بۇگىندە ۇلەستىك قۇرىلىستاعى ماسەلەنى شەشۋ جانە پروبلەمالىق نىسان تاۋەكەلىن ازايتۋ ماقساتىندا قۇرىلىس سالۋشى مەن ساتىپ الۋشى اراسىندا شارت جاساسۋ ۇدەرىسىن تسيفرلاندىرۋ جۇمىسى مارەسىنە جاقىندادى.
قازىر قۇرىلىستى ساپالى جوسپارلاۋ مەن باسقارۋ ماقساتىندا اۋماقتاردىڭ ينفراقۇرىلىمدىق قامتاماسىز ەتىلۋىنىڭ دەرەكتەرى جانە قالا قۇرىلىسى رەگلامەنتتەرىن شوعىرلاندىراتىن مەملەكەتتىك قالا قۇرىلىسى كاداسترىن دامىتۋ ءجۇرىپ جاتىر. قالا قۇرىلىسى كاداسترىنىڭ اقپاراتتىق جۇيەسى تسيفرلىق باس جوسپاردى, ەگجەي-تەگجەي جوسپارلاۋ جوباسىن (ەتجج), عيمارات پەن قۇرىلىستىڭ ورنالاسۋى, ينجەنەرلىك ينفراقۇرىلىم, كوشە-جول جەلىسى, سونداي-اق اباتتاندىرۋ تۋرالى دەرەكتەردى جيناۋدى, ونى وڭدەۋدى جانە ساقتاۋدى قامتاماسىز ەتەدى.
جۇيە ءىرى ەلدى مەكەننىڭ قۇرىلىس سالىنعان اۋماعىنىڭ ينجەنەرلىك جەلىسى تسيفرلىق دەرەگىنىڭ 86%-ىن قامتيدى. جىل سوڭىنا دەيىن ينفراقۇرىلىمدىق دەرەكتەردى 100% تسيفرلاندىرۋدى جۇزەگە اسىرۋ جوسپارلانىپ وتىر. جەرگىلىكتى اتقارۋشى ورگاندار بەرگەن باس جوسپاردىڭ جانە ەگجەي-تەگجەي جوسپارلاۋ جوباسىنىڭ (قالالار بويىنشا) 90%-دان استامى تسيفرلاندىرىلدى جانە نورماتيۆتىك قۇرىلىمعا كەلتىرىلدى.
بۇگىندە ونەركاسىپ جانە قۇرىلىس مينيسترلىگى ەل ازاماتتارىنا كورسەتىلەتىن مەملەكەتتىك قىزمەتتى تسيفرلاندىرۋ ماسەلەسىنە ايرىقشا نازار اۋدارىپ كەلەدى. وتكەن مامىر ايىندا «قازرەەستر» جۇيەسىندە ەلەكتروندىق تسيفرلىق قولتاڭبانى نەمەسە «eGov Mobile» قوسىمشاسىندا QR كودتى پايدالانىپ, ەلەكتروندىق ۇلەستىك قاتىسۋ شارتىن جاساۋعا ارنالعان جاڭا فۋنكتسيا قولدانىسقا ەنگىزىلدى. بۇل تۋرالى ونەركاسىپ جانە قۇرىلىس ۆيتسە-ءمينيسترى جاننات ءدۇبيروۆا مالىمدەدى.
ونىڭ ايتۋىنشا, ەندى ۇلەستىك قاتىسۋ شارتى جاسالعاننان كەيىن تەك ونلاين فورماتتا عانا ەمەس, ازىرلەۋشىدە اكتسيونەرلەردىڭ اقشاسىن تارتۋعا رۇقساتى بار-جوعىن ءبىلىپ وتىرۋىنا دا مۇمكىندىك بار. بۇل بولاشاقتا نىسان قۇرىلىسى جالعاسپاي قالۋ قاۋپىن ازايتادى. سونداي-اق «قازرەەستر» جۇيەسى بۇكىل ەل بويىنشا ۇلەستىك قاتىسۋ كەلىسىمىنىڭ ورتالىقتاندىرىلعان ەسەبىن جۇرگىزۋگە جانە ۇلەسكەردىڭ قاۋىپسىزدىگىنە وڭ اسەر ەتەتىن ۇلەستىك نىسان قۇرىلىسىنىڭ بارىسىنا مونيتورينگتى شوعىرلاندىرۋعا جاعداي جاسايدى.
بۇل جۇيە «بايتەرەك» حولدينگىنىڭ ەنشىلەس ۇيىمى «قازاقستان تۇرعىن ءۇي كومپانياسى» بازاسىندا ازىرلەنىپ جاتىر. «قازرەەستردە» 800-دەن استام ۇلەستىك قۇرىلىس نىسانى تۋرالى اقپارات بار. وعان قوسا, 100-دەن استام قۇرىلىس ۇيىمى تىركەلگەن. ازىرگە قۇرىلىس سالاسىنداعى تسيفرلاندىرۋ جۇمىستارى مەملەكەت ەسەبىنەن سالىنىپ جاتقان نىسانداردى عانا قامتىپ وتىر.
