سەنات دەپۋتاتتارى سۇلتان دۇيسەمبينوۆ پەن عالياسقار سارىباەۆ جەتىسۋ وبلىسىنىڭ قاراتال اۋدانىنىڭ تۇرعىندارىمەن كەزدەسۋ وتكىزىپ, الەۋمەتتىك ماڭىزى بار بىرنەشە نىساندا بولدى.
سەناتورلار باستوبە اۋىلىنداعى شيكى مۇنايدى قايتا وڭدەۋ مەن مازۋتتى تەرەڭ وڭدەۋگە ماماندانعان جاۋاپكەرشىلىگى شەكتەۋلى سەرىكتەستىك «سەكۆويا پليۋس» جابدىقتارىن جاڭعىرتۋ بارىسىمەن, ورتالىق اۋداندىق اۋرۋحاناداعى كۇردەلى جوندەۋ جۇمىستارىنىڭ اياقتالۋىمەن, سونداي-اق ۇشتوبە قالاسىنداعى گۋمانيتارلىق كوللەدجدىڭ جۇمىسىمەن تانىستى.
«مۇناي وڭدەۋ زاۋىتى اۋدان ەكونوميكاسىنا دا, جالپى جەتىسۋ وبلىسى ءۇشىن دە ستراتەگيالىق ماڭىزعا يە. جابدىقتى جاڭعىرتۋ قايتا وڭدەۋ ۇدەرىسىن جاقسارتۋعا, اتموسفەراعا زياندى شىعارىندىنى ازايتۋعا, اۋىل تۇرعىندارىنا جاڭا جۇمىس ورىندارىن اشۋعا مۇمكىندىك بەرەدى», دەدى سەناتور س.دۇيسەمبينوۆ.
دەپۋتاتتار اۋداندىق اۋرۋحاناداعى كۇردەلى جوندەۋدى جەدەلدەتۋدىڭ ماڭىزىنا, سونداي-اق گۋمانيتارلىق كوللەدجدە پەداگوگ كادرلاردى دايارلاۋ ساپاسىنا جەرگىلىكتى اتقارۋشى ورگانداردىڭ نازارىن اۋداردى.
«اۋداندىق اۋرۋحانا حالىققا مەديتسينالىق قىزمەت كورسەتەدى. مەديتسينالىق كومەك كورسەتۋ ساپاسىن جاقسارتۋ ءۇشىن جوندەۋدى تەز ارادا اياقتاۋ جونىندەگى بارلىق شارانى جۇزەگە اسىرۋ كەرەك, ال كوللەدج پەداگوگ كادرلاردى جوعارى دەڭگەيدە دايارلاۋعا ءتيىس. بالالارىمىزدىڭ تاعدىرى مەن ەلىمىزدىڭ بولاشاعى وسىعان بايلانىستى», دەپ اتاپ ءوتتى عالياسقار سارىباەۆ.