الماتى قالاسىندا قازاقستان تاراپىنىڭ توراعالىعىمەن ۇجىمدىق قاۋىپسىزدىك تۋرالى شارت ۇيىمىنىڭ قاۋىپسىزدىك كەڭەستەرى حاتشىلارى كوميتەتىنىڭ وتىرىسى ءوتتى.
ءىس-شاراعا قاتىسۋشىلار ۇقشۇ جاۋاپكەرشىلىگىنە قاراستى ايماقتاعى جاعداي جونىندە پىكىر الماستى.
قازاقستان رەسپۋبليكاسى قاۋىپسىزدىك كەڭەسىنىڭ حاتشىسى عيزات نۇرداۋلەتوۆ ارىپتەستەرىنە ۇقشۇ قىزمەتىنىڭ وزەكتى باعىتتارىنا قاتىستى, سونىڭ ىشىندە قازاقستاننىڭ ۇيىمعا توراعالىعىنىڭ باسىمدىقتارى اياسىنداعى ەلىمىزدىڭ ۇستانىمى تۋرالى مالىمەت بەردى.
حالىقارالىق تەرروريزم, كيبەرقىلمىس, ەسىرتكى مەن قارۋ-جاراقتىڭ زاڭسىز اينالىمى, ۇيىمداسقان ترانسۇلتتىق قىلمىس سياقتى قاۋىپ-قاتەرلەرگە قارسى ءىس-قيمىل شارالارىنا دا ەرەكشە نازار اۋدارىلدى.
وتىرىس قورىتىندىسى بويىنشا ۇقشۇ ۇجىمدىق قاۋىپسىزدىك كەڭەسىنىڭ «تاجىك-اۋعان شەكاراسىن نىعايتۋ جونىندەگى ۇجىمدىق قاۋىپسىزدىك تۋرالى شارت ۇيىمىنىڭ ماقساتتى مەملەكەتارالىق باعدارلاماسى تۋرالى» شەشىمىنىڭ جوباسى ماقۇلداندى.
جيىنعا قاتىسۋشىلار ۇقشۇ اياسىنداعى ىقپالداستىقتى دامىتۋعا جانە ۇيىمدى ودان ءارى نىعايتۋعا نيەتتى ەكەنىن راستادى.
ۇقشۇ-عا قازاقستان رەسپۋبليكاسىنىڭ توراعالىعى ەسكەرىلىپ, قاۋىپسىزدىك كەڭەستەرى حاتشىلارى كوميتەتىنىڭ كەزەكتى وتىرىسى بيىل قاراشا ايىندا ۇقشۇ ۇجىمدىق قاۋىپسىزدىك كەڭەسىنىڭ سەسسياسى قارساڭىندا استانادا وتەدى.