ءماجىلىس دەپۋتاتتارى ايدوس سارىم, سەرگەي پونومارەۆ الماتى قالاسىنداعى «قالقامان» مەترو ستانساسىنىڭ قۇرىلىسىمەن تانىستى. نىسان اباي داڭعىلى بويىندا ب.ءاشىموۆ پەن ت.ايبەرگەنوۆ كوشەلەرىنىڭ اراسىندا سالىنىپ جاتىر.
ناۋرىزباي اۋدانىنداعى «قالقامان» مەترو ستانساسى 2026 جىلى پايدالانۋعا بەرىلۋى كەرەك. قۇرىلىس بارىسىندا سول جاق تۋننەلدە 936 مەتر, وڭ جاق تۋننەلدە 559 مەتر قازىلعان. گازبەن جابدىقتاۋ, ەلەكتر جۇيەسى, تەلەكوممۋنيكاتسيالار مەن سۋ قۇبىرىنىڭ سىرتقى جەلىلەرىن كوشىرۋ جۇمىستارى جوسپار بويىنشا جۇرگىزىلىپ جاتىر. دەپۋتاتتار جۇمىسشىلارمەن سويلەسىپ, قۇرىلىس جۇمىستارىنىڭ كەستەسىمەن تانىستى.
«قالقامان» ستانساسىنا دەيىنگى جەلى قۇرىلىسى 2,5 جىلدان بەرى ءجۇرىپ جاتىر, ال مەگاپوليس كەپتەلىستەن كوز اشپاي وتىر. جۇمىس ۇزاققا سوزىلىپ بارادى, قۇرىلىس ءۇشىن جەر ۋچاسكەلەرىن, جەكە ۇيلەردى ساتىپ الۋ قاجەت, ال يەلەرى ساتقىسى كەلمەيدى, وتەماقى سوماسىنا كەلىسپەيدى. ادامدار سوتتاسىپ, ءتىپتى, كەي ىستەر جوعارعى سوتقا دەيىن جەتكەن جاعدايلار بار. وسى ۋاقىت ىشىندە جوبانىڭ قىمباتتاۋى, قايتا باعالاۋ, مەملەكەتتىك ساراپتاما قاجەت بولادى», دەدى دەپۋتات سەرگەي پونومارەۆ.
2030 جىلعا دەيىن «بارلىق» بازارىنا دەيىن تاعى ءۇش ستانسا سالۋ جوسپارلانعان, وندا «باتىس اۆتوۆوكزالىن» قامتيتىن ءىرى مۋلتيمودالدى كولىكتىك-اۋىسىمدىق توراپ قۇرىلادى.
بۇعان دەيىن ءماجىلىس دەپۋتاتتارى قالاداعى جەو-2-ءنى جاڭعىرتۋ جۇمىستارىمەن تانىسىپ, گاز وتىنىنا كوشۋ 2026 جىلى اياقتالۋعا ءتيىس ەكەنىن مالىمدەگەن ەدى. سونداي-اق حالىق قالاۋلىلارى بىرقاتار ەڭبەك ۇجىمىمەن كەزدەسىپ, ازاماتتاردى قابىلداپ, الەۋمەتتىك ماڭىزى بار نىسانداردى ارالادى.