ماسەلە كوتەرىپ وتىر. ياعني ۇكىمەتكە بۇل سالاعا كوممەرتسيالىق بانكتەردىڭ قاراجاتىن دا تارتۋ قاجەتتىگىن تاپسىردى. وسىعان دەيىن ديقانداردى قولداپ كەلگەن مەملەكەتتىك قارجى ينستيتۋتتارىن سۋبسيديالاۋ شارالارىن بانكتەرگە قاتىستى جوبالارعا دا قولدانۋ – قۇپتارلىق-اق قادام.
«مۇنىڭ ءبارى شارۋالاردى اينالىمعا قاجەتتى قاراجاتپەن شۇعىل قامتاماسىز ەتۋگە, سىبايلاس جەمقورلىق قاتەرىن ازايتۋعا جانە نەسيە الۋدى وڭتايلاندىرۋعا جول اشادى. اگروونەركاسىپ كەشەنىن تىكەلەي سۋبسيديالاۋ تاسىلىنەن ارزان نەسيە بەرۋ تاسىلىنە بىرتىندەپ كوشۋ – اسا ماڭىزدى مىندەت», دەپ قاسىم-جومارت كەمەل ۇلى بولىنگەن قاراجاتتىڭ ءبارى ءتيىمدى جۇمسالۋعا ءتيىس ەكەنىن دە ەسكەرتتى.
ول ءۇشىن بۇل سالاداعى تسيفرلاردىڭ ناقتىلىعى اسا ماڭىزدى ورىنعا يە. جولداۋدا مەملەكەت باسشىسى اۋىل شارۋاشىلىعىنداعى دەرەكتەردىڭ مۇلدەم ۇيلەسپەيتىنىن ايتتى. شىندىققا جاناسپايتىن اقپارات بەرىپ, مالىمەتتەردى بۇرمالاۋ اۋىل شارۋاشىلىعىنداعى شىنايى احۋالدى باعالاۋعا كەدەرگى كەلتىرىپ وتىرعانى جاسىرىن ەمەس.
جولداۋدا ايتىلعانداي ارنايى كوميسسيا 2 ميلليون ءىرى قارا جانە 3 ميلليوننان اسا ۋاق مال ساندا بار بولعانىمەن, ساناتتا جوق ەكەنىن انىقتاپتى. ەگىن شارۋاشىلىعى سالاسى دا وسىنداي كەرتارتپا جايتتان ارىلا الماي وتىر. ال بۇنىڭ ارتىندا مەملەكەت باسشىسى ايتپاقشى, شىن مانىندە, قازىنا قارجىسىنان قايتكەن كۇندە دە سۋبسيديا الۋ جولىندا جاسالعان اككى امالدار, ناعىز كوزبوياۋشىلىق تۇر. ەندىگارى مۇنداي ىسپەن اينالىسقان ادامداردىڭ جاۋاپكەرشىلىگىن كۇشەيتىپ, قىلمىسپەن پارا-پار ونداي ارەكەتتەرگە توسقاۋىل قويماساق, ءبىز اسىراۋشى سالادا ايتارلىقتاي تابىسقا جەتە المايمىز, الدىڭعى قاتارلى ەلدەرمەن ەش باسەكەلەسە المايمىز. ءبىز كىمدى الداپ وتىرمىز؟ ياعني مەملەكەتىمىز حالىقتى تۇراقتى, قاۋىپسىز ازىق-ت ۇلىكپەن قامتاماسىز ەتەمىز دەيتىن بولسا, وندا وسى سالاعا بارىنشا باسىمدىق بەرگەن ءجون. بۇل تىكەلەي حالىقتىڭ تۇرمىستىق تابىسىن ارتتىرۋعا سەپتەسەدى.
ەلنۇر بەيسەنباەۆ,
ءماجىلىس دەپۋتاتى