ۇكىمەتتە ۆيتسە-پرەمەر سەرىك جۇمانعاريننىڭ توراعالىعىمەن وتكەن جيىندا الەۋمەتتىك ماڭىزى بار ازىق-ت ۇلىكتىڭ باعاسىنا قاتىستى ماسەلەلەر تالقىلاندى, دەپ جازادى Egemen.kz.
ۇكىمەت مالىمەتىنشە, ءتورتىنشى اپتا قاتارىنان ەلدە 10 تاۋار باعاسى تومەندەپ جاتىر: قاراقۇمىق جارماسى – 0,9%, كۇنباعىس مايى – 0,5%, قىرىققابات – 0,4%, سيىر ەتى, تۇز جانە قانت – 0,3%, كۇرىش – 0,2%, ماكارون, سۇزبە جانە ۇن – 0,1%. ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا باعا 8 وبلىستا تومەندەپ, ونىڭ ىشىندە ۇلىتاۋ (0,8%), اقتوبە (0,6%) جانە اتىراۋ (0,5%) وبلىستارىندا ايتارلىقتاي ارزانداعانىن ايتتى. جالپى, ءبىر اپتا ىشىندە الەۋمەتتىك ازىق-ت ۇلىك باعاسىنىڭ ورتاشا يندەكسىنىڭ تومەندەۋى – 0,1%.
اۋىل شارۋاشىلىعى ۆيتسە-ءمينيسترى ەربول تاسجۇرەكوۆ وڭىرلەردە ەرتە ءونىم جيناۋ كەلىسىمشارتىنىڭ بارىسىن ورتاعا سالدى. ءۇش مەگاپوليس – استانا, الماتى, شىمكەنت – ماۋسىمارالىق كەزەڭدە كوكونىستەردى تۇراقتى باعامەن جەتكىزۋ ءۇشىن ەلدىڭ جەتى وڭىرىنەن اۋىل شارۋاشىلىعى وندىرۋشىلەرىمەن تىكەلەي كەلىسىمشارتتار جاساي باستادى.
«استانا قازىردىڭ وزىندە 15 مىڭ توننا كوكونىسكە: كارتوپ, پياز, قىرىققابات, سابىزگە فورۆاردتىق كەلىسىمشارتتار جاساستى. شىمكەنت – 7,5 مىڭ تونناعا, الماتى – 16 مىڭ تونناعا. جەتكىزۋ ماۋسىم-شىلدە, قىركۇيەك-ءساۋىر ارالىعىنا جوسپارلانعان. سونداي-اق كۇزگى ءونىمدى جەتكىزۋگە قوسىمشا فورۆاردتىق شارتتار جاسالادى», دەدى ەربول تاسجۇرەكوۆ.
سونداي-اق ەربول تاسجۇرەكوۆ وڭىرلەرگە الەۋمەتتىك ماڭىزى بار ازىق-ت ۇلىك تاۋارىنا باعانى تۇراقتاندىرۋ تەتىكتەرىن ىسكە اسىرۋ قاعيدالارىندا بەلگىلەنگەن قارجىلاندىرۋ مەرزىمى مەن شارتتارىن, ونىڭ ىشىندە اۋىل شارۋاشىلىعى تاۋارىن وندىرۋشىلەر مەن قايتا وڭدەۋ كاسىپورىندارىن قارجىلاندىرۋدىڭ 70% باعىتى بويىنشا تالاپتاردى ساقتاۋ قاجەت ەكەنىن اتاپ ءوتتى.