جۋىردا اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە «ناۋاي مەن اباي: جالپىادامزاتتىق قۇندىلىقتار ساباقتاستىعى» تاقىرىبىندا حالىقارالىق فورۋم ءوتتى. اتالعان وقۋ ورنىنىڭ تىكەلەي باستاماسىمەن ۇيىمداستىرىلعان حالىقارالىق فورۋم ناۋاي مەن ابايدىڭ باي مۇراسى ارقىلى قازىرگى قوعام دامۋىنىڭ رۋحاني, تاريحي جانە فيلوسوفيالىق نەگىزدەرىن ناسيحاتتاۋ, ۇلى ويشىلداردىڭ مۇراسىن زەرتتەيتىن الەمنىڭ جەتەكشى عالىمدارى اراسىندا ديالوگ پەن ىنتىماقتاستىق ءۇشىن جاڭا الاڭ قۇرۋدى ماقسات ەتەدى.
بۇگىندە قازاقستان مەن وزبەكستان حالىقتارىنىڭ دوستىعى – شىنايى تاتۋ كورشىلىك پەن ءوزارا سىيلاستىقتىڭ جارقىن ۇلگىسى. ەجەلدەن سەنىمدى وداقتاس ءارى ماڭىزدى ارىپتەس بولىپ تابىلاتىن ەكى مەملەكەت اراسىنداعى مادەني بايلانىستى دامىتۋ ماقساتىندا ءىس-شارالار ۇيىمداستىرۋ, ۇرپاق اراسىنداعى ساباقتاستىقتى نىعايتۋ باعىتىندا بىرلەسكەن جوبالاردى جۇزەگە اسىرۋ – ءبىلىم مەكەمەلەرىنىڭ باستى مىندەتتەرىنىڭ ءبىرى.
ەجەلدەن كورشى, ءتۇبى ءبىر تۇركى الەمىنىڭ قوس قازىعىنداي بولعان قازاق-وزبەك حالقىنىڭ عاسىرلار بويعى بايلانىستارىنىڭ تامىرى تىم تەرەڭدە ەكەنى بەلگىلى. ءبىزدىڭ سالت-داستۇرلەرىمىز, ءدىلىمىز بەن قۇندىلىقتارىمىز بارىنشا جاقىن ءارى ۇقساس. تاتۋ كورشىلىك پەن ءوزارا قۇرمەت قاعيداتتارى – شىعىس حالىقتارىنىڭ ەجەلدەن ەرەكشە بەلگىسى. سول تۇرعىدا اۋەلدەن قالىپتاسقان قازاقستان-وزبەكستان دوستىق قارىم-قاتىناستارى ورتالىق ازيا ەلدەرى ءۇشىن عانا ەمەس, بۇكىل الەمدىك قوعامداستىق ءۇشىن دە جاقسى ۇلگى. ءار ۇلتتىڭ كورشىلەس ۇلتتارمەن تاتۋ-ءتاتتى ءومىر ءسۇرۋى – ءارى ۇلتتىق, ءارى جالپىادامزاتتىق قۇندىلىق, ورتاق جاۋاپكەرشىلىك. تاريحىمىز «اۋىلى ارالاس, قويى قورالاس» جاتقان حالىقپەن جىبەك جىپتەي بىرگە ورىلەدى. ۇلى تولە ءبيىمىز تاشكەنت تورىندە جاتىر. ءتىپتى پەداگوگيكالىق ءبىلىم مەن عىلىمنىڭ قارا شاڭىراعى – اباي ۋنيۆەرسيتەتىنىڭ قۇرىلۋ تاريحى دا تاشكەنتپەن بايلانىستى ەكەندىگى زيالى قاۋىم وكىلدەرىنە بەلگىلى.
فورۋم اياسىندا وقىتۋشىلار مەن ستۋدەنتتەر اراسىنداعى ناۋاي شىعارماشىلىعىنا ارنالعان كوركەم پلەنەر, «الماتى قالاسىنداعى ستۋدەنت جاستاردىڭ شىعارماشىلىعىنداعى شىعىس موتيۆتەرى» كورمەسى, ناۋاي ورتالىعىنىڭ سالتاناتتى اشىلۋى, ناۋاي وقۋلارى: «ناۋاي – الەم تىلدەرىندە» مانەرلەپ وقۋ بايقاۋى, «الىشەر ناۋاي مۇراسى: عىلىم, ءبىلىم جانە تاربيە سينەرگياسى» تاقىرىبىندا حالىقارالىق عىلىمي-ادىستەمەلىك سەمينار ءوتتى.
