پرەزيدەنت جانىنداعى ۇلتتىق عىلىم اكادەمياسىندا قازاق-نەمىس عىلىمي زەرتتەۋ ىنتىماقتاستىق ورتالىعى (KGRCC) اشىلدى.
ورتالىقتىڭ اشىلۋى بيىل قىركۇيەك ايىندا قازاقستان مەن گەرمانيا اراسىنداعى عىلىمي بايلانىستاردى نىعايتۋداعى ماڭىزدى كەزەڭ – فەدەرالدىق كانتسلەر ولاف ءشولتستىڭ ەلىمىزگە مەملەكەتتىك ساپارى اياسىندا جوسپارلانعان ەدى.
ورتالىقتىڭ نەگىزگى ماقساتى – ەكىجاقتى عىلىمي ىنتىماقتاستىققا جاردەمدەسۋ. ورتالىقتى وزىق ءبىلىم مەن زاماناۋي تاجىريبە الاڭىنا اينالدىرۋدى جوسپارلاعان تاراپتار, اسىرەسە ەكولوگيا, اگروبيولوگيا, ءبىلىم بەرۋ جانە ازاماتتىق قوعام سياقتى نەگىزگى سالالارداعى زەرتتەۋلەردى دامىتۋعا مۇمكىندىك بەرەتىن عىلىمي ارىپتەستىكتى ورىستەتپەك.
«يدەيادان – ارەكەتكە» ۇستانىمىنداعى قازاق-نەمىس عىلىمي-زەرتتەۋ ىنتىماقتاستىق ورتالىعىنىڭ تۇساۋكەسەرى اياسىندا دوڭگەلەك ۇستەل ءوتتى. القالى جيىندى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ اشىپ, ورتالىقتى قۇرۋدىڭ ەكى ەل اراسىنداعى عىلىمي ىنتىماقتاستىقتى نىعايتۋداعى ماڭىزىنا توقتالدى.
– نەمىس عالىمدارى جانە ءبىلىم مەكەمەلەرىمەن بىرلەسكەن جۇمىسىمىز ەلىمىزدىڭ الەمدىك ارەناداعى عىلىمي ۇستانىمىن نىعايتىپ قانا قويماي, جاڭا تەحنولوگيا مەن يننوۆاتسيالاردى دامىتۋعا العىشارت بولارىنا سەنىمدىمىن. الداعى كەلەشەكتە ورتالىق – كليماتتىق وزگەرىستەردى, سۋ رەسۋرستارىن جانە تۇراقتى دامۋ ماقساتتارىن زەرتتەۋگە باعىتتالعان جوبالاردى ۇيلەستىرۋگە ماڭىزدى الاڭ بولاتىنى ءسوزسىز. مۇندا جاس زەرتتەۋشىلەردى قولداۋعا ەرەكشە كوڭىل ءبولىپ, عىلىمي-زەرتتەۋ سالاسىنداعى وزىق تاجىريبەلەردى يگەرەمىز, – دەدى ۇعا پرەزيدەنتى.
قازاق-نەمىس ۋنيۆەرسيتەتىنىڭ پرەزيدەنتى, پروفەسسور, دوكتور ۆولراد روممەل جاڭا ورتالىقتىڭ نەگىزگى ماقساتى مەن مىندەتىن تانىستىرىپ, مامان دايارلاۋ جانە بىرلەسكەن عىلىمي جوبالاردى قولداۋ سالاسىنداعى ءرولىن اتاپ ءوتتى. ءوز كەزەگىندە ۇعا ۆيتسە-پرەزيدەنتى, پروفەسسور لياززات ەراليەۆا ورتالىقتىڭ تەك عىلىمي ينتەگراتسياعا عانا ەمەس, سونىمەن قاتار قوس ەل اراسىنداعى مادەني الماسۋعا دا ىقپال ەتەتىنىن جەتكىزدى.
ءىس-شارادا گەرمانيا اكادەميالىق الماسۋ قىزمەتىنىڭ (DAAD) باس حاتشىسى, دوكتور كاي زيكس پەن گەرمانيا فەدەراتيۆتىك رەسپۋبليكاسىنىڭ ەلىمىزدەگى ەلشىسى مونيكا يۆەرسەن جاڭا ورتالىق اياسىندا ىنتىماقتاستىقتى قولداۋعا جانە دامىتۋعا دايىن ەكەنىن ءبىلدىردى. سونىمەن قاتار گەرمانيا فەدەراتيۆتىك رەسپۋبليكاسىنىڭ الماتىداعى باس كونسۋلى ماتياس كيسلەر جانە كونراد ادەناۋەر قورىنىڭ ەلىمىزدەگى وكىلدىگىنىڭ باسشىسى يوحاننەس د.رەي ءسوز سويلەپ, عىلىمي جوبالاردى ودان ءارى دامىتۋداعى ۇسىنىسىن ايتىپ, عىلىمدا ۇلكەن تابىسقا يە بولۋداعى الەم ەلدەرى قول جەتكىزگەن حالىقارالىق ىنتىماقتاستىق ناتيجەلەرىن تىلگە تيەك ەتتى.
دوڭگەلەك ۇستەل ءماجىلىسى بارىسىندا فيزيكا-ماتەماتيكا عىلىمدارىنىڭ دوكتورى, پروفەسسور اسقار جۇمادىلداەۆ, ش. ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىنىڭ پرەزيدەنتى بەرىك احمەتوۆ, د. سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ رەكتورى ساۋلە راحمەتۋللينا, DKU حالىقارالىق جانە ايماقتىق ىنتىماقتاستىق عىلىمي-زەرتتەۋ ينستيتۋتىنىڭ ديرەكتورى بولات سۇلتانوۆ, قازاقستان ۇلتتىق اگرارلىق زەرتتەۋ ۋنيۆەرسيتەتى رەكتورىنىڭ ءبىرىنشى ورىنباسارى پىرىمقۇل يبراگيموۆ ەكى جاقتى عىلىمي ىنتىماقتاستىققا قولداۋ ءبىلدىرىپ, ەلىمىزدەگى عىلىمي-زەرتتەۋ جوبالارى تۋرالى وي-پىكىرلەرىن ايتتى.
الماتى