جاڭا سالىق كودەكسى جوباسىنىڭ تانىستىرىلىمى ءوتتى

جاڭا سالىق كودەكسىندە ۇسىنىلاتىن نەگىزگى تاسىلدەرمەن تانىسۋ ءۇشىن قازاقستاننىڭ بارلىق وڭىرىنەن ءتۇرلى قاۋىمداستىق وكىلدەرى مەن كاسىپكەرلەر  ونلاين تۇردە قوسىلدى.

«اتامەكەن» ۇلتتىق كاسىپكەرلەر پالاتاسى 2022 جىلدىڭ سوڭىندا سالالىق قاۋىمداستىقتار وكىلدەرىنەن, كاسىپكەرلەردەن, سالىق كەڭەسشىلەرىنەن تۇراتىن جۇمىس توبىن قۇردى. كاسىپكەرلەردى كەڭىنەن قامتۋ ءۇشىن ۇكپ جانىنان ەكونوميكانىڭ نەگىزگى سەكتورلارى بويىنشا قوسىمشا سالالىق كىشى توپتار قۇرىلدى.

ماسەلەن, بيزنەس-قاۋىمداستىق وتكەن جىلى ۇكىمەتكە كودەكسكە تۇزەتۋلەر ەنگىزۋ تۇجىرىمداماسىن ۇسىندى. وندا سالىق سالۋ راسىمدەرىن جەڭىلدەتۋگە, بيزنەس ءۇشىن اكىمشىلىك جۇكتەمەنى ازايتۋعا جانە شوب-كە باعىتتالعان بىرقاتار نەگىزگى وزگەرىستەرگە ەرەكشە نازار اۋدارىلدى.

«اتامەكەن» ۇكپ باسقارما توراعاسىنىڭ ورىنباسارى تيمۋر جاركەنوۆ  جاڭا قۇجات قۇرىلىمى ۇلتتىق پالاتانىڭ سالىق سالۋ جۇيەسىن وڭايلاتۋعا باعىتتالعان باستامالارىنا نەگىزدەلگەنىنە توقتالدى. نەگىزگى قاعيدا رەتىندە ءۇش رەجيمگە ءبولۋ ۇسىنىلدى: ءوزىن-ءوزى جۇمىسپەن قامتىعاندار, شاعىن جانە ورتا بيزنەس ءۇشىن, سونداي-اق اۋىل شارۋاشىلىعى قىزمەتكەرلەرى ءۇشىن.

سونداي-اق جاركەنوۆ بيزنەس قاۋىمداستىعىن تولعاندىرىپ جۇرگەن, قوسىمشا تالقىلاۋدى قاجەت ەتەتىن بىرقاتار ماسەلەلەر بار ەكەنىن اتاپ ءوتتى. وڭدى ىستەردىڭ ءبىرى رەتىندە ول 16-20 پايىزعا دەيىن كوتەرۋ جوسپارلانعان ققس مولشەرلەمەسى بويىنشا شەكتى كوتەرۋ باستاماسىنىڭ جويىلۋىن اتادى. بۇل كورسەتكىش 12% شەگىندە ساقتالدى.

ۇكپ-نىڭ كۇش-جىگەرى كورپوراتيۆتىك تابىس سالىعى (كتس) نورماسىن وزگەرتۋگە باعىتتالدى. قاداعالايتىن ۆەدومستۆولارمەن بىرلەسكەن جۇمىس ناتيجەسىندە ناقتى سارالاۋ ەنگىزىلەدى. بۇل ءوندىرىس ورىندارىنا ايتارلىقتاي كومەك بولماق.

«قولداۋ بىرىڭعاي جيىنتىق سالىقتىڭ بولىگى رەتىندە كىرىستىڭ 2 پايىزىن تولەۋ مۇمكىندىگىنەن تۇرادى. قىزمەتكەرلەر سانىنا شەكتەۋ قويىلمايدى. قازىر بۇل شەكتى كورسەتكىش جىلىنا 500 ميلليون تەڭگە دەڭگەيىندە قالىپ وتىر, بىراق ءبىز ونى 2 ميلليارد تەڭگەگە دەيىن كوتەرۋدى ۇسىنىپ وتىرمىز.

سونىمەن قاتار كتس مولشەرلەمەسى دە تومەندەيدى. زاڭدى تۇلعالار ءۇشىن جالپىعا بىردەي بەلگىلەنگەن تارتىپتە 10% جانە جەكە كاسىپكەرلەر ءۇشىن 5%», دەدى تيمۋر جاركەنوۆ.