ال قالا قۇرىلىسى قىزمەتىنىڭ اشىقتىعىن قامتاماسىز ەتۋ ءۇشىن قالا قۇرىلىسى كاداسترىنىڭ جۇيەسى ارقىلى باستاپقى رۇقسات بەرۋ قۇجاتتارىن بەرۋدى جانە ەسكيزدىك جوبالاردى كەلىسۋدى ۇسىنۋ ىسكە اسادى. بۇل قۇجاتتىڭ بەكىتىلگەن باس جوسپارعا جانە ەگجەي-تەگجەي جوسپارلاۋ جوباسىنا سايكەستىگىن تەكسەرۋگە مۇمكىندىك تۋدىرادى. بۇگىندە بيزنەس-ۇدەرىستەر مەن فۋنكتسيالاردى اۆتوماتتاندىرۋعا ارنالعان جۇيە پلاتفورماسى ەنگىزۋ ساتىسىندا تۇر. ول قىزمەتتى ىسكە قوسۋ وسى جىلدىڭ III توقسانىنا جوسپارلانعان.
ۆيتسە-ءمينيستردىڭ ويىنشا, قالا قۇرىلىسى رەگلامەنتى مەن ينفراقۇرىلىمىنىڭ ەسەپكە الۋ جۇيەسى رەتىندە مەملەكەتتىك قالا قۇرىلىسى كاداسترىنىڭ اۆتوماتتاندىرىلعان اقپاراتتىق جۇيەسى (مقك ااج) جوسپارلاۋ ساتىنەن باستاپ پايدالانۋعا بەرۋگە دەيىنگى قۇرىلىس نىساندارىنىڭ ومىرلىك تسيكلىنىڭ مونيتورينگىن جۇزەگە اسىرۋعا مۇمكىندىك بەرەدى. سونداي-اق كورسەتىلەتىن قىزمەتتەردىڭ اشىقتىعىن, شىنايى جانە وزەكتى دەرەكتەردى قالىپتاستىرۋدى قامتاماسىز ەتەدى.
بۇگىندە قۇرىلىس جوبالارىن جوبالاۋ جانە ساراپتاۋ ءۇشىن بىرىڭعاي پورتال ازىرلەنىپ جاتىر. پورتالدىڭ جوبالىق اتاۋى – اقپاراتتىق مودەلدەردىڭ مەملەكەتتىك بانكى. جۇيەنىڭ نەگىزگى ماقساتى – قۇرىلىستىڭ بارلىق قاتىسۋشىسىنىڭ بىرلەسكەن جۇمىسىن بىرىڭعاي دەرەكتەر ورتالىعىندا ۇيىمداستىرىپ, باسقا سالالىق جۇيەلەرمەن ينتەگراتسيالاۋ ارقىلى قۇرىلىس نىسانىنىڭ تسيفرلىق تىرشىلىك تسيكلىن قامتاماسىز ەتۋ.
ۆيتسە-مينيستر مەملەكەتتىك قىزمەتتەر مەن دەرەكتەردى تسيفرلاندىرۋعا ەرەكشە كوڭىل ءبولىنىپ جاتقانىن ايتتى. قۇرىلىس سالاسىندا 22 مەملەكەتتىك قىزمەت بار, ونىڭ 20-سى ەلەكتروندىق فورماتتا كورسەتىلەدى.
«بيىل ءبىز تۇرعىن ءۇي-كوممۋنالدىق شارۋاشىلىق سالاسىنداعى ءارتۇرلى كوزدەن الىنعان دەرەكتەردى بىرىكتىرۋگە مۇمكىندىك بەرەتىن بىرىڭعاي تۇرعىن ءۇي-كوممۋنالدىق شارۋاشىلىق پلاتفورماسىن قۇرۋ بويىنشا جۇمىستى باستادىق. بۇل دەرەكتەرگە كوممۋنالدىق تولەمدەر ءۇشىن بىرىڭعاي تولەم قۇجاتىنىڭ تۇبىرتەكتەرى, e-پيك/ميب جانە «iKOMEK109» كىرەدى. سونداي-اق پلاتفورما تۇرعىن ءۇي ينسپەكتسياسىنىڭ ينجەنەرلىك جەلىلەرى مەن جۇمىس ۇدەرىسىن ورتالىقتاندىرىلعان تسيفرلاندىرۋعا مۇمكىندىك جاسايدى», دەدى ج.ءدۇبيروۆا.
پلاتفورما جاقسى جانە تەڭدەستىرىلگەن تۇرعىن ءۇي-كوممۋنالدىق شارۋاشىلىق ساياساتىن قالىپتاستىرۋ ءۇشىن ونلاين فورماتتا دەرەكتەردى جيناۋ ءۇشىن قۇرىلىپ جاتىر. ۆەدومستۆونىڭ تسيفرلاندىرۋ توبى تيىمدىلىك پەن ىڭعايلىلىقتى ارتتىرۋ ءۇشىن مەملەكەتتىك قىزمەت كورسەتۋ ۇدەرىسىن جەتىلدىرۋ بويىنشا تۇراقتى جۇمىستى جالعاستىرا بەرەدى.