پاۆلودارعا قاراستى مويىلدى اۋىلىندا تۇراتىن كوپبالالى ايەل ءوزىن-ءوزى ورتەپ جىبەرمەك بولدى. ونى قۇربىسى قۇتقارىپ قالدى, دەپ حابارلايدى Egemen.kz.
كۋاگەرلەردىڭ ايتۋىنشا, 34 جاستاعى كەلىنشەك ۇستىنە جانارماي قۇيىپ تۇتاتقان.
- دەنەسىنىڭ 36 پايىزىن تەرميالىق كۇيىك شالعان. اياق-قولى (2-دارەجەلى) كۇيگەن. ناۋقاس جەدەل جاردەممەن قالالىق №1 اۋرۋحاناعا جەتكىزىلدى, - دەپ حابارلادى پاۆلودار وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى ماقپال قارجاۋباي.
1990 جىلى تۋعان ايەلدىڭ بەس بالاسى بار. كۇيەۋى رەسەيدە ۆاحتالىق جۇمىستا.
- كوپبالالى وتباسى. اتاۋلى الەۋمەتتىك كومەك الادى. كۇيەۋى ۆاحتادا. ەشقانداي تالابى بولعان جوق. وسى اۋىلدا اجەلەرى تۇرادى. قازىر ءۇش ەستيار بالاسىن اجەسىنىڭ قولىندا قالدىرىپ, ەكى كىشكەنتايدى ايەلدىڭ شەشەسى الىپ كەتتى, - دەيدى مويىلدى اۋىلىنىڭ اكىمى جەڭىس ابىكەن.
ونىڭ ايتۋىنشا, قازىر ماسەلەمەن قۇقىق قورعاۋ ورگاندارى اينالىسىپ جاتىر.