سونداي-اق ازامات امرين مەملەكەت باسشىسىنىڭ تاپسىرمالارىمەن سايكەس كەلەتىن سالىق سانىن قىسقارتۋ, سالىق جەڭىلدىكتەرىن تەكسەرۋ, ينۆەستيتسيالىق الەۋەتتى ىنتالاندىرۋ, كتس ستاۆكالارىن سارالاۋ سياقتى ماسەلەلەر بويىنشا ۇلتتىق ەكونوميكا مينيسترلىگىنىڭ ۇستانىمىن ءتۇسىندىردى.

بۇدان وزگە, سالىق كودەكسىن ازىرلەۋ بارىسىندا مۇناي-گاز سەكتورى, تاۋ-كەن-مەتاللۋرگيا سالاسى سياقتى ەكونوميكانىڭ جۇيە قۇراۋشى سالالارىنا سالىق سالۋ, سونداي-اق وتاندىق وڭدەۋشى كاسىپورىنداردىڭ دامۋ الەۋەتىن ىنتالاندىرۋ ماسەلەلەرى قارالدى. تانىستىرىلىم بارىسىندا شاعىن بيزنەسكە سالىق سالۋ ماسەلەلەرى دە كوتەرىلدى.

ەرجان ءبىرجانوۆ ءوز بايانداماسىندا سالىقتىق اكىمشىلەندىرۋدى جاڭارتۋ جانە سالىق ورگاندارى تاراپىنان باقىلاۋدى بارىنشا تسيفرلاندىرۋ قاجەتتىگىن اتاپ ءوتتى. قارجى مينيسترلىگى سالىق تولەۋشىلەردىڭ حابارلامالارىن جىبەرۋدىڭ اعىمداعى جۇيەسىن قايتا قاراۋدى, جەكەلەگەن سالىق تولەۋشىلەر ءۇشىن سالىق تولەۋدى كەيىنگە قالدىرۋ ء(بولىپ تولەۋ) جونىندەگى تالاپتاردى جەڭىلدەتۋدى جانە كامەرالدىق باقىلاۋ راسىمدەرىن قايتا قاراۋدى ۇسىندى. سونداي-اق پرەزيدەنتتىڭ تاپسىرماسىن ىسكە اسىرۋ اياسىندا سالىق ەسەپتىلىگىنىڭ كولەمىن قىسقارتۋ جوسپارلاندى.

ء«بىزدىڭ قاۋىمداستىقتىڭ قىزمەتى الەۋمەتتىك سالاعا قاتىستى بولدى جانە ءبىز ارقاشان كورپوراتيۆتىك تابىس سالىعىن جانە قوسىلعان قۇن سالىعىن تولەۋدەن بوساتىلدىق. ەندى ولار ءبىزدى 10 پايىز سالىق تولەۋگە مىندەتتەمەكشى. ءبىزدىڭ بيزنەس سونشالىقتى ۇلكەن ەمەس. بۇل وزگەرىستەر جەكە مەكتەپتەرىمىز بەن بالاباقشالارىمىزدى جابۋ قاۋپىنە اكەلەدى. بىزگە بىردەي جاعداي, بىردەي جەڭىلدىكتەر جاسالعانىن قالايمىز», دەيدى قازاقستاندىق ۇزدىكسىز ءبىلىم بەرۋ قاۋىمداستىعىنىڭ نەگىزىن قالاۋشى مايرا بايدۋبەكوۆا.

كەزدەسۋگە قاتىسۋشىلاردىڭ سۇراقتارىنا مەملەكەتتىك ورگان وكىلدەرى تانىستىرىلىمنان كەيىن جاۋاپ بەردى. سولاردىڭ بىرىنە جاۋاپ رەتىندە تيمۋر جاركەنوۆ بۇل تۇجىرىمنىڭ پارلامەنتتە ءالى دە وزگەرەتىنىن اتاپ ءوتتى. «اتامەكەن» ۇكپ اعىمداعى نۇسقاعا ەنبەگەن بيزنەس-ۇسىنىستاردى ودان ءارى دە قورعايدى.

ۇلتتىق كاسىپكەرلەر پالاتاسى سالىق جۇيەسىن جەتىلدىرۋ جانە كاسىپكەرلىكتى قولداۋ بويىنشا جۇمىستى جالعاستىرادى.

قىرمىزى جۇماعاليقىزى,

ەۇۋ ستۋدەنتى