وبلىس ورتالىعى تاراز قالاسىندا كەيىنگى جىلدارى نەگىزگى كوشەلەردىڭ جولىن جوندەۋ, جاڭادان جول سالۋ جۇمىستارى قارقىندى تۇردە جۇرگىزىلىپ جاتىر. ۇزاق جىلدار بويى «ساپالى جولدىڭ ازابىن تارتىپ ءجۇرمىز. بىزگە قاشان دۇرىس جول سالىنادى؟» دەپ جەرگىلىكتى اتقارۋشى بيلىككە بازىناسىن ايتىپ كەلگەن «بۋرىل» تۇرعىن الابى تۇرعىندارىنىڭ دا ماسەلەسى وڭىنان شەشىلە باستادى.
باقىتجان ورىنبەكوۆ قالا اكىمى قىزمەتىنە تاعايىندالعاننان كەيىن باق وكىلدەرىمەن وتكەن كەزدەسۋدە «بۋرىل» تۇرعىن الابىنداعى تۇرعىنداردىڭ تىلەگىنە نازار اۋداراتىنىن, ءبىرىنشى كەزەكتە جول سالۋ ماسەلەسىن قولعا الاتىنىن ايتىپ, ۋادە بەرگەن ەدى. قالا باسشىسى سەرتىنەن تايعان جوق.
«وبلىس ورتالىعىنداعى توزىعى جەتكەن كوشەلەردىڭ جولىن قالپىنا كەلتىرۋگە بارىنشا نازار اۋدارىپ وتىرمىز. ويتكەنى تۇرعىندار ءبىرىنشى كەزەكتە جول ماسەلەسىن العا تارتاتىنى بەسەنەدەن بەلگىلى. كەيىنگى جىلدارى جالپى ۇزىندىعى 87,5 شاقىرىمدى قۇرايتىن 145 كوشەگە اسفالت جابىندىسى توسەلدى. جالپى العاندا, تاراز قالاسىندا 1445 كوشە بار ەكەنىن ايتا كەتكەن ءجون. ونىڭ ىشىندە اسفالتى بار كوشەنىڭ سانى 902-ءنى قۇراپ وتىرسا, شاعال تاسجولدار سانى – 543. وتكەن جىلى جول ماسەلەسىن شەشۋ ءۇشىن قازىنادان 3,6 ملرد تەڭگە قاراستىرىلدى. بولىنگەن قارجى ەسەبىنەن جوعارىدا ايتقان 145 كوشەدەن بولەك, ساڭىرىق باتىر, شوستاكوۆيچ كوشەلەرى قايتا جاڭعىرتۋدان وتكىزىلدى. جالپى, قالا كوشەلەرىنىڭ جولىن جوندەۋ جۇمىستارى ىلكى ساتكە دە سايابىرسىماق ەمەس», دەيدى تاراز قالاسىنىڭ اكىمى باقىتجان ورىنبەكوۆ.
راسىندا, سوڭعى ۋاقىتتا قالاداعى ءبىراز كوشەنىڭ جولى جوندەلدى. جەرگىلىكتى اتقارۋشى بيلىك ءبىرىنشى كەزەكتە حالىق تىعىز ورنالاسقان كوشەلەردىڭ جولىن قالپىنا كەلتىرۋگە باسا نازار اۋدارىپ وتىرعانىن ايتا كەتكەن ءجون. قولعا الىنعان اۋقىمدى جۇمىستاردىڭ ناتيجەسىندە قاناعاتتانارلىق جاعدايداعى جولدىڭ ۇلەسى 61 پايىزدان 65 پايىزعا دەيىن ارتىپ وتىر.
«وسى جىلى جالپى ۇزىندىعى 68,6 شاقىرىمدى قۇرايتىن 118 كوشەنى جانە 18 شاقىرىمدىق 7 جاياۋ جۇرگىنشى جولىن ورتاشا جوندەۋدەن وتكىزىپ جاتىرمىز. ودان بولەك, «كوممۋنالنيك», «لەتو», «ۆەتەران», «حيميك», «يۋبيلەينىي», «پوبەدا» الاپتارىنداعى جالپى ۇزىندىعى 73,8 شاقىرىمدى قۇرايتىن 165 كوشەدەگى شاعال جول ورتاشا جوندەۋدەن وتكىزىلمەك. قولعا العان وسى جۇمىستى دەر كەزىندە ورىنداعان سوڭ قاناعاتتانارلىق جاعدايداعى جولداردىڭ ۇلەسى 65 پايىزدان 70 پايىزعا دەيىن ارتادى», دەيدى قالا باسشىسى.
«بۋرىل» جانە «بارىسحان» تۇرعىن الاپتارىنا قونىستانعان حالىقتىڭ سانى جىل وتكەن سايىن ارتىپ كەلەدى. سوندىقتان دا مۇنداعى كوشەلەردىڭ جولىن قالپىنا كەلتىرۋدىڭ ماڭىزى زور. «بۋرىل» تۇرعىن الابىندا بىلتىر باستالعان اۋقىمدى جۇمىس وسى جىلى دا ساتىمەن جالعاسىپ جاتقانىن ايتا كەتكەن ءلازىم.
