بىرنەشە جىل بۇرىن ەلىمىزدىڭ ءار قيىرىندا «بالەن اۋىل الكوگولدىك ىشىمدىكتەن باس تارتتى» دەگەن اقپاراتتار ءجيى جاريالانا باستاعان ەدى. سول كەزدە «بۇل ءبىر ناۋقاندىق اڭگىمە شىعار» دەگەن ءسوز دە از ايتىلعان جوق. ءتىپتى كوپشىلىك دەرەك تاراتقان جۇرتتى «پيار قۋىپ كەتتى» دەپ ىشتەي ايىپتاعان دا ەدى. بىراق سول كەزدەگى يگى باستامانىڭ ناتيجەسىن ەندى كورە باستاعان سياقتىمىز.
جامبىل وبلىسىندا كەيىنگى ءتورت جىلدا بىردە-ءبىر قىلمىس تىركەلمەگەن اۋىل بار دەسە, سەنەر مە ەدىڭىز؟ ەل بولعان سوڭ ەلدى مەكەندەردە باس جارىپ, كوز شىعارا جازدايتىن سوتقارلار كەزدەسىپ تۇرادى. بۇل – جازىلماعان زاڭدىلىق قوي. بىراق سارىسۋ اۋدانىنا قاراستى جاڭارىق اۋلىنىڭ قاريالارى جاستاردى «اشسا الاقاندا, جۇمسا جۇدىرىقتا ۇستاپ» وتىرعان سەكىلدى. سودان دا بولسا كەرەك, اۋىل ىشىندە ءتورت جىل بويى قىلمىس تىركەلمەپتى.
وبلىستىق پوليتسيا دەپارتامەنتى تاراتقان دەرەككە جۇگىنسەك, اۋىلدىق وكرۋگ قۇرامىندا اقتوعاي جانە ۇزاقباي سىزدىقباەۆ ەلدى مەكەندەرى بار. جالپى, مۇندا 1700-گە جەتەقابىل حالىق تۇرادى.
بىرنەشە جىلدان بەرى اۋىلدىق وكرۋگتەگى دۇكەندەردە تەمەكى جانە الكوگولدىك ونىمدەر مۇلدە ساتىلمايدى. جەرگىلىكتى حالىق بۇل ءىستى قاتاڭ قاداعالاۋعا العان. تاياۋدا وكرۋگتە تاعى ءبىر دۇكەن اشىلادى ەكەن. كاسىپكەر دە اۋىل حالقىنىڭ جازىلماعان زاڭىنا باعىنىپ, جۇرتتىڭ ۇستانىمىن قولداپ وتىر.
باياندى باستامانى اۋىل حالقى ءوزارا اقىلداسا وتىرىپ قابىلداعان. وكرۋگكە قاراستى ەلدى مەكەن تۇرعىندارى, اسىرەسە جاستار ۇلكەندەردىڭ كەسىمدى ءسوزىن قولداپ, شەشىمىنە باس يگەن. ناتيجەسىندە, اۋىلدا قىلمىس اتاۋلى ساپ تىيىلعان ەكەن.
«شايتاننىڭ سۋى تالاي وتباسىلىق جانجالدىڭ, قىلمىستىڭ تۋىنداۋىنا اكەپ سوعادى. جاڭادان وتاۋ قۇرعان جاستاردىڭ ۇيىنەن بەرەكە كەتەدى. وكرۋگ تۇرعىندارى ءبىر ءۇيدىڭ بالاسىنداي تاتۋ-ءتاتتى عۇمىر كەشۋى كەرەك. ءبىز مۇنداي شەشىمدى سول ءۇشىن قابىلدادىق. اۋىلداستارىمىز ءبىزدى قولدادى, قۋاتتادى. ناتيجەسىندە, ەلدى مەكەندەردە مىزعىماس تىنىشتىق ورنادى. وسى تاتۋلىقتى, بىرلىكتى, بەرەكەلى تىرلىكتى ساقتاۋعا كۇش سالىپ جاتىرمىز», دەيدى جەرگىلىكتى تۇرعىندار.
