قر تۋريزم جانە سپورت مينيسترلىگى جانىنداعى مەملەكەتتىك قىزمەتشىلەردىڭ, اسكەري قىزمەتشىلەردىڭ, قۇقىق قورعاۋ جانە ارناۋلى ورگاندار قىزمەتكەرلەرىنە قۇمار ويىندارعا جانە ءباس تىگۋگە تىيىم سالۋدى ەنگىزۋ تۋرالى پەتيتسيانى قاراۋ بويىنشا جۇمىس توبىنىڭ ءبىرىنشى وتىرىسى ءوتتى, دەپ جازادى Egemen.kz اتالعان ۆەدومستۆونىڭ ءباسپاسوز قىزمەتىنە سىلتەمە جاساپ.
ءىس-شاراعا جۇمىس توبىنىڭ مۇشەلەرى, اتاپ ايتاقاندا: پەتيتسيا اۆتورى, «ادىلدىك جولى» باسشىسى ديدار سماعۇلوۆ, پارلامەنت دەپۋتاتتارى, ازاماتتىق بەلسەندىلەر, مۇددەلى مەملەكەتتىك ورگاندار مەن ويىن بيزنەسىنىڭ وكىلدەرى قاتىستى.
تۋريزم جانە سپورت ۆيتسە-ءمينيسترى ميراس تولەباەۆ وتىرىستى اشىپ, پەتيتسياعا 50 مىڭ ادام قول قويعانىن جانە كودەكسكە سايكەس مينيسترلىك 40 كۇن ىشىندە شەشىم قابىلداۋى ءتيىس ەكەنىن ايتتى. مينيسترلىك ويىن بيزنەسى سالاسىنداعى مەملەكەتتىك باقىلاۋدى كۇشەيتۋ جانە مەملەكەتتىك اپپاراتتا قوسا العاندا, لۋدومانيانىڭ الدىن الۋ جونىندەگى جۇمىستى باستادى.
ديدار سماعۇلوۆ لاۋازىمدى تۇلعالاردىڭ قۇمار ويىندارعا قاتىسۋىنا بايلانىستى سىبايلاس جەمقورلىق تاۋەكەلدەرى تۋرالى الاڭداۋشىلىق ءبىلدىردى.
«بۇل پەتيتسيا قۇمار ويىندار كەلتىرەتىن زياندى ازايتۋ ءۇشىن قاجەت, ەل بيۋدجەتىن باسقاراتىندار كازينودا جۇرمەۋى كەرەك. سەبەبى كازينو – ۇلكەن سىبايلاس جەمقورلىق تاۋەكەلى. ارينە, ەشكىم ويىن اشىق ايتا المايدى, بىراق جينالىستاردا باستامانى قايتا قاراۋ كەرەك ەكەندىگى ءجيى ايتىلىپ جاتىر», دەپ اتاپ ءوتتى ازاماتتىق بەلسەندى ديدار سماعۇلوۆ.
پارلامەنت ءماجىلىسىنىڭ دەپۋتاتى ە.بەيسەنباەۆ جۇمىس توبىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى, لوتەرەيا قىزمەتى, دەنساۋلىق ساقتاۋ, مەملەكەتتىك ەڭبەك ينسپەكتسياسى, مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولدىرماۋ ماسەلەلەرى بويىنشا وزگەرىستەر ەنگىزۋ تۋرالى», ونىڭ ىشىندە قۇمار ويىندارعا جانە شەنەۋنىكتەردىڭ, اسكەريلەردىڭ جانە پوليتسەيلەردىڭ ءباس تىگۋىنە قاتىسۋىن شەكتەۋگە ارنالعان زاڭ جوباسىنىڭ تارماقتارىمەن ءبولىستى.
«بۇل باستامانى تاريحي وقيعا دەپ اتاۋعا بولادى. قۇمار ويىنداردىڭ مەملەكەتتىك قىزمەتشىلەر مەن قۇقىق قورعاۋ ورگاندارىنا, ونىڭ ىشىندە ۇلتتىق قاۋىپسىزدىك وكىلدەرىنىڭ پسيحيكاسىنا قاۋىپ توندىرەتىنىن ەسكەرە وتىرىپ, ءبىز ءماجىلىس وكىلدەرىنىڭ اتىنان پەتيتسياعا قولداۋ بىلدىرەمىز. بۇعان قوعامنىڭ نازار اۋدارىپ جاتقانى دا قۋانتادى», دەپ ويىن جەتكىزدى سپيكەر.
سونداي-اق ماجىلىسمەن پەتيتسيا مۇنداي شەكتەۋگە قارسى لوببيستەردىڭ قارسىلىعىن جەڭۋگە كومەكتەستى دەپ مالىمدەدى.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىكتەرىنىڭ وكىلدەرى مەملەكەتتىك ورگاندار قىزمەتكەرلەرىنىڭ قۇمار ويىندارعا جانە ءباس تىگۋگە قاتىسۋىن باقىلاۋ تەتىكتەرى تۋرالى ايتىپ بەردى.
جيىن قورىتىندىسى بويىنشا مينيسترلىك شەشىمىنىڭ جوباسىنا بىرقاتار ۇسىنىس ايتىلدى.
شەشىم جوباسى جۇمىس توبىنىڭ ەكىنشى وتىرىسىندا قاراستىرىلادى.