كوكتەمگى سۋ تاسقىنىندا اقتوبە وبلىسىندا 4 087 تۇرعىن ۇيگە سۋ كىردى. تاسقىن زارداپتارىن جويۋ جونىندەگى وڭىرلىك كوميسسيا شەشىمىمەن 1 014 ءۇي تۇرۋعا جارامسىز, ال 3 073 تۇرعىن ءۇي مەن ساياجاي باسپانالارى جوندەۋگە جارامدى دەپ تانىلدى. سونداي-اق 3 004 ءۇيدىڭ جوندەۋ جۇمىستارىنا جەرگىلىكتى بيۋدجەت ەسەبىنەن 9 ملرد تەڭگە ءبولىنىپ, وسى قارجى ءۇي يەلەرىنىڭ ەسەپشوتتارىنا اۋدارىلدى. 504 وتباسى جاڭا ءۇيدىڭ سالىنۋىن كۇتپەي-اق, وزدەرى تۇرىپ جاتقان اۋدان اۋماعىنان ساتىلىمداعى تۇرعىن ۇيلەردى الۋعا كەلىسىمىن بەردى.
تاراتىپ ايتقاندا, تاسقىننان اقتوبە قالاسىندا – 200, ويىل اۋدانىندا – 307, ىرعىز اۋدانىندا –160, قوبدا اۋدانىندا – 155, مۇعالجار اۋدانىندا – 69, تەمىر اۋدانىندا – 57, ايتەكە بي اۋدانىندا 51 تۇرعىن ءۇي تۇرۋعا مۇلدە جارامسىز بولىپ قالدى. سونداي-اق بايعانين اۋدانىندا – 8, مارتوك اۋدانىندا – 5, العا اۋدانىندا 2 ءۇي قيراپ قالدى. اقتوبە قالاسىندا ءۇيى سۋعا كەتكەن 200 وتباسىعا جاڭا پاتەر ساتىپ الۋعا شەشىم شىعارىلسا, 138 وتباسى جاڭا پاتەرلەرگە كىرىپ ۇلگەردى. ويىل اۋدانىندا – 130, مۇعالجاردا – 55, تەمىردە – 36, ىرعىزدا – 35, ايتەكە بي اۋدانىندا – 25, بايعانين اۋدانىندا – 8, قوبدا اۋدانىندا – 8, مارتوكتە – 5, العا اۋدانىندا 2 باسپانا ساتىپ الىندى.
ويىل اۋدانىنىڭ قاراتال ەلدى مەكەنىندە سۋ تاسقىنى كەزىندە 210 تۇرعىن ءۇي, مادەنيەت ءۇيى, بالاباقشا, كىتاپحانا ءبۇلىندى. كوميسسيا ۇزاق ۋاقىت سۋدىڭ استىندا تۇرعان اۋىلداعى الەۋمەتتىك نىسانداردى قايتا قالپىنا كەلتىرۋ مۇمكىن ەمەس دەگەن قورىتىندىعا كەلدى. قاراتال اۋىلىندا مامىردىڭ سوڭىنان باستاپ 11 مەردىگەر 120 ءۇيدىڭ قۇرىلىسىن باستادى. بۇگىندە سالىنىپ جاتقان 120 ءۇيدىڭ قابىرعالارى كوتەرىلىپ, 65 ءۇيدىڭ شاتىرى جابىلسا, 30 ۇيدە ىشكى ارلەۋ جۇمىستارى ءجۇرىپ جاتىر. جاڭا باسپانانىڭ سالىنۋىن كۇتپەگەن وسى اۋىلداعى 60 وتباسىعا اۋدان ورتالىعى ويىلدان دايىن ۇيلەر ساتىپ الىندى. ىرعىز اۋدانىنىڭ نۇرا اۋىلىندا تۇرعىن ءۇي قۇرىلىستارى كەشەۋىلدەپ باستالدى. كۇزگە دەيىن وسى اۋىلداعى قۇرىلىس جۇمىستارى اياقتالماي قالۋى مۇمكىن.
سۋ تاسقىنىنان وڭىردە 69 كاسىپكەرلىك نىسانى زارداپ شەكتى. تاسقىن كەزىندە شاعىن جانە ورتا كاسىپكەرلىك نىساندارىنا كەلتىرىلگەن م ۇلىكتىك شىعىنداردىڭ وتەماقىسىن انىقتاۋ جونىندەگى وڭىرلىك كوميسسياعا 22 كاسىپكەر ارىزدانسا, 17 كاسىپكەرگە 230,7 ملن تەڭگە سوماسىندا وتەماقى تولەۋ تۋرالى شەشىم شىعارىلدى. سونىڭ ىشىندە ەڭ كوپ زارداپ شەككەن اقتوبە قالاسى مەن تەمىر اۋدانىندا ورنالاسقان 6 كاسىپكەرلىك نىسانىنا 63,5 ملن تەڭگە كولەمىندە وتەماقى تولەنەتىن بولدى. ىرعىز اۋدانى بويىنشا كاسىپكەرلەر شىعىندارى ءالى تۇگەندەلىپ بولعان جوق. دۇنيە-مۇلكى, عيماراتى ب ۇلىنگەن كاسىپكەرلەردىڭ وتەماقى الۋعا بايلانىستى وتىنىشتەرى وسى جىلدىڭ 30 قاراشاسىنا دەيىن قابىلدانادى.
اقتوبە وبلىسى