اتالعان ءىس-شارانىڭ پلەنارلىق وتىرىسىنا اباي اتىنداعى قازۇپۋ-دىڭ رەكتورى بولات تىلەپ, وزبەكستان رەسپۋبليكاسىنىڭ الماتى قالاسىنداعى باس كونسۋلى ابدۋراحيم كايۋموۆ, قازاقستان رەسپۋبليكاسىنىڭ وزبەكستان رەسپۋبليكاسىنداعى ەلشىلىگىنىڭ وكىلى ەرعالي قىستاۋباەۆ, وزبەكستانداعى قازاق ۇلتتىق مادەني ورتالىعىنىڭ جەتەكشىسى سەرىكباي ۇسەنوۆ, «الماتى قالاسىنىڭ وزبەك ۇلتتىق مادەني ورتالىعى» قوعامدىق بىرلەستىگى توراعاسىنىڭ ورىنباسارى ابدۋحاليل ورالباەۆ, ناۋاي مەملەكەتتىك پەداگوگيكالىق ينستيتۋتىنىڭ عىلىمي جۇمىس جانە يننوۆاتسيالار جونىندەگى پرورەكتورى ديلنوزا نارزيكۋلوۆا, ءا.ناۋاي اتىنداعى تاشكەنت مەملەكەتتىك وزبەك ءتىلى مەن ادەبيەتى ۋنيۆەرسيتەتىنىڭ ستراتەگيالىق دامۋ جونىندەگى پرورەكتورى نوديربەك دجۋراكۋزيەۆ, شىرشىق مەملەكەتتىك پەداگوگيكالىق ۋنيۆەرسيتەتىنىڭ دوتسەنتى وسەرباي بايقابىلوۆ, باسقا دا وزبەكستان جانە الماتى قالاسى جوعارى وقۋ ورىندارىنىڭ عالىمدارى مەن قوعام قايراتكەرلەرى قاتىسىپ, ءسوز سويلەدى. ەكى ەلدىڭ ۇلى تۇلعالارى ناۋاي مەن اباي مۇرالارى جان-جاقتى بارىنشا زەردەلەنىپ, ۇلى ويشىلداردىڭ شىعارماشىلىعى تۋرالى تاعىلىمدى ويلار ورتاعا سالىنىپ, عىلىمي نەگىزدە تالقىلاندى. ەكى ويشىل شىعارماشىلىعىنداعى جالپىادامزاتتىق قۇندىلىقتار سارالاندى. ءبىر تامىردان ءنار العان قازاق جانە وزبەك ادەبي بايلانىستارىن زەرتتەۋ – بۇگىنگى كۇن تالابى دەپ ويلايمىز. سوندىقتان كوركەم تۋىندىلارى الەمدىك ادەبيەتتتىڭ جاۋھارىنا اينالعان اباي مەن ناۋاي بۇگىندە باۋىرلاس قازاق-وزبەك جۇرتىنىڭ ادەبي, مادەني بايلانىستارىنىڭ التىن كوپىرىنە اينالىپ وتىر. ۇلى اقىنداردىڭ ادەبي مۇراسى باۋىرلاس تۇركى حالىقتارىنىڭ جارقىن بولاشاعى ءۇشىن قىزمەت ەتە بەرمەك. جالپىادامزاتتىق قۇندىلىقتاردى دارىپتەپ, ادىلدىك پەن دوستىقتى ۋاعىزدايتىن قوس اقىننىڭ كوركەم شىعارمالارى وزبەكستان مەن قازاقستان اراسىنداعى ءوزارا دوستىق پەن ىنتىماقتاستىق قارىم-قاتىناستاردى نىعايتۋعا سەپتىگىن تيگىزەدى. تۇركى مادەنيەتىنىڭ قادىر-قاسيەتىن ارتتىرىپ, ورتاق قۇندىلىقتاردى دارىپتەي الۋ – تۇركى جۇرتىنىڭ بىرلىگىن نىعايتۋعا قوسقان ۇلەسىمىز بولماق.
الۋا تاڭجارىقوۆا,فيلولوگيا عىلىمدارىنىڭدوكتورى, پروفەسسور