جاسىل ەنەرگيا ۇلەسى ۇلعايادى

راسىندا, جاڭارتىلعان ەنەرگيا كوزدەرىنىڭ ۋاقىتى كەلگەندە تولىق ۇستەمدىك قۇراتىنىنا ەشكىمنىڭ تالاسى جوق. ءبىراز جىل بۇرىن بىلەك سىبانىپ ىسكە كىرىسكەن جامبىلدىقتار قازىرگى تاڭدا جۇيەلى جۇمىستىڭ ناتيجەسىن كورىپ وتىر. ارينە, «جاسىل ەنەرگيانى» وركەندەتۋگە دەن قويعان وڭىردە اتقارىلار ءىس از ەمەس.

وڭىردە كۇن, جەل, سۋ ەلەكتر ستانسالارىن ورناتۋ جۇ­مىس­تارى تالاپقا ساي جۇر­گى­زىلىپ جاتىر. ماسەلەن, جۋالى اۋدانى اۋماعىندا ورنالاسقان «Burnoe Solar-1», «Burnoe Solar-2» جاۋاپ­كەرشىلىگى شەكتەۋلى سەرىك­تەس­تىگى ورتالىق ازياداعى ەڭ ءىرى نىسانداردىڭ قاتارىنا ەنگەن. قازىر ءوڭىردىڭ ماقتانىشىنا اينالىپ وتىر.

جالپى, جاڭارتىلعان ەنەرگيا كوزدەرىن وركەندەتۋ ماسەلەسى مەملەكەت باسشىسىنىڭ نازارىنان تىس قالعان جوق. پرەزيدەنت «ادىلەتتى قازاقستاننىڭ ەكو­نو­ميكالىق باعدارى» اتتى قا­زاقستان حالقىنا جولداۋىندا وسى باعىتتاعى جۇمىستى ارى قاراي ساتىمەن جالعاستىرۋدىڭ ماڭىزى زور ەكەنىن اتاپ وتكەن بولاتىن. وڭىردە ون جىلدان استام ۋاقىت بۇرىن باستالعان جۇمىس قازىرگى كەزدە قارقىندى تۇردە جالعاسىپ جاتىر. وبلىس اكىمدىگى ءباسپاسوز قىزمەتى كەلتىرگەن دەرەككە جۇگىنسەك, 2028 جىلى وڭىردەگى جاڭارتىلعان ەنەرگيا كوزدەرىن وندىرەتىن ستانسالاردىڭ سانى 25-كە جەتىپ, جالپى قۋاتى 2,5 گۆت قۇرايدى ەكەن. البەتتە, بۇل كورسەتكىشكە جەتۋ ءۇشىن وڭىرگە بىرنەشە الەۋەتتى ينۆەستوردىڭ تارتىلاتىنى انىق.

جامبىل وبلىسىندا قازىرگى كەزدە جالپى قۋاتى 551,3 مۆت قۇرايتىن 22 جەك جۇمىس ىستەپ تۇر. ونىڭ 6-اۋى – سۋ ەلەكتر ستانساسى (24,4 مۆت), 10-ى – جەل ەلەكتر ستانساسى (275,6 مۆت), قالعان 6-اۋى كۇن ەلەكتر ستانساسى (251,2 مۆت) ەكەنىن ايتا كەتكەن ءجون.

كورسەتكىشتى شامامەن 4-5 ەسەگە دەيىن ارتتىرۋ, ارينە, وڭاي جۇمىس ەمەس. ول ءۇشىن سالاعا جاۋاپتى ماماندار 2028 جىلعا دەيىن تىنىمسىز جۇمىس ىستەۋى كەرەك. قازىرگى كەزدە جەرگىلىكتى اتقارۋشى بيلىك جاڭارتىلعان ەنەرگيا كوزدەرىن الاتىن ستانسالار سالۋعا باسىمدىق بەرىپ وتىر. كۇن, جەل, سۋ ەلەكتر ستانسالارىن سالۋعا قولدان كەلگەنشە جاعداي قاراستىرىلعان. جەرگىلىكتى بيلىك وسى باعىت بويىنشا قولعا الىناتىن ينۆەستيتسيالىق جوبالارعا مۇمكىندىگىنشە قولداۋ بىلدىرۋگە نيەتتى.

وبلىس اكىمدىگى ءباسپاسوز قىزمەتى كەلتىرگەن دەرەككە سەنسەك, الداعى جىلدارى جەك بويىنشا 3 ءىرى جوبانى ىسكە اسىرۋ كوزدەلگەن. ناقتىراق ايتساق, مويىنقۇم اۋدانىندا «Total Eren» كومپانياسى تاراپىنان قۋاتى 1 گۆت قۇرايتىن جەل ەلەكتر ستانساسى; «Masdar» ء(باا) كومپانياسىمەن سارىسۋ جانە تالاس اۋداندارىندا قۋاتى 500 مۆت جەل ەلەكتر ستانساسى جانە «China Power International Holding Limited» كومپانياسىمەن قۋاتى 500 مۆت جەل ەلەكتر ستانساسىن سالۋ بويىنشا ناقتى جۇمىس قولعا الىنباق.

قازىر جامبىل وبلىسى جا­ڭار­تىلعان ەنەرگيا كوزدەرى ستان­سالارىنىڭ جالپى قۋاتى تۇرعىسىنان ەلىمىز بويىنشا كوش باستاپ تۇرسا, نىساندار سانى بو­يىنشا ەكىنشى ورىنعا جايعاسقان. مۇنىڭ بارلىعى جىلدار بويى اتقارىلعان جەمىستى جۇمىستىڭ ناتيجەسى ەكەنى انىق.

جامبىل وبلىسى