داستۇرگە اينالعان «مەرەيلى وتباسى» ۇلتتىق بايقاۋىنىڭ وڭىرلىك كەزەڭى مارەسىنە جەتتى. وبلىستىق بايقاۋعا ءوڭىردىڭ بارلىق اۋدانىنان ۇلگىلى وتباسىلار قاتىسىپ, ونەرىن ورتاعا سالىپ, رەسپۋبليكالىق كەزەڭنىڭ جولداماسىن جەڭىپ الۋعا تىرىستى.
ءىس-شاراعا ءوڭىر باسشىسى ەربول قاراشوكەەۆ ارنايى قاتىسىپ, جۇلدەلى ورىنداردان كورىنگەن مەرەيلى شاڭىراق يەلەرىن ماراپاتتادى. سونداي-اق ول ۇلتتىق بايقاۋدىڭ تاعىلىمى مەن ماڭىزى تۋرالى ايتىپ, جەڭىمپاز وتباسىعا ساتتىلىك تىلەدى.
«ونەگەلى وتباسى – كەز كەلگەن مەملەكەتتىڭ تىرەگى, ۇرپاق تاربيەسىنىڭ باستاۋ بۇلاعى. وتانعا دەگەن كىرشىكسىز ماحاببات پەن قىلاۋسىز قۇرمەت ۇلگىلى وتباسىدان باستالاتىنى اقيقات. داستۇرگە اينالعان ۇلتتىق بايقاۋ ەڭبەگىمەن ەلەنگەن, داستۇرگە دەگەن ادالدىعىمەن دارالانعان شاڭىراقتاردىڭ مەرەكەسىنە اينالعانى انىق. سان سالادا تابىسقا جەتكەن وتباسىلار وسى بايقاۋدا باق سىنايدى. ولاردىڭ جاراسىمعا تولى سىيلاستىعى مەن شىنايى وتباسىلىق قارىم-قاتىناسى بارشامىزعا ۇلگى», دەدى وبلىس باسشىسى ماراپاتتاۋ راسىمىندە.
ون جىل بويى ۇزدىكسىز ۇيىمداستىرىلىپ كەلە جاتقان بايقاۋدىڭ وڭىرلىك كەزەڭدەرىندە كۇنى بۇگىنگە دەيىن 2 مىڭنان اسا وتباسى باق سىناپتى. ال وسى جىلى تاراز قالاسى مەن اۋداندىق دەڭگەيدە توپقا تۇسكەن 218 وتباسىنىڭ 22-ءسى وبلىستىق كەزەڭگە جولداما العان.
بايقاۋ قورىتىندىسى بويىنشا باس جۇلدە تاڭاتاروۆتار وتباسىنا بۇيىردى. بۇل اۋلەتتىڭ ءۇش بۋىنى, ياعني اكەسى, بالالارى مەن نەمەرەلەرى – سپورتتى جانىنا سەرىك ەتكەن وعلاندار.
شاڭىراقتىڭ ۇلكەنى دوستىق تاڭاتاروۆ ءۇش ۇلىن سپورتقا باۋلىپ وسىرگەن. ول – ەركىن كۇرەستەن سپورت شەبەرى, اعا جاتتىقتىرۋشى. ۇلى ايگىلى ەركىن كۇرەس شەبەرى اقجۇرەك تاڭاتاروۆ قازاقستاننىڭ ەڭبەك سىڭىرگەن سپورت شەبەرى, لوندون قالاسىندا وتكەن جازعى وليمپيا ويىندارىنىڭ قولا جۇلدەگەرى بولسا, اقنيەت تاڭاتاروۆ بوكستان رەسپۋبليكالىق جارىستاردىڭ جەڭىمپازى اتانعان. ءۇشىنشى ۇلى ەدىگە تاڭاتاروۆ تا سپورتپەن اينالىسادى, بۇگىندە «بىرلەس» كوكپار كلۋبىنىڭ كاپيتانى.
اتا جولىن نەمەرەلەرى دە جارىسىمدى جالعاستىرىپ ءجۇر. ەسۋگەي مەن ءادىل ەركىن كۇرەستى جانىنا سەرىك ەتسە, ايزەرە كوركەم گيمناستيكامەن تۇراقتى تۇردە شۇعىلدانادى.
بايقاۋدا باق سىناعان مەركىلىك ەشەتوۆتەر وتباسى ءبىرىنشى ورىنعا لايىق دەپ تانىلسا, ەكىنشى ورىنعا شۋلىق بايماعانبەتوۆتەر, قۇلاندىق ومىرباەۆتار وتباسى يە بولدى. جامبىلدىق ابساتاروۆتار مەن سارىسۋلىق شىنباتىروۆتار اۋلەتى ءۇشىنشى ورىندى قاناعات تۇتتى.
بايقاۋ جەڭىمپازدارىنا ديپلوم جانە قارجىلاي سەرتيفيكاتتار تابىستالدى.
تاراز