تاريحى 80-جىلداردان باستالاتىن قازالى تەمىر-بەتون زاۋىتىندا تەمىرجولعا, كوپىر قۇرىلىسىنا قاجەتتى تەمىر-بەتون بالكالارى, قۇبىرلار, جوعارى كەرنەۋلى جەلىگە ارنالعان باعانالار, سونداي-اق كوپقاباتتى ءۇي قۇرىلىسىنا قاجەتتى تەمىر-بەتون بۇيىمدارىنىڭ 60-تان استام ءتۇرى وندىرىلەدى. زاۋىت جىلىنا 10 مىڭ تەكشە مەتر تەمىر-بەتون بۇيىمدارىن جانە كونسترۋكتسيالاردى وندىرۋگە بەيىمدەلگەن.
تاريحي دەپ وتىرعان سەبەبىمىز, زاۋىت 1982–1984 جىلدارى سالىنىپ, ىسكە قوسىلعان. سول جىلدارى قاندىاعاش تەمىر-بەتون بۇيىمدارىن شىعارۋ زاۋىتىنىڭ قازالىداعى تسەح بولىمشەسى رەتىندە جۇمىس ىستەپتى. ال 1986 جىلى قازالى تەمىر-بەتون بۇيىمدارى مەن كونسترۋكتسيالارىن شىعارۋ زاۋىتى بولىپ وزگەرىپ, باسشىلىق قازالى ستانساسىنا كوشىرىلگەن.
توقىراۋ جىلدارى سان رەت داعدارىسقا ۇشىراعان كاسىپورىننىڭ اتاۋى ول ۋاقىتتا دا بىرنەشە رەت وزگەردى. بىردە تۇركىستان تەمىرجولى, ەندى بىردە «قازاقستان تەمىر جولى» رمك قۇرامىنداعى «جەلدورسترويعا» قاراستى مەكەمە بولدى. اتاۋى وزگەرگەنمەن ءونىم ءتۇرىن وزگەرتپەگەن زاۋىت 2013 جىلدان باستاپ «LCI-MK» جشس قازالى فيليالى بولىپ جۇمىس ىستەپ كەلەدى.
«قازىرگى كەزدە زاۋىتقا تاپسىرىس بەرۋشىلەر كوبەيىپ كەلەدى. ءبىر كەزدەرى كاسىپورىن وڭىردەگى «100 مەكتەپ, 100 اۋرۋحانا» باعدارلاماسىنىڭ ىسكە اسۋىنا ايتارلىقتاي ۇلەس قوستى. اۋىزسۋ تارتۋ جۇمىستارىنا سايكەس كوپتەگەن تاپسىرىستى ورىنداپ كەلەدى. سونداي-اق كەزىندە «باتىس ەۋروپا – باتىس قىتاي» جول قۇرىلىسىنا قاجەتتى تەمىر-بەتون بۇيىمدارىن وندىرۋگە 2010 جىلدان باستاپ بەيىمدەلىپ, قوسىمشا قۇرىلىستار سالىپ, كەيىنگى تەحنولوگيامەن 18, 21, 24 مەترلىك كوپىر قۇرىلىسىنا قاجەتتى تەمىر-بەتون بالكالارىن, قۇبىرلاردى دايارلادى. ودان سوڭ رەسپۋبليكالىق جوبانىڭ ءبىرى بولعان «سەكسەۋىل – جەزقازعان», «شالقار – بەينەۋ» تەمىرجول قۇرىلىسىندا دا اتالعان زاۋىتتىڭ ءوز قولتاڭباسى بار. قازىر اۆتوموبيل جولىنداعى كوپىر قۇرىلىسىنا قاجەتتى قادا مەن قۇبىرلاردى, جوعارى كەرنەۋلى جەلىگە ارنالعان ۆل10كۆ دىڭگەكتەرىن, سونداي-اق ءۇي قۇرىلىسىنا قاجەتتى تەمىر-بەتون بۇيىمدارىن سوڭعى تەحنولوگيامەن وندىرەدى» دەيدى اۋداندىق كاسىپكەرلىك جانە ونەركاسىپ ءبولىمىنىڭ باسشىسى اقتىلەۋ بورىقۇلاقوۆ.
«LCI-MK» سەرىكتەستىگىندە 80-نەن اسا جۇمىس ىستەيدى. زاۋىتتا ارنايى وندىرىستىك كيىم بەرىلەدى. سونداي-اق زياندى تسەحتا جۇمىس ىستەيتىندەرگە ءسۇت ونىمدەرىن بەرۋ ۇيىمداستىرىلعان. ەكىنشىدەن, جۇمىسشى قاۋىمنىڭ 14 جاسقا دەيىنگى بالالارىنا جىلىنا ءبىر رەت الماتى قالاسىنداعى «مارالساي» دەمالىس ۇيىنە جولداما بەرىلەدى. ايتا كەتەيىك, جۇمىسشىلاردىڭ ورتاشا ەڭبەك جالاقىسى 220-250 مىڭ تەڭگەنى قۇرايدى. مامان بىلىكتىلىگىن ارتتىرۋ مەكەمەدە دۇرىس جولعا قويىلعان.
«سەرىكتەستىكتەگى باسشىلار تاراپىنان قازالى بولىمشەسىنىڭ جۇمىس كولەمىن ارتتىرۋىنا كوپ كوڭىل ءبولىنىپ جاتىر. قاراجات كوزىن قاراستىرىپ, قوسىمشا قۇرىلىس سالۋعا كىرىستى. مىسالى, ۇزىندىعى 32 مەتر, ارقايسىسى 20 توننادان كوتەرەتىن 2 كوتەرگىش كران قۇرىلدى. جاڭا 20 تەكشە مەترلىك كومپرەسسور ستانساسى ىسكە قوسىلدى. وسىدان ءبىراز جىل بۇرىن بۋ قازاندىعى تسەحىنا وتىن رەتىندە تابيعي گازدى پايدالانۋ, ياعني گازداندىرۋ جۇمىستارى تولىق اياقتالعان ەدى. بۇگىندە زاۋىت اكىمشىلىگى ەكولوگياعا, ادام دەنساۋلىعىنا تەرىس اسەر تيگىزەتىن قاتتى وتىن – كومىردىڭ ورنىنا «كوگىلدىر وتىندى» پايدالانىپ كەلەدى», دەيدى كاسىپكەرلىك جانە ونەركاسىپ ءبولىمىنىڭ جەتەكشى مامانى ارىستانبەك قانات.
كاسىپورىندا اۆتوموبيل كوپىر قۇرىلىسىنا قاجەتتى «ۆتك-33ۋ» ماركالىارالىق قۇرىلىس بالكالارىن قۇيۋ تەحنولوگياسى يگەرىلىپ, قازىر ورال قالاسىنداعى كوپىر قۇرىلىسىنا جونەلتىلىپ جاتىر. قوسىمشا تەحنيكا مەن قوندىرعىلار الىپ, تاپسىرىس پەن سۇرانىسقا سايكەس جۇمىس كۇشىن جىل ساناپ ۇلعايتىپ كەلەدى.