قاتەرلى ىسىك دەرتىنەن زارداپ شەگەتىن ناۋقاستاردىڭ سانى ازايار ەمەس. اتى جامان دەرتكە شالدىعىپ, جىل سايىن قانشاما ازامات ءۇزىلىپ جاتىر. ايتسە دە اۋىر دەرتتى ارقالاعاندارعا اق حالاتتى ابزال جاندار قولدان كەلگەنشە كومەك كورسەتەدى.
بىرنەشە كۇن بۇرىن جامبىلدىق ونكولوگ ماماندار جاعدايى كۇرت ناشارلاعان ناۋقاستىڭ ءومىرى ءۇشىن كۇرەستى. سانالى عۇمىرىندا بالاباقشادا ۇزدىكسىز ەڭبەك ەتىپ, سۇيىكتى جۇمىسىنا ءجىپسىز بايلانعان 62 جاستاعى ناۋقاس بۇرىن-سوڭدى مەديتسينالىق كومەككە جۇگىنىپ كورمەپتى. دەنساۋلىعىن ۋاقتىلى تەكسەرتە الماعاندىقتان, بويىنداعى ىسىك التى كەلىگە دەيىن ءوسىپ كەتكەن.
ناۋقاستىڭ ايتۋىنشا, دارىگەرلەردىڭ الدىنا بارۋعا ەشقانداي سەبەپ تاپپاعان. عۇمىر بويى دەنساۋلىعى سىر بەرمەگەن. سوندىقتان ول دارىگەرلەرگە قارالۋدى, كومەككە جۇگىنۋدى ءجون دەپ ساناماعان. تەك بويىن دەرت دەندەگەننەن كەيىن عانا لاجسىز مەديتسينا قىزمەتكەرلەرىنە قايىرىلۋعا ءماجبۇر بولعان.
مەركىلىك ناۋقاستىڭ جاعدايىمەن تانىسقاننان كەيىن وبلىستىق كوپبەيىندى ونكولوگيا جانە حيرۋرگيا ورتالىعىندا قاتەرلى ىسىكتى جويۋ بويىنشا بىرەگەي وپەراتسيا جاسالعان. وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى كەلتىرگەن دەرەككە جۇگىنسەك, ناۋقاستىڭ بويىنداعى ىسىك قاۋىپتى شەككە دەيىن ءوسىپ كەتكەن.
وسى جىلدىڭ كوكتەم مەزگىلىندە اسقازانىن الدەبىر سىرقات مازالاي باستاعانىن سەزگەن ناۋقاس دەرتىنە داۋا ىزدەۋ كەرەكتىگىن تۇسىنگەن. اسقازان تۇسى اپتا سايىن ۇلكەيە تۇسكەن. جاعدايدىڭ ۋشىعا باستاعانىن تۇسىنسە دە, ول باستاپقىدا اۋرۋعا باسا ءمان بەرمەپتى. ۋاقىت وتكەن سايىن اعزاسىنىڭ دەرت دەندەگەن بولىگى ايتارلىقتاي ۇلعايعانىن بايقاعان. سالدارىنان تىنىس الۋى قيىنداپ, ەركىن قادام باسۋى مۇڭعا اينالعان. اقىر سوڭىندا تۇماۋعا قارسى ەكپە الۋ نيەتىمەن ەمحاناعا بارعان. ماماندار ازاماتتىڭ دەنساۋلىعىن تولىق تەكسەرگەن كەزدە باۋىر تۇسىندا ۇلكەن ىسىكتىڭ پايدا بولعانىن انىقتاپتى.
«ەگۋ پۋنكتتىندەگى دارىگەر بىردەن ىشىمە نازار اۋداردى. سىرقات بەلگىلەرىن بىردەن بايقاعان بولۋى كەرەك, شۇعىل تەكسەرىلۋ كەرەگىن ايتتى. ەگەر ۆاكتسينالاۋ بولماعاندا, مەن ەشقاشان دارىگەردىڭ الدىنا بارماس ەدىم», دەيدى ناۋقاس.
