پرەزيدەنت جانىنداعى ۇلتتىق عىلىم اكادەمياسىندا قازاقستان-نەمىس عىلىمي-زەرتتەۋ ىنتىماقتاستىق ورتالىعى (KGRCC) اشىلدى.
ورتالىقتىڭ اشىلۋى 2024 جىلعى 17 قىركۇيەكتە قازاقستان مەن گەرمانيا اراسىنداعى عىلىمي بايلانىستاردى نىعايتۋداعى ماڭىزدى كەزەڭ - فەدەرالدىق كانتسلەر ولاف ءشولتستىڭ قازاقستانعا مەملەكەتتىك ساپارى اياسىندا جوسپارلانعان بولاتىن.
«يدەيادان ارەكەتكە» قازاقستان-نەمىس عىلىمي-زەرتتەۋ ىنتىماقتاستىق ورتالىعىنىڭ تۇساۋكەسەرى اياسىندا دوڭگەلەك ۇستەل ءوتتى. القالى جيىندى ۇلتتىق عىلىم اكادەمياسى پرەزيدەنتى, پروفەسسور اقىلبەك كۇرىشباەۆ اشىپ, ورتالىقتى قۇرۋدىڭ ەكى ەل اراسىنداعى عىلىمي ىنتىماقتاستىقتى نىعايتۋداعى ماڭىزدىلىعىن اتاپ ءوتتى. پروفەسسور اقىلبەك قاجىعۇل ۇلى ورتالىقتىڭ بىرلەسكەن عىلىمي زەرتتەۋلەردى دامىتۋ مەن وزىق تاجىريبەمەن الماسۋداعى ماڭىزدىلىعىنا توقتالدى.
قازاقستان-نەمىس ۋنيۆەرسيتەتىنىڭ پرەزيدەنتى, پروفەسسور, دوكتور ۆولراد روممەل جاڭا ورتالىقتىڭ نەگىزگى ماقساتتارى مەن مىندەتتەرىن تانىستىرىپ, كادر دايارلاۋ جانە بىرلەسكەن عىلىمي جوبالاردى قولداۋ سالاسىنداعى ءرولىن اتاپ ءوتتى. ۇعا ۆيتسە-پرەزيدەنتى, پروفەسسور لياززات ەراليەۆا ءوز سوزىندە ورتالىقتىڭ تەك عىلىمي ينتەگراتسياعا عانا ەمەس, سونىمەن قاتار قازاقستان مەن گەرمانيا اراسىنداعى مادەني الماسۋعا دا ىقپال ەتەتىنىن ايتتى.
ءىس-شارادا گەرمانيانىڭ اكادەميالىق الماسۋ قىزمەتىنىڭ (DAAD) باس حاتشىسى, دوكتور كاي زيكس پەن قازاقستانداعى گەرمانيا فەدەراتيۆتىك رەسپۋبليكاسىنىڭ ەلشىسى مونيكا يۆەرسەن جاڭا ورتالىق اياسىندا ىنتىماقتاستىقتى قولداۋعا جانە دامىتۋعا دايىن ەكەندىكتەرىن ءبىلدىردى. سونىمەن قاتار, گەرمانيا فەدەراتيۆتىك رەسپۋبليكاسىنىڭ الماتىداعى باس كونسۋلى ماتياس كيسلەر جانە كونراد ادەناۋەر قورىنىڭ قازاقستانداعى وكىلدىگىنىڭ باسشىسى يوحاننەس د. رەي ءسوز سويلەپ, عىلىمي جوبالاردى ودان ءارى دامىتۋداعى كوزقاراستارىن ءبىلدىرىپ, عىلىمدا جوعارى ناتيجەلەرگە قول جەتكىزۋ ءۇشىن حالىقارالىق ىنتىماقتاستىقتى دامىتۋ ءتۇسۋدىڭ ماڭىزدىلىعىن اتاپ ءوتتى.
دوڭگەلەك ۇستەلگە فيزيكا-ماتەماتيكا عىلىمدارىنىڭ دوكتورى, پروفەسسور اسقار جۇمادىلداەۆ, ش. ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىنىڭ پرەزيدەنتى بەرىك احمەتوۆ, د. سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ رەكتورى ساۋلە راحمەتۋللينا, DKU حالىقارالىق جانە ايماقتىق ىنتىماقتاستىق عىلىمي-زەرتتەۋ ينستيتۋتىنىڭ ديرەكتورى بولات سۇلتانوۆ, قازاقستان ۇلتتىق اگرارلىق زەرتتەۋ ۋنيۆەرسيتەتىنىڭ باسقارما توراعاسى-رەكتوردىڭ ءبىرىنشى ورىنباسارى پىرىمقۇل يبراگيموۆ قاتىسىپ, ەكى جاقتى عىلىمي ىنتىماقتاستىققا قولداۋ ءبىلدىردى.
«عىلىم ورداسى» عيماراتىنىڭ ەكىنشى قاباتىندا ورنالاسقان ورتالىقتا ەكولوگيا, اگروبيولوگيا, ءومىر جانە دەنساۋلىق تۋرالى عىلىمدار, سونداي-اق ءبىلىم بەرۋ مەن ازاماتتىق قوعام سالاسىنداعى زەرتتەۋلەر داميتىن بولادى. جاس عالىمداردى قولداۋ كورسەتە وتىرىپ, وزىق تاجىريبەمەن الماسۋ, سونداي-اق جاڭا تەحنولوگيالار مەن يننوۆاتسيالاردى دامىتۋ الاڭىنا اينالدىرۋ كوزدەلىپ وتىر. بىرلەسكەن قادام قازاقستاننىڭ الەمدىك ارەناداعى عىلىمي ۇستانىمدارىن نىعايتۋعا, سونداي-اق جاھاندىق سىن-قاتەرلەردى شەشۋدە ۇزاق مەرزىمدى ىنتىماقتاستىققا جالعاسپاق.
الماتى