قازاق ۇلتتىق اگرارلىق زەرتتەۋ ۋنيۆەرسيتەتىندە «قازاق-ستروي» جشس-مەن ىنتىماقتاستىق نەگىزىندە 9 قاباتتى جاڭا ستۋدەنتتىك جاتاقحانانىڭ قۇرىلىسى باستالدى. عيمارات كەلەر جىلى پايدالانۋعا بەرىلەدى.
ۋنيۆەرسيتەت اۋماعىندا سوڭعى 30 جىلدا سالىنعالى وتىرعان جاتاقحانا 450 ورىنعا ارنالعان. وقۋ ورنى اۋماعىندا مۇنىمەن قوسا ستۋدەنتتەر ءۇشىن مەديتسينالىق ورتالىق تۇرعىزىلادى. قۇرىلىسقا سالىناتىن جالپى ينۆەستيتسيا كولەمى 2,3 ملرد تەڭگەدەن اسادى. سالتاناتتى ءىس-شاراعا باسقارما توراعاسى-رەكتور اقىلبەك كۇرىشباەۆ, پارلامەنت سەناتىنىڭ دەپۋتاتى جاننا اسانوۆا, عىلىم جانە جوعارى ءبىلىم مينيسترلىگى سيتۋاتسيالىق ورتالىعىنىڭ جەتەكشىسى امانعالي شايماردانوۆ, ينۆەستور كومپانيا «قازاق-ستروي» جشس باس ديرەكتورى بولات يبراگيم ۇلى, الماتى قالالىق جاستار ساياساتى باسقارماسىنىڭ باسشىسى ازيز قاجدەنبەك, مەدەۋ اۋدانى اكىمدىگىنىڭ ماماندارى, وقىتۋشىلار قاتىستى.
قازىرگى تاڭدا ۋنيۆەرسيتەتتە جەكەمەنشىككە ءوتىپ كەتكەن وقۋ ورنى اكتيۆتەرىن كەرى قايتارۋ جۇمىسى جالعاسىپ وتىر. مىسالى, №6 ستۋدەنتتىك جاتاقحانا وتكەن جىلى تۇرعىن ءۇي قورىنا قايتارىلىپ, قوسىمشا 280 ستۋدەنت باسپانالى بولدى. كەزىندە «شاھ» مەيرامحاناسى مەن كەڭسە عيماراتى رەتىندە پايدالانىلىپ كەلگەن №3 ستۋدەنتتىك جاتاقحانا دا كەرى قايتارىلىپ, تولىقتاي كۇردەلى جوندەۋدەن ءوتتى. بۇل ماقساتقا ۋنيۆەرسيتەت بيۋدجەتىنەن 160 ملن تەڭگەگە جۋىق قاراجات جۇمسالدى. «ريتم ستروي ەك» جشس جاتاقحاناعا جوندەۋ جۇمىستارىن جۇرگىزىپ, تۇرعىن بولمەلەر, اس ۇيلەر مەن دالىزدەر, تازالىق ورىندارى جاڭاشا ديزاينمەن ورنەكتەلدى. قاجەتتى جيھازدار, تۇرمىستىق تەحنيكامەن قامتاماسىز ەتىلىپ, زاماناۋي 300 بولمە ستۋدەنتتەر, ماگيسترانتتار مەن جاس عالىمداردىڭ يگىلىگىنە بەرىلدى.
«Aqyl alem» كومپانياسى جۇرگىزگەن الەۋمەتتىك زەرتتەۋلەرگە سۇيەنسەك, ەلىمىزدەگى ءۇش جوعارى وقۋ ورنى – Nazarbayev University, كيمەپ جانە قازاق ۇلتتىق اگرارلىق زەرتتەۋ ۋنيۆەرسيتەتى ءبىلىم ساپاسى مەن جاتاقحانامەن قامتاماسىز ەتۋ جونىندە ەڭ وزىق دەپ تانىلعان. الەۋمەتتىك باعىتتاعى جۇيەلى جۇمىستاردى جالعاستىرۋدىڭ ناتيجەسىندە «KazNARU» ورتالىق ازيادا QS رەيتينگىسىندە 6-ورىن, ەلىمىزدە توپ 5-كە ەنىپ وتىر.
الماتى