وبلىستىق كوپبەيىندى ونكولوگيا جانە حيرۋرگيا ورتالىعىنىڭ توراكوابدومينالدى حيرۋرگيا بولىمشەسىنىڭ مەڭگەرۋشىسى, ەمدەۋشى دارىگەر ەراسىل اراپوۆتىڭ ايتۋىنشا, جاعداي ايتارلىقتاي ۋشىققان. ناۋقاس قايتۋى قيىن ۇدەرىستىڭ باستاپقى شەگىنە جەتكەن. نەوپلازما ءىس جۇزىندە بۇكىل باۋىردىڭ 70 پايىزىن الىپ, ءوت قابىمەن جانە جالپى باۋىر ارتەرياسىمەن تىعىز بايلانىستا بولعان, ال الىپ ىسىكتىڭ سالماعى جوعارىدا ايتقانىمىزداي, 6 كيلوگرامعا دەيىن جەتكەن ەكەن.
«ونكولوگيالىق ورتالىقتىڭ ەمحاناسىنداعى ارىپتەستەرىم وسىنداي قيىن ناۋقاس تۋرالى ايتقان كەزدە قول قۋسىرىپ وتىرماي, بىردەن تەكسەرۋگە باردىم. كۇردەلى وتا جاساۋعا بىرنەشە سەبەپ تۇرتكى بولدى», دەيدى بىلىكتى مامان جاعدايدى تولىققاندى ءتۇسىندىرىپ.
ە.اراپوۆتىڭ ايتۋىنشا, ناۋقاس كۇردەلى وپەراتسيا جاساۋعا ەش قينالماستان كەلىسىم بەرگەن. ول ءوزىنىڭ اتى جامان اۋرۋدى جەڭىپ شىعاتىنىنا 100 پايىز سەنىمدى بولعان.
«ناۋقاستىڭ وپتيميستىك كوزقاراسى شەشۋشى ءرول اتقارعانىن ايتا كەتكەن ءجون. ول ءوزىنىڭ دياگنوزىن ەستىگەندە ەش ساسقان جوق. ءبىز ونىڭ رەاكتسياسىنا تاڭعالدىق. ناۋقاس ەش ويلانباستان: «جارايدى, ماعان قاجەت دۇنيەنىڭ ءبارىن ىستەڭىزدەر», دەدى. ول كىسىنىڭ وسىنداي تاۋەكەلگە بارۋى جاعدايدى جەڭىلدەتتى», دەيدى دارىگەر.
بىلىكتى ماماننىڭ ايتۋىنشا, مۇنداي ىسىكتى تولىعىمەن الىپ تاستاعان ابزال. ولاي بولماعان جاعدايدا اۋىر سىرقاتتىڭ قايتالانۋ قاۋپى جوعارى بولماق. ال وپەراتسيا كەزىندە جاسالعان كەز كەلگەن ءساتسىز قوزعالىس قان كەتۋىنە سەبەپشى بولۋى ىقتيمال. ءبىر سوزبەن ايتقاندا, اسا ساقتىقتى قاجەت ەتەدى. باسقا امال جوق.
«كوپبەيىندى ونكولوگيا جانە حيرۋرگيا ورتالىعىنىڭ توراكوابدومينالدى ونكوحيرۋرگيا مەكتەبىنىڭ كوپجىلدىق تاجىريبەسىنىڭ ارقاسىندا وسىنداي كۇردەلى ءارى قاۋىپتى وتانى جاساۋعا مۇمكىندىك تۋىپ وتىر. ءبارى ساتىمەن اياقتالعانى كوڭىل قۋانتادى», دەيدى ە.اراپوۆ.
وبلىستىق كوپبەيىندى ونكولوگيا جانە حيرۋرگيا ورتالىعىنىڭ ديرەكتورى, وبلىستىڭ باس ونكولوگى ايباز ءاليحانوۆتىڭ ايتۋىنشا, بىلتىر ەمدەۋ مەكەمەسى زاماناۋي جابدىقتارمەن تولىقتاي جابدىقتالعان ەكەن. ەندى وڭىردەگى جانە كورشىلەس وبلىستارداعى ونكولوگيالىق دەرتكە شالدىققان ناۋقاستاردى قولجەتىمدى ساۋلەلىك تەراپيا ادىستەرىمەن ەمدەۋگە تولىقتاي مۇمكىندىك بار.
جامبىل وبلىسى