ۋچاسكەلىك پوليتسيا ينسپەكتورى ساعىنعالي سالاماتوۆ كەيىنگى بەس جىلدىڭ بەدەرىندە ۇ.سىزدىقباەۆ اۋلىندا تۇرىپ جاتىر. وكرۋگكە قاراستى ەلدى مەكەندەردى ءجيى ارالاپ, تۇراقتى تۇردە رەيد جۇرگىزەدى. ىلگەرىدە پوليتسيا ەسەبىنە ىلىنگەن ازاماتتاردى تۇرعىلىقتى جەرى بويىنشا دەر كەزىندە تەكسەرىپ ءجۇر. ءبىر سوزبەن ايتقاندا, قىلمىستىڭ الدىن الۋ بويىنشا جۇيەلى جۇمىس اتقارىپ كەلەدى. اۋىل حالقى ەڭبەكقور ينسپەكتوردى تەگىس تانيدى, قۇرمەتتەيدى.
«اۋىلدىق وكرۋگكە قاراستى ەلدى مەكەن تۇرعىندارى قاي كەزدە دە جۇمىلعان جۇدىرىقتاي بىرىگىپ, بەرەكەلى ىستەردىڭ باسىندا جۇرەدى. جەرگىلىكتى حالىق باتالى باستامالاردىڭ بارلىعىنا قولداۋ ءبىلدىرىپ, بەلسەندىلىك تانىتادى. پوليتسيا قىزمەتكەرى رەتىندە مەن وكرۋگ تۇرعىندارىنىڭ سەنىمىن اقتاۋ ماقساتىندا ايانباي جۇمىس ىستەپ ءجۇرمىن. اۋىلداستارىمنىڭ سەنىمىنە سەلكەۋ تۇسىرگىم كەلمەيدى. ەڭ باستىسى, اۋىلدا قىلمىس تىركەلىپ جاتقان جوق. ال كىشىگىرىم داۋلاردى مەدياتسيا ارقىلى شەشۋگە كۇش سالىپ كەلەمىز. وكرۋگكە كىرەتىن اۋىلداردا جاعداي تۇراقتى ءارى تىنىش بولسا دا, ءوز باسىم ۇلكەن جاۋاپكەرشىلىك جۇگىن سەزىنەمىن. نەگە دەسەڭىز, بىرنەشە جىل بويى بىرلەسە اتقارعان جۇمىستىڭ ارقاسىندا قول جەتكىزگەن وڭ كورسەتكىشتى ساقتاۋىمىز كەرەك», دەيدى س.سالاماتوۆ.
وبلىستىق پوليتسيا دەپارتامەنتىنىڭ ءباسپاسوز قىزمەتى كەلتىرگەن دەرەككە سەنسەك, الكوگولدىك ىشىمدىكتەن باس تارتقان جاڭارىقتان وزگە اۋىلدار دا بارشىلىق. ناقتىراق ايتار بولساق, ءوڭىر بويىنشا 12 اۋىلدىق وكرۋگ بىرنەشە جىل بويى ەلدى مەكەندەردە ىشىمدىك ساتۋعا شەكتەۋ قويعان. سول 12 وكرۋگتىڭ بارلىعى قازىرگى كەزدە ەڭ قاۋىپسىز اۋىلدار ساناتىنا قوسىلىپ وتىرعانى كوڭىل توعايتادى.
بىرنەشە جىل بۇرىن ناۋقان سيپاتىندا باستالعان باستاما الدەنەشە جىلدان كەيىن وڭ ناتيجە بەرگەنى – راسىندا جاقسىلىقتىڭ نىشانى. الكوگولدىك ىشىمدىكتەن باس تارتقان ەلدى مەكەندەردە قازىرگى كەزدە جاعداي تۇراقتالعان. اقساقالداردىڭ اقىلىنا قۇلاق اسقان جاستار قۇقىق بۇزۋشىلىققا جول بەرمەيدى. ولار مۇنى ومىرلىك سالتىنا اينالدىرعان.
جامبىل وبلىسى