قازاقستان حالقى اسسامبلەياسى توراعاسىنىڭ ورىنباسارى لۋگمار بۋلاروۆ مەملەكەت باسشىسى قاسىم-جومارت توقاەۆتىڭ قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىندا بەرگەن تاپسىرماسىنا وراي, جامبىل وبلىسىندا ء«بىرتۇتاس قوعام: كەلىسىم جانە سەنىم» ارنايى جوباسىن بەلسەندى تۇردە جۇزەگە اسىرىپ كەلەدى.
جوبانىڭ يدەولوگياسى جالپىۇلتتىق قۇندىلىقتارعا نەگىزدەلسە, ونىڭ ماقساتى – قوعامدا سەنىم مادەنيەتىن دامىتۋ.
لۋگمار بۋلاروۆ جاقىندا شۋ, مەركى, بايزاق اۋداندارىنىڭ, سونداي-اق ت.رىسقۇلوۆ اۋدانىنىڭ مەملەكەتتىك قىزمەتكەرلەرىمەن, دەنساۋلىق ساقتاۋ مەكەمەلەرىنىڭ, جۇمىسپەن قامتۋ جانە حالىققا قىزمەت كورسەتۋ ورتالىقتارىنىڭ, «قازپوشتا» قىزمەتكەرلەرىمەن كەزدەستى. قحا حاتشىلىعىنىڭ وكىلدەرىمەن جانە ەتنومادەني بىرلەستىكتەردىڭ جەتەكشىلەرىمەن بىرگە بىرقاتار كەزدەسۋ مەن سەمينار-ترەنينگ وتكىزىلدى.
لۋگمار بۋلاروۆ ء«بىرتۇتاس قوعام: كەلىسىم جانە سەنىم» جوباسىنىڭ ماقساتىنا توقتالىپ, ۇلتتىق قۇندىلىقتاردى ناسيحاتتاۋ مەن ساقتاۋدىڭ ماڭىزدىلىعىن اتاپ ءوتتى. سونىمەن قاتار مەملەكەت پەن قوعام اراسىنداعى سەنىم مادەنيەتىن, قوعامداعى بىرلىك پەن كەلىسىمدى نىعايتۋعا باسا نازار اۋداردى. «ادال ازامات» ۇعىمىنا ساي بولۋ ۇساق-تۇيەك تىرلىك پەن كىشكەنتاي ماسەلەلەردەن باستالاتىنىن اتاپ ءوتىپ, حالىققا قىزمەت كورسەتۋگە كۇندەلىكتى اتسالىسىپ جۇرگەن مەكەمە قىزمەتكەرلەرىن ازاماتتارمەن قارىم-قاتىناستا بارىنشا بايىپتى بولۋعا, ءاربىر وتىنىشكە مۇقيات قاراپ, سۇراۋلار بارىسىندا تۋىنداعان ماسەلەنى شەشۋگە, بولماسا شەشۋ الگوريتمىن ۇسىنۋعا شاقىردى.
اۋدان اكىمشىلىگى, حالىققا قىزمەت كورسەتۋ ورتالىقتارى, دەنساۋلىق ساقتاۋ جۇيەسى جانە ءموبيلدى جۇمىسپەن قامتۋ ورتالىقتارى قىزمەتكەرلەرىمەن كەزدەسۋلەر سىندارلى ديالوگكە قۇرىلىپ, قاتىسۋشىلار ەركىن فورماتتا پىكىر الماستى.
سەمينار-ترەنينگتەردە قوعامدىق كەلىسىمدى نىعايتۋ ماسەلەلەرى, قحا ءحححىىى سەسسياسىنىڭ باسىمدىقتارى, قحا وتىرىستارىندا كوتەرىلگەن وزەكتى ماسەلەلەر دە تالقىلانىپ, ۇسىنىستار ايتىلدى.
جامبىل وبلىسىندا ء«بىرتۇتاس قوعام: كەلىسىم جانە سەنىم» جوباسى قاناتقاقتى رەجىمدە جۇزەگە اسىرىلىپ جاتىر. ونى بارلىق وڭىرلەرگە تاراتۋ جوسپارلانىپ وتىر.