«راسىندا, «بۋرىل ا, ب, ۆ» جانە «بارىسحان» تۇرعىن الابىنىڭ حالقى ءۇشىن ساپالى جول ۇزاق جىلدار بويى وزەكتى ماسەلە بولىپ كەلدى. ىلگەرىدە جەرگىلىكتى جۇرت ءبىرىنشى كەزەكتە جول ماسەلەسىن العا تارتاتىن. كەيىنگى جىلدارى حالىقتىڭ كوكەيكەستى پروبلەماسىن شەشۋگە باسىمدىق بەرىپ, جۇمىستى جۇيەلەدىك. قازىرگى كەزدە «بۋرىل» جانە «بارىسحان» تۇرعىن الابىنداعى كوشەلەردە جۇمىس جۇيەلى تۇردە جۇرگىزىلىپ جاتىر. وتكەن جىلى «بۋرىلداعى» 75 كوشەنىڭ 13-ءىن اسفالتتاساق, بيىل قالعان كوشەلەرگە تولىقتاي اسفالت جابىندىسىنىڭ ءبىرىنشى قاباتى توسەلدى. ال «بارىسحانداعى» 8 كوشەگە وسى جىلى اسفالت جابىندىسىن توسەۋ جوسپارلانعان. سونداي-اق بيىل قالا كوشەلەرى مەن شاعىن اۋدانداردىڭ ىشكى جولدارىن جوندەۋ جۇمىستارىنا جەرگىلىكتى بيۋدجەتتەن 900 ملن تەڭگە قاراستىرىلدى. كونكۋرس ناتيجەسى بويىنشا جەڭىمپاز مەردىگەرلەرمەن كەلىسىمشارت جاسالىپ, قازىرگى تاڭدا ءتيىستى جۇمىستار جۇرگىزىلىپ جاتىر», دەدى ب.ورىنبەكوۆ.
قالا جۇرتىن الاڭداتقان باستى ماسەلەنىڭ تاعى ءبىرى – كارىز سۋى كەشەنى. قازىرگى كەزگە دەيىن كارىز سۋى قالا ماڭىنداعى, جامبىل اۋدانى اۋماعىنداعى سۇزگى الاڭدارىنا قۇيىلىپ جاتىر. مۇنداعى الاڭدار ايتارلىقتاي دەڭگەيدە تولدى. سالدارىنان جەراستى سۋىنىڭ لاستانۋ قاۋپى ءتونىپ تۇرعانى ءسوزسىز. جەرگىلىكتى اتقارۋشى بيلىك تۇرعىندار تىلەگىن نازاردان تىس قالدىرعان جوق. كەشەن سالۋ ماسەلەسىن شەشۋگە قولدان كەلگەنشە تىرىسىپ جاتىر. ارينە, بۇل كەشەندى سالۋ جۇمىسى ءبىر جىلدا اياقتالا سالمايتىنى انىق.
«تاراز قالاسىندا كارىز سۋلارى كەشەنىن سالۋ ۋاقىت كۇتتىرمەيتىن ۇلكەن ماسەلە ەكەنىنە ەشكىمنىڭ تالاسى جوق. كوكەيكەستى پروبلەمانى ءبارىمىز بەس ساۋساعىمىزداي جاقسى بىلەمىز. ءدال قازىر كارىز سۋلارى كورشىلەس جامبىل اۋدانىندا ورنالاسقان 217 گەكتار اۋماقتاعى سۇزگى الاڭدارىنا قۇيىلىپ جاتقانىنان حاباردارسىزدار. سۇزگى الاڭدارى شامادان تىس ارتىق تولعاندىقتان, اسا وزەنى مەن جەراستى سۋلارىنىڭ لاستانۋ قاۋپى بار ەكەنىن جوققا شىعارمايمىز.
جۇرت كوكەيىندەگى وزەكتى ماسەلە ءبىزدىڭ دە نازارىمىزدان تىس قالعان ەمەس. تاراز قالاسىنىڭ كارىز سۋلارىن تازارتۋ كەشەنىنىڭ قۇرىلىسىن سالۋ بويىنشا «جول كارتاسى» ازىرلەنگەنىن ايتا كەتكەن ءلازىم. «جول كارتاسىنا» سايكەس, «ەۋروپالىق قايتا قۇرۋ» جانە «دامۋ» بانكىنەن ءتيىستى گرانت ءبولىنىپ, تەحنيكالىق-ەكونوميكالىق نەگىزدەمە ۋاقتىلى دايىندالدى. قازىرگى كەزدە اتالعان تەحنيكالىق-ەكونوميكالىق نەگىزدەمە مەملەكەتتىك ساراپتامادان وتكىزىلىپ جاتىر.
جوعارىدا ايتقان جۇمىس اياقتالعاننان كەيىن سالالىق جانە ەكونوميكالىق ساراپتاما جۇرگىزىلىپ, مەردىگەردى انىقتاۋ بويىنشا حالىقارالىق كونكۋرس وتكىزىلەدى. قۇرىلىس جۇمىستارى 2025-2027 جىلدارعا جوسپارلاندى», دەدى ب. ورىنبەكوۆ.
وبلىس ورتالىعى تاراز قالاسىندا جەرگىلىكتى حالىقتى جۇمىسپەن قامتۋ ءىس-شارالارى دا جوسپارعا سايكەس جۇرگىزىلىپ جاتقانىن ايتا كەتكەن ءجون. جەرگىلىكتى اتقارۋشى بيلىك كەلتىرگەن دەرەككە جۇگىنسەك, وسى جىلى 21 035 تۇرعىندى جۇمىسقا ورنالاستىرۋ جوسپارلانسا, قازىرگى كەزگە دەيىن 12 250 جۇمىس ورنى اشىلىپتى. وتكەن جىلدىڭ ەسەپتى مەرزىمىمەن سالىستىرساق, جۇمىسسىزدىق دەڭگەيى 4,9 پايىزدى قۇراپ وتىر. بۇل بىلتىرعى كورسەتكىشتەن 0,8 پايىزعا تومەن.
تاراز